1 Corinthians 15 - Sa Ugud Apudyus

Sa Ummuliyan Kristu

¹ Susunudḵu ḵan Kristu, pioḵe ipaspasmoḵ Ambaḻu we Damag we sa iwwaḻagawagḵu ḵan diḵayu, sadi bos inawatyu ḵan lummamutan da pammatiyu.

² Ḵad sadi bos damage mataguwanyu nu popotpotanyu da pammatiyu nu tuttuwae mibatay pammatiyu si intuttuduḵ ḵan diḵayu.

³ Sa intuttuduḵ ḵan diḵayu, sadi amo ummunae ḵapatogane inigammuḵe natoy aḵ Kristu gapu'tta basuḻ taḵu we mibatay atte nigili ye Ugud Apudyus.

⁴ Nilibon ḵad ummuli si miḵaḵlu we aḻgawe mibatay os atte nigili ye Ugud Apudyus.

⁵ Nampaila ḵan Peter ya da nasawaḻan aḵ duwae apostol.

⁶ Pun nampaila bos atta lummabos aḵ limanggasute susunud taḵu ḵan Kristu atte namingsan. Sillaḻabi ḵad atte nagangput nampaila ḵan dida, nanḵaḵatoy da udum ḵan dida yaḵon ḵaaduwan ḵan dida da sissiyae matattagu.

⁷ Pun nampaila bos ḵan James woḵ asiyot os atta losane apostolna.

⁸ Anungusnapun, nampaila bos ḵan saḵon. Taḵon ay nu isuḵ uttinge nibuḵnage daampun yan aḻgawna.

⁹ Te saḵon ḵababaan atta apostol, ippun oḵyan ḵaḻabbongaḵe maawagan aḵ apostol te nampaḵaḻamoḵ da magimugimunge namati ḵan Apudyus.

¹⁰ Yaḵon gapu'tte ḵinabaḻun Apudyus ḵan saḵon, binaliwanaḵ atte nambalinaḵ sinsadi, daḵampun aḵ ippun nambanagana. Sa naḵwa, nadaldallu pawotḵu we nanḵewaaḻ nu da udume apostol. Yaḵon daḵampun aḵ ḵingwaḵ da sadi gapu'tte mismu we ḵosdoḻḵu yaḵon gapu'tte ḵinabaḻun Apudyus we anna ḵan saḵon.

¹¹ Pun taḵon ay nu saḵon nangiwaḻagawag ḵan diḵayu baḵon nu da udume apostol, ippun toḵon ni ituttuduni ye siya pinatiyu.

Sa Umuliyan Da Natoy

¹² Sinsadi, nu iwwaḻagawagni ḵan diḵayu we ummuli'ḵ Kristu, ngai inonae ḵanan da udum ḵan diḵayu we adipun umuli da natoy?

¹³ Awatna, nu adipun umuli da natoy, piona ḵanane adipun aḵ Kristu ummuli.

¹⁴ Ḵad nu adipun ummuli'ḵ Kristu, naippun anun ni iwwaḻagawagni ya naippun os anun ni amatiyanyu ḵan siya.

¹⁵ Ḵad daḵampun os aḵ abus sadi te nu adipun aḵ Kristu ummuli, antultulli ḵani si mipanggob ḵan Apudyus. Te intuttuduni ye tinagun Apudyus aḵ Kristu. Yaḵon nu adipun umuli da natoy, adimpun os Apudyus tinagu'ḵ Kristu.

¹⁶ Te nu adipun umuli da natoy, adipun os ummuli'ḵ Kristu.

¹⁷ Ḵad nu adipun ummuli'ḵ Kristu, naippun anun ni namatiyanyu ḵan siya ḵad sissiyae daampun mapakawan da basuḻyu.

¹⁸ Ḵad isun os da nanḵaḵatoye namati ḵan Kristu, nataḻaḵda.

¹⁹ Ḵad nu abus biyag si annae lubung aḵ namnamaon taḵu'ḵ anaguwan Kristu ḵan ditaḵu, ditaḵu paate ḵadagdagu'tta losane tagu.

²⁰ Yaḵon sa ḵatuttuwaan, tuttuwae ummuli'ḵ Kristu we siya ḵaunaane ummuli'tta losane natoy. Ḵad sadi amanoḵnoḵe losane amati ḵan siya, umulida.

²¹ Te matoy da losane tagu gapu'tte niyossaananda ḵan Adam, ḵad maḵwa bose umuli da losane tagu gapu'tte niyossaananda ḵan Kristu.

²² Losane tagu matoy gapu'tte niyossaananda ḵan Adam. Isuna bose umuli da matoy gapu'tte niyossaananda ḵan Kristu.

