1 Corinthians 14 - Sa Ugud Apudyus

Sa Mipanggob Atta Ḵabooḻane Itton Ni Ispiritu Santu

¹ Ipapatiyu we an-asiayat. Ḵad ipapatiyu oḵyan sington da ampapatoge ḵabooḻane itton ni Ispiritu Santu, amod ay ḵabooḻane angipaigammu'tte pinion Apudyus.

² Te da an-ugud atte sabali ye ugude adidapun inadaḻ, abus aḵ Apudyus aḵ maḵaugudanda. Te sa paugud ni Ispiritu Santu ḵan dida, sa banage nilimode naippun maḵaawat.

³ Yaḵon sa tagu we angibaga'tte pinion Apudyus we mipaigammu ta papigsaona pammatin da udum, soḻgagona ḵan liwliwaona dida.

⁴ Sa tagu we an-ugud atte sabali ye ugud, sa pammatinae mismu pumigsa. Yaḵon sa tagu we angibaga'tte pinion Apudyus we ipaigammu, siya papigsaona pammatin da namati ye magimugimung.

⁵ Pioḵ oḵyan nu losan ḵayu nalainge an-ugud atta nansabasabali ye ugud yaḵon amo pipioḵ nu awad ḵabooḻanyu losane angipaigammu'tta losane gimung si pinion Apudyus. Te amo bumadang tagu we angipaigammu'tta pinion Apudyus nu sa an-ugud atta nansabasabali ye ugud. Malaksid nu awad angipaḵaawat ta masoḻgagan da losane namati.

⁶ Sinsadi susunudḵu ḵan Kristu nu umaliyaḵ ḵan diḵayu, ngai maganabyu nu an-ugudaḵ atte sabali ye ugude adiyupun maawatan? Awad ḵamman itaḵip ni umaliyaḵ ḵan diḵayu nu ḵatti? Malaksid nu ibagaḵ ḵan diḵayu impailan Apudyus ḵan saḵon baḵon nu ituttuduḵ ḵan diḵayu da banage impaḵaawatna ya ipaigammuḵ da impaigammuna baḵon nu ituttuduḵ ḵan diḵayu da udume igammuḵe ugudna.

⁷ Isun ni baladong baḵon nu ḵullitong. Nu adipun ustu inon taḵu we amaginga, lamog ḵamman da tagu imatunan ustu we ayugna?

⁸ Ḵad isuna bos tangguyube sinyal ni awad gubat. Nu babaḻangondae amaginga, ngai inon da suḻdadu we ansaganae umoy maḵagubat nu adidapun naawatan?

⁹ Ḵad isuna bos diḵayu nu an-ugud ḵayu'tte sabali ye ugude adimpun da tagu maawatan, ippun inondae angigammu'tte pionyu ibaga ḵad isun ay di maḵaug-uggud ḵayu si bibbid.

¹⁰ Aduadu nansabasabali ye ugud si annae lubung ḵad losane awad da pionda ugudon.

¹¹ Yaḵon nu adiḵpun lamog maawatan ugudon ni ḵaug-uggudḵu, ibelangḵu we ḵaili ya ibelangna bos saḵon aḵ ḵaili.

¹² Gapu ta pipionyu we maittan atte ḵabooḻane maḻpu si Ispiritu Santu, amo iggayu ḵabooḻanyu we amapigsa'tta pammatin da buḻunyu we namati ye magimugimung.

¹³ Pun sa tagu we awad de ḵabooḻanae an-ugud atte sabali ye ugude adinapun inadaḻ, iluwaḻuna oḵyan ḵan Apudyus ta ittona bos ḵabooḻanae angipaḵaawat.

¹⁴ Te nu alluwaḻuwaḵ atte ugude sabali, sa ispirituḵ alluwaḻu yaḵon adiḵpun maawatan ugudoḵ.

¹⁵ Ngai ḵad ain ḵooḵ nu? Alluwaḻuwaḵ atte ipaspasmoḵ ni Ispiritu Santu we maawatan ni somsomoḵḵu. Ḵad anḵantaaḵ atta naispirituwane ḵanḵanta ya anḵantaaḵ os atta ḵanḵantae maawatan ni somsomoḵḵu.

¹⁶ Ḵad nu alluwaḻu ḵan anggappiya somsomoḵḵu ḵan Apudyus we adipun maawatan, ngai inon da udume sumongbat atte “Amen” nu adida maawatan ugudoḵ?

¹⁷ Te taḵon ay nu ambaḻu da ibagayu we anggappiya ḵan Apudyus yaḵon nu adipun maawatan, adipun bumadang atta udume tagu.

¹⁸ Anggappiyaaḵ te amo ḵabooḻaḵe an-ugud atta sabali ye ugud nu diḵayu losan.

¹⁹ Yaḵon nu maḵagimungaḵ atta udume namati, un-unnoyoḵ abuse limae ugud ibagaḵe maawatanda si antuttuduwaḵ nu sa an-ugudaḵ aḵ simpuḻullibu we ugude adidapun maawatan.

²⁰ Susunudḵu ḵan Kristu, daḵampun oḵyan aḵ inaabbeng ansosomsomoḵyu. Yaḵon isuyu oḵyan uttinge ippun igammuna si lawweng ya sa mipanggob ḵan Apudyus, isuyu oḵyan ansosomsomoḵ ni naangsan.

