1 John 1 - Sa Ugud Apudyus

Sa Ugud Maḻpuwan ni Biyag

^1-2 Sa annae suḻat, awad de iwaḻagawagni ḵan diḵayu mipanggob atte Ugud we maḻpuwan ni biyag aḵ inggana. Inninggaw ḵan Apudyus we Ama inggan ni laplapu. Nambalin aḵ tagu woḵ inninggaw sina'd luta ḵad mismu we innilani. Dingngoḻni ugudna ya mismu we inappadanni.

³ Da sanae innilani ya da dingngoḻni, siya sanae iwaḻagawagni ḵan diḵayu ta midoga ḵayu'tte maḵabuḻbuḻunanni ḵan Apudyus we Ama taḵu ya aḵ Jesu Kristu we Abengna.

⁴ Ḵad igilini da sana ta amo lumayad taḵu we ippun kurangna.

Aḵ Apudyus Silaw

⁵ Annaya ugude dingngoḻni ye naḻpu'tte Abeng Apudyus we iwaḻagawagni ḵan diḵayu: Aḵ Apudyus isun di silaw ḵad naippun paat giḵbot ḵan siya.

⁶ Pun nu ḵanan taḵu we maḵabuḻbuḻun taḵu ḵan siya yaḵon sissiyae matagu taḵu'tte giḵbot, antultulli taḵu te aditaḵupun ḵoon ḵatuttuwaane pinion Apudyus.

⁷ Yaḵon nu sissiyae mabiyag taḵu'tte paddae isun Apudyus we anna'tte padda, maḵabuḻbuḻun taḵu'tta doga taḵu we namati ḵad pumoḻḵas losan da basuḻ taḵu gapu'tte daḻan Jesus we Abengna.

⁸ Nu ḵanan taḵu we naippun basuḻ taḵu, allelawon taḵu we mismu da long-ag taḵu ya sa ḵatuttuwaan naippun ḵan ditaḵu.

⁹ Yaḵon nu ibabagga taḵu da basuḻ taḵu, aḵ Apudyus mataḻgodan ḵan naun-unane amakawan atta basuḻ taḵu ya papoḻḵasona ditaḵu'tta losane ḵinalaweng taḵu.

¹⁰ Yaḵon nu ḵanan taḵu we aditaḵupun naḵabasuḻ, ambalinon taḵu we tuliyan aḵ Apudyus ḵad sa Ugudna naippun ḵan ditaḵu.