1 Corinthians 7 - Sa Ugud Apudyus

Sa Mipanggob Atte As-asawa

¹ Annaya songbatḵu si sadi ye im-imusyu ḵan saḵon atte nanuḻatanyu. Sa mipanggob si as-asawa, nabaḻbaḻu nu adipun tagu angasawa.

² Yaḵon gapu ta adu da nasulisuge nangadaḻug atta daḵampun aḵ asawada, un-unnoyna nu sa laḻaḵi ḵan bubai awad oḵyan asawada.

³ Ḵad sa laḻaḵi ye nangasawa ḵasapuḻane ittona ḵaḻabbongana si ḵasapuḻan ni asawana. Taḵon ay asawanae bubai, ḵasapuḻane ittona bos ḵaḻabbongana si ḵasapuḻan ni asawana.

⁴ Te sa bubai, daḵampun aḵ siya sinḵuwa'tte long-agna yaḵon sa asawana. Isuna bos si laḻaḵi ye daḵampun aḵ siya sinḵuwa'tte long-agna yaḵon sa asawana.

⁵ Ḵan diḵayu we an-as-asawa, adiyu iyadi ḵaḻabbongan ni asawayu, malaksid nu antuḻaganyu we adiḵayu yan an-adaḻug ta ipapatiyu we alluwaḻu. Ḵad nu maabus aḻgawe alluwaḻuwanyu, an-adaḻug ḵayu bos ta adin Satan diḵayu sulisugon aḵ bumasuḻ te adiḵayupun maḵatupod atta long-agyu.

⁶ Ibagaḵ anna ta maawatanyu we miyunude angasawa ḵayu yaḵon daḵampun aḵ bilin.

⁷ Te sa ḵatuttuwaan, pioḵ oḵyan nu isuyu saḵone ippun asawana. Yaḵon igammuḵe daḵampun aḵ an-iisu taḵu te nansabasabali ḵabooḻane innatod Apudyus si sin-ossae tagu.

⁸ Diḵayu we daan angasawa ya diḵayu we nabaḻu, ibagaḵe ambaḻu nu adi ḵayu angasawae isuḵ.

⁹ Yaḵon nu adi ḵayu maḵatupod si giḵnayu, un-unnoyna angasawa ḵayu nu sa idamanyu pion ni long-agyu.

¹⁰ Ḵan diḵayu we nangasawa, annaya ibagaḵ ḵan diḵayu we daḵampun aḵ bilinḵu yaḵon bilin Apu. Sa bubai adina oḵyan idangan asawana.

¹¹ Yaḵon sa bubai nu idangana asawana, ḵasapuḻane adi ḵasin angasawa baḵon nu nabaḻbaḻu nu angulin si asawana. Ḵad isuna laḻaḵi, ḵasapuḻane adina idangan asawana.

^12-13 Diḵayu ḵad ose susunud ḵan Kristu we daḵampun aḵ namati da asawayu, annaya ibagaḵ ḵan diḵayu, daḵampun aḵ bilin Apu te naḻpu'tte somsomoḵḵu. Taḵon ay daḵampun aḵ namati asawan ni osa nu pionae miḵamboḻoy si asawanae namati, adina oḵyan idangan.

¹⁴ Te sa asawae adipun namati itotoḵḵon Apudyus gapu si pammatin asawana. Te nu daḵampun aḵ tuttuwa sana, adimpun oḵyan Apudyus ibelang da abengda'ḵ pummoḻḵas yaḵon imbelang Apudyus dida'ḵ pummoḻḵas.

¹⁵ Yaḵon nu pion ni daḵampun aḵ namati idangan asawanae namati, maḵwa. Nu awad ḵaḵnat aḵ maḵwa, mapuḵayan asawae namati, laḻaḵi man baḵon nu bubai. Te pinilin Apudyus ditaḵu ta lumin-awa maḵabuḻbuḻunan taḵu'tta udum.

¹⁶ Te diḵayu we namati, adiyupun ḵamman igammu nu diḵayu gapun ni anaguwan Apudyus atta asawayu we adipun namati?

Ibiyagyu Ḵasasaadyu

¹⁷ Sa osae namati, pagatupana oḵyan ḵasasaadna si namatiyana te sanat innatod Apu ḵan siya'tte timpu we namiliyan Apudyus ḵan siyae amati ḵan Jesus. Sana da imbilinḵu'tta losane gimung da namati.

¹⁸ Awatna, nu naabus nasogyatan laḻaḵi si namiliyan Apudyus ḵan siya'ḵ namati, adipun ḵasapuḻane ḵaanona sinyale nasogyatan. Nu adipun nasogyatan si napiliyana, adipun ḵasapuḻane ampasogyat.

¹⁹ Te daḵampun aḵ ampatog ḵan Apudyus nu nasogyatan tagu baḵon nu adipun. Yaḵon siya ampatog anututtuwaan taḵu'tta bilinna.

²⁰ Pun nu ngai ḵasasaad ni osae tagu'tte namiliyan Apudyus, adina oḵyan pasantan sinsana.

²¹ Nu musassuḵa'tte namiliyana ḵan siḵa'ḵ amati, ippun ḵanana nu pagatupame ammusassu. Yaḵon nu awad gundawaynu'ḵ mapuḵayan si nammusassuwam, ḵoom sanat.

