1 Corinthians 13 - Sa Ugud Apudyus

Sa Ayat Ḵapatogan

¹ Taḵon ay nu awad ḵabooḻaḵe an-ugud atta ngaimane ugud di tagu ya taḵon ay ugud os da anghel nu naippun ayatḵu'tta asintataguḵ, naippun anuna. Mipaniyaḵ atte gangsae umas-aseset baḵon nu da udume ḵumaḻangḵang gingada.

² Ḵad taḵon ay nu awad ḵabooḻaḵe angibaga'tte ipaigammun Apudyus baḵon nu awad ḵabooḻaḵe maawatan da losane ḵinatuttuwaane nilimod ḵan taḵon ay nu igammuḵ da losane maḵwae maigammu ya taḵon ay nu ampigsa pammatiḵe lamogḵu an-atunon beleg yaḵon nu naippun ayatḵu'tta asintataguḵ, naippun anuḵ.

³ Ḵad taḵon ay nu ittoḵ losan da ḵuḵuwaḵ atta ḵapus ya idatunḵu long-agḵu ta siya isḵaḻḵu nu naippun ayatḵu'tta asintataguḵ, naippun paat maganabḵu.

⁴ Sa tagu we angayat atta asintataguna, naanus ya bumabbadang atta udum. Adipun maapos ya adipun os napasindayaw baḵon nu ansoḵaḻ,

⁵ adipun angwa'tta ḵababbain baḵon nu ipasulinna piona. Ḵad adipun os allasu sumang-ana ya adinapun os sosomḵon lawwenge ḵingwan da udum ḵan siya.

⁶ Sa tagu we angayat atta asintataguna, adipun allaylayad atta basuḻ yaḵon allaylayad nu angngog ḵatuttuwaan.

⁷ Sa tagu we angayat atta asintataguna, pagatupanae angayat taḵon ay nu awad da ampaḵaḻaman baḵon nu maḵabasuḻ da udum ḵan siya. Ḵad pagatupanae amati ya annamnama.

⁸ Da ḵabooḻane ampadtu ampatinggada. Da ḵabooḻane an-ugud atta nansabasabali ye ugud ampatinggada. Ḵad da ḵabooḻane maḵaawat atta losane maḵwae maigammu ampatinggada bos. Yaḵon sa ayat ippun patinggana.

⁹ Te sa igammu taḵu mipanggob ḵan Apudyus sinsana ya sa ḵabooḻan taḵu we ampadtu kurang.

¹⁰ Yaḵon nu dumatong timpu we wadawad da losan, da losane ḵabooḻane angkurang, ampatinggada.

¹¹ Isun ni ḵaban-ogḵu, isun di abeng an-uugudḵu ya ansosomsomoḵḵu ya an-aawatḵu. Sinsadi ye naangsanaḵ, iyyagayḵu'tta inaabbenge ugali.

¹² Isuna ḵan ditaḵu we namati te sa antotollong taḵu ḵan Apudyus sinsana an-ugabbae isun di alladawan si an-ugabbae ladawan. Yaḵon sa umali ye timpu ilan taḵu we mismu. Sinsana aḵit igammu taḵu ḵan siya yaḵon sa umali ye timpu igammuwon taḵu losan mipanggob ḵan siyae isun ni nangigammuwana mipanggob ḵan ditaḵu.

¹³ Pun sana da tuḻu we iinggaw aḵ inggana: sa pammati, namnama ya sa ayat. Yaḵon sa ḵapatogan atta anna ayat.