1 Corinthians 5 - Sa Ugud Apudyus

Sa Basuḻ Atte Gimung

¹ Awad de dingngoḻḵu we awad ḵanu osa ḵan diḵayu we nangwa'tte ḵababbaine taḵon ay da pagano adidapun patut ḵoon ḵaḵnat. Te dinagdagasana pigwae asawan amana.

² Ḵad sissiyae ansoḵaḻ ḵayu! Siya oḵyan ḵoonyu idomdomyu ḵababbaine naḵwa ta paḻyawonyu ḵaḵnate tagu'tte gimungyu.

^3-4 Te taḵon ay nu ippunaḵ sinat, awad de ispirituḵ ḵad isun di awadaḵ sinat, ḵinoddongaḵ sanate tagu we nangwa si ḵaḵnate lawweng. Nu magimung ḵayu, anna bos ispirituḵ ḵan diḵayu, ḵad sa ḵabooḻan Apu taḵu we Jesus awad os ḵan diḵayu.

⁵ Ipuḻangyu sanate laḻaḵi ḵan Satan ta dadailona long-agna, ta matagu ispirituna'tte aḻgawe angulinan Apu.

⁶ Daḵampun aḵ ambaḻu ansoḵaḻ ḵayu. Adiyupun ḵamman igammu we sa poose yeast pabotaḻona losan niḵamsanae arina?

⁷ Ḵasapuḻane ḵaanonyu ugaliyu we mipani'tte yeast ta sa ugaliyu ambalin aḵ ampoḻḵas ḵasasaadyu si antotollong Apudyus. Ḵasapuḻane ḵoonyu ḵatti ta mipani ḵayu si ḵaḵ-utu we tinapaye ippun ḵamosna'ḵ yeast we mitoḵom nu ansida da Judyu atte karnero si Gayagayae ngannonda Nallausan. Te aḵ Kristu mipani'tte sadi ye karnero te natoy ta puḵayana ditaḵu'tta basuḻ.

⁸ Pun sa maḵagayagayaan taḵu, adi taḵu ḵanon tinapaye naḵamsan atte yeast. Sa pioḵ ḵanan ḵan ditaḵu we namati, adi taḵu unudon ugali yaḵon sa ambaḻu ḵan ḵatuttuwaane naippun lawweng aḵ niḵamos.

⁹ Sa osae suḻatḵu ḵan diḵayu, imbagaḵe adi ḵayu maḵabuḻbuḻun atta tagu we adaḻugonda da daḵampun aḵ asawada.

¹⁰ Yaḵon sa ibagaḵ daḵampun atta tagu we adipun namati ye maḵadagdagas, ḵamommod ya da aḵḵawan baḵon nu andayaw atta sinan-apudyus. Te nu adi ḵayu maḵabuḻbuḻun ḵan dida, ḵasapuḻane tenanyu annae lubung.

¹¹ Sa pioḵ ḵanan ḵan diḵayu, adi ḵayu maḵabuḻbuḻun atta ibelangda da long-agdae sunud taḵu ḵan Kristu yaḵon dida da angadaḻug atta daḵampun aḵ asawada, ḵamommodda, andaydayawda'tta sinan-apudyus, an-ugudda'ḵ lawweng atta udume tagu, da bartekero ya da tulisan. Ḵad taḵon ay ḵaḵan, adi ḵayu miyubung ḵan dida.

^12-13 Naippun biyang taḵu we anguwis atta daḵampun aḵ amati te aḵ Apudyus asi anguwis ya anusa ḵan dida. Yaḵon ditaḵu we namati, awad de ḵaḻabbongan taḵu we anguwis atta buḻun taḵu si gimung. Te sa ḵanan ni nigili'tte Ugud Apudyus, “Ḵasapuḻane paḻyawonyu angwa'ḵ lawweng atte gimungyu.”