²³ Yaḵon nauḻnus da maḵwa: umuna umuli'ḵ Kristu ya nu dumatong aḻgawe mipauliyana, asiyot da losane nanḵaḵatoye namati midoga ḵan siya.

²⁴ Ḵad nu dumatong anungus da losan, oḻgon Kristu da losane pangat, ḵaḻabbongan ḵan ḵabooḻan ḵad ipuḻangna ampangatana ḵan Apudyus we Amana.

²⁵ Te ḵasapuḻane ampangat aḵ Kristu inggana'ḵ oḻgona da losane ḵabusuḻna.

²⁶ Ḵad sa ḵaanungusane ḵabusuḻe oḻgona, siya ḵatoy.

²⁷ Ḵad awad de nigili ye Ugud Apudyus atte awe ye ḵanana, “Impaipangat Apudyus da losane banage ḵingwana si annae lubung.” Ḵad nalawag ose daḵampun aḵ nidoga'ḵ Apudyus atta losane ipangatan Kristu te aḵ Apudyus nampaipangat ḵan Kristu atta ngaiman.

²⁸ Ḵad nu ipangatan Kristu da ngaiman, sadi timpu we ipuḻangna dida ḵan Apudyus we Amana ta ipangatana dida ḵad idogana bos long-agna paipangat ḵan Amana te siya ḵangatuwane angipangat atta losan.

²⁹ Sosomḵon taḵu ḵasin mataguwan da natoy. Nu daḵampun aḵ tuttuwae taguwon Apudyus da natoy, ngai anun ni nabonyagan da udum para'tta buḻundae natoy? Ngaipada bos mabonyagan mipagapu'tta natoy?

³⁰ Ḵad ḵan diḵani, nu adipun umuli da matoy, ngai anun ni anḵatoyanni ye antuttudu?

³¹ Susunud ḵan Kristu, tuttuwae sasaggungoḵ ḵatoy si inaḻgaw. Ibagaḵ sana te isḵaḻḵu niyossaananyu ḵan Jesu Kristu we Apu taḵu.

³² Nu daḵampun aḵ umuli da natoy, ngai gay lawa maganabḵu we sumangu'tta ḵumane tagu we isuḵ nin maḵapatoy atta ḵumane ayam sina'd Ephesus? Nu daḵampun aḵ umuli da natoy, adi un-unnoyna unudoḵ uuggudone ḵanana, “Angaangan taḵu ya uminuinum taḵu te appigat matoy taḵu.”

³³ Yaḵon adi ḵayu maallelaw atta ḵassadi te tinutuli. Ḵad tuttuwa ḵanandae, “Nu maḵabuḻbuḻun taḵu'tta tagu, maalisan taḵu'tta maḵadadaile ugalida.”

³⁴ Pabaḻuwonyu ḵappos da somsomoḵyu ta iwaḻangyu we bumasuḻ. Te awad da udum ḵan diḵayu we ippun igammuda ḵan Apudyus. Ibagaḵ anna ta mabainan ḵayu.

Sa Mipanggob Si Long-ag Nu Umuli

³⁵ Yaḵon awad da sissiyae ḵanandae angimus, “Ngai inon da natoye umuli? Ḵad ngai bos isun ni ḵatollongan da long-agda nu umulida?”

³⁶ Sa tagu we ḵaḵnat imusna, dong-og! Te nu ibunubun ni tagu buḵoḻ, adipun tumubu nu adi matoy umuna.

³⁷ Ḵad sa sadi ye nibunubune buḵoḻ, daḵampun si dummaḵoḻe muḻa yaḵon sa pagoy baḵon nu sa buḵoḻ ni de wheat.

³⁸ Yaḵon simsimmoḵ Apudyus nu ngai kalasin ni muḻae dumaḵoḻ atta losane kalasin da buḵoḻ. Pun da nankalakalasi ye buḵoḻe nimuḻa, nankalakalasi bos ḵatollonganda nu dumaḵoḻda.

³⁹ Te daḵampun aḵ an-iisu long-ag, sabali long-ag da tagu'tta long-ag da ayam ya da sissiwit ḵan da ugadiw.

⁴⁰ Isuna bos da ḵingwan Apudyus we awad ad langit ya da awad sina'd lutae daḵampun os aḵ an-iisuda te sa ḵinabaḻun da awad ad langit nisabali si ḵinabaḻun da awad sina'd luta.

⁴¹ Isun os ni init ya sa soḻag, nansabali ḵinabaḻuda, da bituwon os nansabasabali ḵinabaḻuda.

