1 John 3 - Sa Ugud Apudyus

Sa Antatagun Da Abeng Apudyus

¹ Somsomḵon taḵu ḵad mipanggob si ḵapatog ni ayat Apudyus we Ama ḵan ditaḵu te gapu'tte sanae nakaskasdaawe ayat, imbelangna ditaḵu'ḵ abengna ḵad tuttuwae abengna ditaḵu. Yaḵon da adipun amati, adidapun bigbigone abeng Apudyus ditaḵu te adidapun os binigbig aḵ Apudyus we Ama taḵu.

² Ay-ayatoḵe buḻbuḻun, abeng Apudyus ditaḵu sinsadi taḵon ay nu daantaḵupun maawatane ustu ambalinan taḵu si umali ye aḻgaw. Yaḵon inigammu taḵu we nu umali ḵasin aḵ Kristu, miyisu taḵu ḵan siya te ilan taḵu we ustuustu.

³ Sa tagu we annamnama'tta sanae banag gapu ḵan Kristu, papoḻḵasonae mismu long-agnae isuna'ḵ Jesus.

⁴ Ḵad ngaimane bumasuḻ, lisalisona Lintog Apudyus te sa basuḻ lisalisona lintog.

⁵ Igammuyu we ummali'ḵ Kristu ta ḵaanona da basuḻ te siya ḵad naippun paat basuḻna.

⁶ Ḵad ngaimane iinggaw ḵan Kristu, adinapun pagapagatupane bumasuḻ te ngaimane pagapagatupanae bumasuḻ, adinapun paat inigammu'ḵ Kristu.

⁷ Aabengḵu, ummanyu ta adi ḵayu paallelaw. Ngaimane amagapagatupe angwa'tta maun-unan, sanat tagu we naun-unane isun Kristu.

⁸ Ḵad sa pagapagatupanae bumasubasuḻ, nidoga ḵan Satan te aḵ Satan ḵad bummasuḻ inggan ni laplapu. Pun siya gapun ni ummaliyan ni Abeng Apudyus sina'd luta ta dadailona da ḵoon Satan.

⁹ Sa abeng Apudyus, adinapun pagapagatupane bumasuḻ te sa biyag Apudyus iinggaw ḵan siya. Gapu ta nambalinon Apudyus aḵ abengna, adipun maḵwae pagapagatupanae bumasuḻ.

¹⁰ Ḵaḵna angimatunan taḵu'tta abeng Apudyus ya da abeng Satan: Da tagu we daḵampun aḵ abeng Apudyus, adidapun ḵoon da ustu ya adidapun ayaton da asintataguda.

Sa Inon Taḵu We Angayat Atta Buḻun Taḵu

¹¹ Sa tuttudu we dingngoḻyu si inggan ni namatiyanyu, ḵasapuḻane an-asiayat taḵu.

¹² Daḵampun oḵyan atte ugalin Cain unudonyu te aḵ Cain tagun Satan woḵ gingngatna'ḵ Abel we sunudna. Ngai gapun ni nangongatan Cain ḵan Abel? Gapu'tte lawweng da ḵoḵoḵḵona yaḵon naun-unan da ḵingwan ni sunudna.

¹³ Adi ḵayu mataag susunud nu sasangngaan diḵayu'tta tagu we adipun namati.

¹⁴ Igammu taḵu we aditaḵupun ogon misina ḵan Apudyus we isun ni awe, pun sinsadi anna ḵan ditaḵu biyag aḵ inggana. Ḵad igammu taḵu ḵatuttuwaan te ay-ayaton taḵu da susunud taḵu ḵan Kristu. Sa tagu we adipun angayat atta asintataguna, isun di sissiyae natoy.

¹⁵ Te ngaimane sasangngaana asintataguna isuna pumappatoy ḵad igammu taḵu we sa pumappatoy naippun ḵan siya biyag aḵ inggana.

¹⁶ Pun ditaḵu ḵad os, sa nangittan Jesu Kristu si biyagna'ḵ natoy para ḵan ditaḵu, naḵasagana taḵu oḵyane angitod atta biyag taḵu para'tta susunud taḵu ḵan Kristu.

¹⁷ Pun nu awad osa'ḵ anna ḵuḵuwana, silupna, mabalinna ya innilana asintatagunae angkurang atta ḵasapuḻana yaḵon adinapun ḵinadaguwan, ngai inonae angibagae ay-ayatona'ḵ Apudyus?

¹⁸ Diḵayu we abengḵu, sa inon taḵu we angayat atta asintatagu taḵu, daḵampun oḵyan aḵ abuse ugud yaḵon maḻpu oḵyan atta pusu taḵu ḵad mipaila oḵyan atta gunay taḵu.

^19-20 Nu ḵaḵnat inon taḵu we angayat atta udum, sanat amo angigammuwan taḵu we ditaḵu da tuttuwae abeng Apudyus. Ḵad taḵon ay nu pabasuḻon ditaḵu'tta somsomoḵ taḵu, antaḻgod taḵu we umadani ḵan Apudyus. Te igammu taḵu we nangatngatu somsomoḵ Apudyus nu sa somsomoḵ taḵu ya igammuna ditaḵu we ustuustu.

²¹ Pun diḵayu we ay-ayatoḵe buḻbuḻun, nu adimpun da somsomoḵ taḵu pabasuḻon ditaḵu, antaḻgod taḵu we umadani si sinagung Apudyus.

²² Ḵad da ngaimane ḵodawon taḵu ḵan siya, ittona gapu'tte anuttuwaan taḵu'tta bilinna ya sa angwaan taḵu'tta mas-omana.

²³ Pun annaya imbilinna ḵan ditaḵu: Amati taḵu oḵyan ḵan Jesu Kristu we Abengna ya an-asiayat taḵu te siya imbilin Kristu ḵan ditaḵu.

²⁴ Da losane anuttuwa'tta bilin Apudyus, iinggawda ḵan Apudyus ya iinggaw os aḵ Apudyus ḵan dida. Ḵad sa angigammuwan taḵu we iinggaw aḵ Apudyus ḵan ditaḵu, sa Ispiritu Santu we innatodna ḵan ditaḵu.