1 Corinthians 8 - Sa Ugud Apudyus

Sa Maḵane Nidatun Atta Sinan-apudyus

¹ Annaya bos ibagaḵ ḵan diḵayu si mipanggob atte anganan atte maḵane midatun atta sinan-apudyus. Tuttuwa anna ya igammu taḵu losan. Yaḵon umman taḵu te allasu we sumoḵaḻ taḵu gapu'tte anna igammu taḵu. Yaḵon nu an-asiayat taḵu, sanat pumigsaan da pammati taḵu.

² Sa tagu we ḵananae igammuna losan, sanat angipailae ippun igammuna'tta banage igammuwona oḵyan.

³ Yaḵon da angayat ḵan Apudyus, ibelang Apudyus dida'ḵ taguna.

⁴ Sinsadi, nu mipanggob si maḵane midatun atta sinan-apudyus, iniiggammu taḵu we naippun ḵatuttuwaan da sinan-apudyus. Igammu taḵu we ossaan tuttuwae Apudyus naippun udum.

⁵ Te taḵon ay nu adu da ngannon da udume tagu apudyusda ad langit ya sina'd luta, tuttuwae adu da apudyusda ya adu da apuda.

⁶ Yaḵon ḵan ditaḵu, ossaan Apudyus we Ama taḵu. Siya nangwa'tta losane banag ya siya gapun ni mataguwan taḵu. Ossaan Apu we siya'ḵ Jesu Kristu. Naḵwa da losane banag mipagapu ḵan siya ya matagu taḵu mipagapu ḵan siya.

⁷ Yaḵon daḵampun aḵ losan da tagu igammu annae ḵatuttuwaan. Te niyugali ḵan didae andaydayawda'tta sinan-apudyus ḵad nu ḵanonda ḵatti ye maḵane midatun atta sinan-apudyus, simsimmoḵdae midogada andayaw atta sinan-apudyus. Gapu ta anḵuya somsomoḵda, lawweng giḵnada te simsimmoḵdae lawweng ḵingwada.

⁸ Sa ḵatuttuwaan, daḵampun atte maḵan angiyadani ḵan ditaḵu ḵan Apudyus. Ḵad naippun lawwengna nu adi taḵu ḵanon ḵad ippun os maganab taḵu nu ḵanon taḵu.

⁹ Yaḵon ḵasapuḻane umman taḵu wayawaya taḵu ta daḵampun oḵyan aḵ siya maḵabasuḻan ni buḻun taḵu we anḵuya somsomoḵna.

¹⁰ Te nu ilan ni osae anḵuya somsomoḵnae siḵae anna igammunae anganḵa'd daḻom si templon da sinan-apudyus, daḵampun ḵamman aḵ siya masoḻgaganae maḵaḵan taḵon ay nu igammunae nidatun atta sinan-apudyus?

¹¹ Ḵad gapu si igammum, nadadail sunudnu ḵan Kristu we anḵuya pammatinae inḵatoy Kristu.

¹² Nu naḵabasuḻ ḵayu'tta susunudyu ḵan Kristu, pinaḻwengyu da somsomoḵda te inunudda diḵayu we angwa si sinomsomoḵdae lawweng ya naḵabasuḻ ḵayu bos ḵan Kristu.

¹³ Pun nu siya maḵabasuḻan ni sunudḵu ḵan Kristu anganaḵ atte sidae nidatun atta sinan-apudyus, agayḵu we angan atta sadi ye maḵan ta ippun maḵabasuḻan ni sunudḵu gapu ḵan saḵon.