²¹ Nu mipanggob si mausaran ni sabali ye ugude adipun maawatan, awad de nigili ye Ugud Apudyus we ḵanana, “Imbuunḵu da tagu we nansabasabali uguddae umoy angibaga'tta taguḵ atte pioḵ paibaga yaḵon adidapun os dongngon saḵon.”

²² Pun sa ugude sabali ye adipun maawatan, daḵampun aḵ sinyal para'tta namati yaḵon para'tta adipun namati. Yaḵon sa ḵabooḻane angipaigammu si Ugud Apudyus we piona ipaigammu para'tta namati, daḵampun aḵ para'tta adipun namati.

²³ Pun nu losan da namati ye magimugimung an-ugud atte ugude nansabasabali ye adipun maawatan ya awad adipun namati'ḵ nidoga, adidapun ḵamman ḵanane anḵatingang ḵayu?

²⁴ Yaḵon nu siya ugudonyu da impaigammun Apudyus ḵan diḵayu ya awad adipun namati'ḵ maḵagimung ḵan diḵayu, sadi angigammuwanae siya ḵad ḵabasbassuḻan gapu'tta ibagayu ya sa ḵatuttuwaan. Ḵad maḵwae ḵuwisona long-agnae mibatay atta dingngoḻna.

²⁵ Ḵad nu mitoḵwaḻ da losane mitataḻu'tte somsomoḵna, sadi asina analluḵuwane ambabawi'tta basuḻna ḵad siya dayawona'ḵ Apudyus we ḵanana, “Tuttuwae awad aḵ Apudyus ḵan diḵayu.”

Sa Uḻnus Si Andayawan Ḵan Apudyus

²⁶ Susunudḵu ḵan Kristu, nu magimung ḵayu we andayaw ḵan Apudyus, awad oḵyan anḵanta ya awad os angituttudu'tte Ugud Apudyus ya awad os angibaga'tta ngaimane impaigammun Apudyus ḵan siya. Ḵad awad os an-ugud atte sabali ye ugude adinapun inadaḻ ya awad oḵyan angipaḵaawat atta inugudna. Yaḵon ilanyu ta da sanae ḵoonyu, ambanag atte pumigsaan da pammatiyu losan.

²⁷ Nu awad an-ugud si sabali ye ugude adinapun inadaḻ, duwa baḵon nu abuse tuḻu oḵyan da an-ugud. Ḵad ampasapasanida oḵyan. Ḵad ḵasapuḻan ose awad osa'ḵ angipaḵaawat si inugudda.

²⁸ Yaḵon nu naippun angigammu we angipaḵaawat, giginnoḵda oḵyan atte gimung. Ḵad didae mismu maḵaugud ḵan Apudyus.

²⁹ Awad oḵyan duwa baḵon nu tuḻu we tagu'ḵ an-ugud atta pinion Apudyus ipaigammu. Ḵad da udum ḵan dida angusig nu tuttuwae naḻpu ḵan Apudyus da ngaimane ugudonda.

³⁰ Ḵad nu awad an-uguugud ya awad pinion Apudyus aḵ ipaigammun ni osa, ḵasapuḻane guminoḵ sadi ye ummuna nan-ugud ya nipasani sadi ye osa.

³¹ Ḵatti ḵoonyu we ampasapasani ḵayu ta losan taḵu an-adaḻ ya losan taḵu masoḻgag.

³² Ḵad sa naittan atte ḵabooḻane angipaigammu'tta pinion Apudyus, lamognae anupod atte long-agna.

³³ Te aḵ Apudyus, daḵampun aḵ piona magulu taḵu we namati yaḵon pionae nauḻnus taḵu. Isun ni maḵmaḵwa'tta losane gimung da tagun Apudyus,

³⁴ da bubai ḵad gumiginnoḵda oḵyan atta gimung da namati. Te adipun miyunud da bubai ye an-ugud yaḵon paiturayda oḵyan atta laḻaḵi te sadi nigili ye lintog.

³⁵ Nu awad pionda igammuwon, asida oḵyan atta boḻoyda imuson atta asawada te ḵababbain bubai ye an-ugud atte sinagung da gimung da namati.

³⁶ Ḵananyu ḵammane diḵayu naḻpuwan ni Ugud Apudyus baḵon nu abus ḵayu'ḵ niduumana?

³⁷ Pun nu awad osa ḵan diḵayu'ḵ ḵananae naittan aḵ ḵabooḻane angipaigammu si pinion Apudyus baḵon nu awad ḵabooḻana'ḵ innatod ni Ispiritu Santu, ḵasapuḻane bigbigona annae insuḻatḵu ḵan diḵayu we imbilin Apu.

³⁸ Yaḵon nu awad adipun amigbig atta anna, adiyu bos bigbigon.

³⁹ Pun susunudḵu ḵan Kristu, ipapatiyu oḵyan ḵabooḻane angipaigammu'tta pinion Apudyus, ḵad adiyu bos iyadi da an-ugud atte sabali ye ugude adidapun inadaḻ.

⁴⁰ Yaḵon ilanyu bos ta losane ḵoonyu, ustuustu ḵan nauḻnus.