1 Corinthians 6 - Sa Ugud Apudyus

Sa Angidaḻumanda Atta Dogadae Namati

¹ Nu awad gapun ni angidaḻuman ni osan sunud ḵan Kristu atte doganae namati, adiḵayu umoy andaḻum atte ḵuwise daḵampun aḵ namati. Yaḵon inḵayu oḵyan pailintog atta tagun Apudyus.

² Adiyupun ḵamman igammu we da tagun Apudyus anguwis atta tagu si annae lubung? Ḵad nu diḵayu anguwis atta tagu si annae lubung, adiyupun ḵamman os lamog ilintog da sin-aḵḵit ay lawae banag?

³ Adiyupun ḵamman igammu we ditaḵu anguwis atta anghel? Ḵad maguḻaman os adi maḵwae ilintogyu da ngaimane banag si annae mataguwanyu?

⁴ Pun nu awad ḵasusyu, ngaipayu iyoy atta ḵuwise daḵampun aḵ namati ya ippun ḵaḻabbonganda'tta namati ye magimugimung?

⁵ Ampabain ḵayu! Ippun ḵamman osa'ḵ naangsan atte gimungyu'ḵ ḵallabbonge angilintog si ḵasusyu we susunud ḵan Kristu?

⁶ Yaḵon ngaipayu umoy idaḻum atta daḵampun aḵ namati sunudyu ḵan Kristu ta dida angilintog ḵan diḵayu?

⁷ Nu andidinnaḻum ḵayu, naabuse illog ni lawweng diḵayu. Te nu ḵatti unnoyna pos ay ampaḵaḻamon diḵayu ya kulukon diḵayu nu sa an-asidaḻum ḵayu.

⁸ Yaḵon diḵayu pos pagay an-asilaweng ya an-asikuluk taḵon ay da susunudyu ḵan Kristu.

⁹ Adiyupun ḵamman igammu we da angwa'ḵ lawweng adidapun gangganason da laḵsunda si midog-anda si ampangatan Apudyus? Adiyu allelawon da long-agyu te da angadaḻug atta daḵampun aḵ asawada, da andayaw atta sinan-apudyus, da laḻaḵi ye angadaḻug atta asillaḻaḵida ya da bubai ye angadaḻug atta asimbubaida, da maḵadagdagas ya da laḻaḵi ye mabayadan,

¹⁰ da aḵḵawan, da ḵamommod, da bartekero, da an-ugud aḵ lawweng atta asintataguda, da tulisan, adidapun gangganason da laḵsunda si midog-anda si ampangatan Apudyus.

¹¹ Sa awe, ḵaḵnat ḵoḵoḵḵon da udum ḵan diḵayu. Yaḵon sinsana pummoḻḵas ḵayu'tta losane basuḻyu ya intotoḵḵon Apudyus diḵayu'ḵ taguna ya siya angwa si maun-unanyu mipagapu'tte ḵabooḻan Apu Jesu Kristu ya sa Ispiritun ni Apudyus taḵu.

Sa Angusaranyu Atte Long-agyu Si Madayawan Apudyus

¹² Awad da udum ḵan diḵayu we nangibaga ḵanane ḵaḻabbonganni ye angwa'tta losane banag. Yaḵon daḵampun aḵ bumaḻuwan taḵu da losane banage ḵoon taḵu. Siya ḵanaḵe maḵwa ḵooḵ da losane banag yaḵon adiḵpun iyunude ammusassuwonaḵ atta sanae banag.

¹³ Ḵanan os da udum, “Da maḵan, naḵwada ta anserbi si buwang, ḵad sa buwang naḵwa ta anserbi si maḵan.” Yaḵon dadailon Apudyus didae duwa si umali ye aḻgaw. Yaḵon sa long-ag taḵu daḵampun aḵ naḵwa ta adaḻugon taḵu daḵampun aḵ asawa taḵu. Te sa long-ag taḵu naḵwa'ḵ anserbi ḵan Apu ḵad siya angayyuwan atta long-ag taḵu.

¹⁴ Awad os ḵausaran ni long-ag taḵu si umali ye aḻgaw te aḵ Apudyus taguwona ditaḵu gapu'tte ḵabooḻanae isun ni nanaguwana ḵan Apu.

¹⁵ Adiyupun ḵamman igammu we sa long-ag taḵu we namati, ḵamangay ni long-ag Kristu? Ḵad nu ḵaḵnat, maḵwa ḵad aine antipun long-ag Kristu atta long-ag da puta? Adipun paat maḵwa!

¹⁶ Adiyupun ḵamman igammu we nu miyadaḻug ay osae tagu'tte puta, ambalinda'ḵ ossaane long-ag? Te sa ḵanan ni nigili ye Ugud Apudyus, “Da duwa nambalinda'ḵ ossaane long-ag.”

¹⁷ Yaḵon ngaimane niyossaan ḵan Apu, nambalinda'ḵ ossaane ispiritu.

¹⁸ Pun adiyu adaḻugon da daḵampun aḵ asawayu. Ḵad adayuwanyu da ḵassadi ye basuḻ te amo sillumaweng nu sa udume kalasin da basuḻ. Da udume basuḻ daḵampun aḵ dumadail si long-ag yaḵon sa angadaḻug atte daḵampun aḵ asawana, dadailona bos long-agna ya isuna bose maḵabasuḻe mismu atte long-agna.

¹⁹ Adiyupun ḵamman igammu we sa long-ag taḵu templon ni Ispiritu Santu we innattod Apudyus aḵ iinggaw ḵan ditaḵu? Daḵampun aḵ ḵuwa taḵu long-ag taḵu te ḵuwan Apudyus,

²⁰ te nasubut taḵu'ḵ amod. Pun ḵasapuḻane usaron taḵu long-ag taḵu'ḵ madayawan Apudyus.