⁴² Ḵatti bos isun ni umuliyan taḵu. Nu matoy taḵu, milibon long-ag taḵu ya maḻpos yaḵon nu umuli taḵu adipun ogon matoy.

⁴³ Ḵad sa long-ag taḵu we milibon, lawweng ḵatollongana ḵan naippun ḵabooḻana. Yaḵon sa long-age taguwon Apudyus ḵasin, nabaḻbaḻu ya anna ḵabooḻana.

⁴⁴ Sa long-age milibon, sanat nainlubungane long-ag. Yaḵon nu taguwon Apudyus ḵasin, sanat naispirituwane long-ag. Te nu awad nainlubungan aḵ long-ag, awad os naispirituwane long-ag.

⁴⁵ Te sa nigili ye Ugud Apudyus ḵanana, “Sa ummunae tagu we aḵ Adam, innattan Apudyus aḵ biyag,” yaḵon aḵ Jesu Kristu we maawagan aḵ naudi ye Adam, siya Ispiritu we angitod si naispirituwane biyage ippun anungusna.

⁴⁶ Daḵampun atte naispirituwane long-ag ummuna yaḵon sa long-age nainlubungan ḵad asiyot naispirituwan.

⁴⁷ Sa ummunae tagu iluta te luta naḻpuwana. Yaḵon sa naudi ye tagu ad langit naḻpuwana.

⁴⁸ Ḵad gapu ta luta naḻpuwan ni ummunae tagu, isuna bose luta long-ag da losane tagu. Yaḵon da losane amati ḵan Kristu we naḻpu'd langit, miyisu long-agda ḵan siya'tte umali ye aḻgaw.

⁴⁹ Sinsadi, miyisu ḵatollongan ni long-ag taḵu'tte ḵatollongan ni long-ag ni tagu we naḻpu'tte luta, ḵatti bose sa umali ye aḻgaw, miyisu ḵatollongan ni long-ag taḵu'tte long-ag Jesu Kristu we naḻpu'd langit.

⁵⁰ Susunudḵu ḵan Kristu, annaya pioḵ ibaga ḵan diḵayu. Sa long-ag taḵu ḵan daḻa taḵu, adidapun gangganason da laḵsunda si midog-anda si ampangatan Apudyus te da long-ag taḵu madadail, adidapun maḵwae midoga'tte igaw da losane matagu'ḵ inggana.

⁵¹ Dongngonyu, ibagaḵ ḵan diḵayu annae planun Apudyus we adipun nipaigammu'tta tagu inggana sinsadi. Ditaḵu we namati, daḵampun aḵ losan taḵu matoy yaḵon sin-aḵitan mapasantan da long-ag taḵu'tte baru we long-ag.

⁵² Angganase maḵwa sanae isun di sinḵispayan, nu guminga maudi ye tangguyub Apudyus ya umuli da nanḵaḵatoye namati ya mapasantan da long-agda, adidapun paat matoy. Ḵad ditaḵu we matattagu, mapasantan os da long-ag taḵu'tte baru,

⁵³ te sa long-ag taḵu we maḻpos ḵasapuḻane mapasantan atte long-age adipun maḻpos. Ḵad sa long-ag taḵu we matoy ḵasapuḻane mapasantan si long-age adipun paat matoy.

⁵⁴ Nu ḵatti ye maḵwae mapasantan long-ag taḵu we maḻpos atte long-age adipun maḻpos, sa long-ag taḵu we matoy mapasantan atte annanayune adipun matoy. Ḵad sadi mituttuwaan ni nigili ye Ugud Apudyus we ḵanana, “Naippun ogon ḵabooḻan ni ḵatoy te naabaḵ.”

⁵⁵ Ḵad ḵanan os Apudyus, “Siḵa ḵatoy, naippun ogon angngogam ḵad siḵa ḵatoy dimman ḵabooḻame amaḵaḻam?”

⁵⁶ Te sa angaḻ-an ni ḵatoy si ḵabooḻana, sa bumasubasuḻan taḵu ya sa angaḻ-an ni basuḻ atte ḵabooḻana, sa aditaḵupun anuttuwaan si lintoge innatod Apudyus ḵan Moses.

⁵⁷ Yaḵon anggappiya taḵu ḵan Apudyus we angitod si angngogan taḵu mipagapu ḵan Jesu Kristu we Apu taḵu.

⁵⁸ Pun susunudḵu ḵan Kristu we ay-ayatoḵ, popotpotanyu da pammatiyu ya adi oḵyan magitot. Ḵad ipapatiyu bose angwa'tta ngaimane pinion Apudyus paḵwa ḵan diḵayu te igammu taḵu we losane ḵoon taḵu we para ḵan siya adipun matangga.