1 Corinthians 16 - Sa Ugud Apudyus

Sa Mibadang Atta Susunude Namati

¹ Nu sa mipanggob atte daguponyu we mibadang atta tagun Apudyus ad Jerusalem, siya ḵoonyu isun ni imbilinḵu'tta gimung da namati'tta ḵinailin di ili'tte probinsiya'd Galatia.

² Sa umunae aḻgaw atte dinuminggu, awad oḵyan osa ḵan diḵayu angiwalin aḵ gatad insigun nu piga illabbuna. Ḵad gappotonyu ta umaliyaḵ ḵad naḵasagana.

³ Dumutuḵ ḵayu'ḵ umoy angiyoy atte nadagupe badangyu'd Jerusalem. Ḵad nu dumatongaḵ anuḻataḵ ta angigammuwan da tagu'd Jerusalem we dida dinutuḵanyu.

⁴ Yaḵon nu awat ay di saḵon umoy angiyoy sidi, buḻunanaḵ atta sanate dinutuḵanyu.

Sa Planun Paul

⁵ Sa planuḵ sinsadi angoyaḵ ad Macedonia ta antuttuduwaḵ sidi ḵad asiyaḵot umoy bumisita ḵan diḵayu.

⁶ Ḵad manunnuwanaḵ nine inggaw ḵan diḵayu inggana'ḵ magangput ageled ta ambaḻu nu diḵayu bumadang atta losane ḵasapuḻaḵe umoy atta dinumane ayaḵ.

⁷ Adiḵpun pione ilan diḵayu sinsadi te sin-aḵitane abus inggawaḵ ḵan diḵayu. Te namnamaoḵe sa udume timpu manunnuwan inggawaḵ ḵan diḵayu sinat nu iyunud oḵyan Apudyus.

⁸ Yaḵon inggawaḵ yan sina'd Ephesus inggana'ḵ maḻaḵpus Gayagayani ye Judyu we ngannonni Pentecost.

⁹ Te taḵon ay adu bos da sumullagi ḵan saḵon, ad-adu wayaḵe antuttudu te adu da maḻyad andongoḻ.

¹⁰ Ḵad nu umali'ḵ Timothy sinat, ilanyu ta ummanyu mangiliyon ta adi umogyat ḵan diḵayu te siya bos osae angwa'tta paḵwan Apudyus we isun os ni ḵooḵ.

¹¹ Ḵad ilanyu bos ta adiyu potogon yaḵon paḻung-udonyu we allin-awa somsomoḵna ta allaylayade angulin ḵan saḵon. Annan uwayoḵe umali ya da susunud taḵu ḵan Kristu.

¹² Ḵad sa mipanggob ḵan Apollos we sunud taḵu ḵan Kristu, inaḻ-aḻuḵḵu ta mibuḻun oḵyan atta udume susunud taḵu ḵan Kristu we umali sinat. Yaḵon adinapun pione umali ye sana. Asi umali nu awad wayana.

Sa Anungus Ni Tuttudun Paul

¹³ Dadaḵḵagonyu ya popotpotanyu bos da pammatiyu, tumuḻod ḵayu oḵyan ya pumigsa ḵayu.

¹⁴ Da losane ḵoonyu, ḵoonyu oḵyane gapu'tte ayatyu.

¹⁵ Susunudḵu ḵan Kristu, igammuyu mipanggob ḵan da Stephanas we simbaḻyan. Dida da ummunae namati ḵan Apudyus ad Achaia. Impapatidae nanserbi'tta losane tagun Apudyus.

¹⁶ Patganyu oḵyan da tagu we ḵassadi ḵad taḵon ay os da losane maḵaḵewaaḻ ḵan maḵaserbi ḵan dida.

¹⁷ Allaylayadaḵ atte ummaliyan da Stephanas, Fortunatus ya aḵ Achaicus te naḵaan amode ayuḵ atte nangil-aḵ ḵan dida.

¹⁸ Te sinoḻgagda somsomoḵḵu ya isuna bose sinoḻgagda da somsomoḵyu. Labbongnae mabigbig da tagu we ḵaḵna.

¹⁹ Losan da gimung da namati'tta ḵinailin di ili si probinsiya'd Asia, losanda pakumustaon diḵayu sinat. Ḵad taḵon ay os da Aquila ḵan Priscilla we an-asawa ya da namati ye magimugimung si boḻoyda, sipupusuda bose ampakumusta ḵan diḵayu we susunudni ḵan Apu.

²⁰ Ḵad taḵon ay da losane susunud taḵu ḵan Kristu sina, pakumustaon os diḵayu. Pun nu an-asiila ḵayu, ipailayu oḵyane an-asiayat ḵayu.

²¹ Saḵon aḵ Paul we nangigili'tte annae gangput ni suḻatḵu, “Kumusta ḵayu.”

²² Nu ngaimane adipun angayat ḵan Apu taḵu, aaddi ye madusa ḵan Apudyus. Umaliḵa, Apu.

²³ Awad oḵyan ḵan diḵayu ḵinabaḻu we maḻpu ḵan Apu Jesus.

²⁴ Ay-ayatoḵ diḵayu losan mipagapu ḵan Jesu Kristu. Amen.