²² Te nu musassuḵa'tte napiliyam ta niyossaanḵa ḵan Apu, napuḵayanḵa'tte basuḻ gapu ḵan Kristu. Ḵad nu daḵanḵapun aḵ musassu'tte napiliyam, nambalinḵa'ḵ musassun Kristu sinsadi.

²³ Nasubut ḵayu'ḵ amod. Pun daḵampun oḵyan aḵ ambalin ḵayu'ḵ musassun da tagu.

²⁴ Pun nu ngai ḵasasaadyu we susunudḵu ḵan Kristu si napiliyanyu, pagapagatupanyu'tte niyossaananyu ḵan Apudyus.

Sa Mipanggob Atta Daḵampun Aḵ Naasaw-an Ḵan Nabaḻu

²⁵ Sa mipanggob atta daampun angasawa, naippun bilinḵu ḵan diḵayu'ḵ naḻpu ḵan Apu. Yaḵon ibagaḵ ḵasomsomḵaḵ te mataḻgodanaḵ mipagapu'tte ḵadaguna ḵan saḵon.

²⁶ Sa somsomoḵḵu, gapu'tte ampaḵaḻaman si sanae timpu, ambaḻu nu sissiya ḵayu si ḵasasaadyu.

²⁷ Diḵayu ḵade laḻaḵi ye naabus nangasawa, adiyu idangan da asawayu. Diḵayu ḵad ose daan angasawa, unnoyna adi ḵayu ansingit aḵ asaw-onyu.

²⁸ Yaḵon nu angasawa ḵayu, daḵampun aḵ basuḻ. Ḵad nu angasawa babaḻasang daḵampun aḵ basuḻ. Yaḵon sa ibagaḵ, unnoyna adi ḵayu angasawa ta adi ḵayu midoga si ampaḵaḻaman da nangasawa.

²⁹ Susunudḵu ḵan Kristu, sa pioḵ ibaga ḵan diḵayu daḵampun aḵ iinggaw taḵu sina'd lutae anserbi ḵan Apu Jesus. Pun inggana sinsana diḵayu we naasaw-ane laḻaḵi, ibelangyu we isun di ippun asawayu.

³⁰ Diḵayu we andomdome sana, isun oḵyan di adiḵayupun andomdom. Ḵad da allaylayad, isun oḵyan di adidapun allaylayad ya da ngumina, isun oḵyan di daḵampun aḵ ḵuwada nginin-anda.

³¹ Ḵad da angusar atta nainlubungane banag, daḵampun oḵyan aḵ sanat da isisimoḵda. Te sa ḵasasaad si annae lubung madam-an amungtu.

³² Sa pioḵ, ippun oḵyan ambinsawanyu. Sa laḻaḵi ye ippun asawana, ipapatina oḵyane angwa'tta banage paḵwan Apu ḵan siya ḵad siya sosomḵona inonae angwa'tta mas-oman Apudyus.

³³ Yaḵon sa laḻaḵi ye naasaw-an, siya sosomḵona mipanggob atte mabiyagan atte annae lubung ya sa mas-oman ni asawana,

³⁴ ḵad nagogwa somsomoḵna. Isuna bos atte babaḻasang baḵon nu sa bubai ye ippun asawana. Naippun udum aḵ somsomḵona nu adi sa mas-oman Apu te piona idatun long-agna ya sa somsomoḵna ḵan siya. Yaḵon sa bubai ye naasaw-an, adu somsomḵona'tte mabiyagana'tte annae lubung ya sa mas-oman ni asawana.

³⁵ Ibagaḵ ḵan diḵayu anna, daḵampun aḵ iyadiḵ angasawa ḵayu. Yaḵon imbagaḵ sadi para'tte bumaḻuwanyu we mismu. Te pioḵe igammuwonyu ustu we antatagu ya iyossaanyu we anserbi ḵan Apu we naippun matupodanyu.

³⁶ Nu sa mipanggob atta nituḻage an-asawa ya adidapun maḵaiyattom si giḵnada, ippun lawwengna ya daḵampun aḵ basuḻ nu an-asawada.

³⁷ Yaḵon nu awad laḻaḵi'ḵ nituḻage miyasawa yaḵon adinapun pion ya simsimmoḵnae adipun angasawa, ippun ḵallabbong anupod ḵan siya nu lamogna iyattom giḵnana, unnoyna ḵatti.

³⁸ Pun sa laḻaḵi ye angasawa'tte nituḻagana, ambaḻu sanate ḵoona. Yaḵon sa laḻaḵi ye adinapun pagatupane angasawa, unnoyna ḵatti.

³⁹ Sa bubai, adipun maḵwa idangana asawana ya ḵasin angasawa nu sissiyae matattagu asawana. Yaḵon nu matoy asawana, nawayae angasawa si piona. Yaḵon ḵasapuḻane siya asaw-ona namati ḵan Apu.

⁴⁰ Yaḵon sa somsomoḵḵu, unnoyna nu adi ḵasin angasawa. Ḵad igammuḵe miyunud atte somsomoḵ ni Ispiritun Apudyus.