1 Corinthians 12 - Sa Ugud Apudyus

Sa Ḵabooḻane Itton Ni Ispiritu Santu

¹ Sinsadi susunudḵu ḵan Kristu, pioḵe ipaḵaawat ḵan diḵayu mipanggob atta ḵabooḻane itton ni Ispiritu Santu ḵan ditaḵu ta igammuwonyu oḵyan.

² Sa timpu we daanyu amatiyan, iniiggammuyu we naallelaw ḵayu te dinaydayawyu da sinan-apudyus we naumoḻ gapu'tta nangilugut ḵan diḵayu.

³ Pun pioḵe maawatanyu we sa tagu we idaḻan ni Ispiritu Santu adipun an-aḻawag mipanggob ḵan Jesus. Ḵad naippun os tagu'ḵ ḵananae angibaga, “Aḵ Jesus siya Apu,” nu adin ni Ispiritu Santu idaḻan.

⁴ Sinsadi awad da nansabasabali ye ḵabooḻane naatod ḵan ditaḵu yaḵon ossaan naḻpuwandae sa Ispiritu Santu.

⁵ Nansabasabali inon taḵu we anserbi yaḵon ossaan anserbiyan taḵu we aḵ Apu.

⁶ Ḵad nansabasabali ḵewaaḻe innatod Apudyus ḵan ditaḵu yaḵon ossaan aḵ Apudyus we nangitod si ḵabooḻan ni sin-ossaossa ḵan ditaḵu.

⁷ Naatod ḵabooḻan ni sin-ossaossa ta angipaila si annaan ni Ispiritu Santu ḵan ditaḵu we namati ta bumaḻuwan da losan.

⁸ Sa osae namati, ittan ni Ispiritu Santu aḵ lainge angipaigammu si Ugud Apudyus. Ḵad sa osa, ittana'ḵ ḵabooḻane maḵaawat mipanggob ḵan Apudyus.

⁹ Ḵad sa osa, ittan ni sanae Ispiritu aḵ ampigsae pammati ḵad sa osa, ittan os ni Ispiritu aḵ ḵabooḻane angaan atta saḵit.

¹⁰ Ḵad da udum, naittanda'ḵ ḵabooḻane angwa'tta nakaskasdaaw ya da udum naittanda'ḵ ḵabooḻane angipaigammu'tta ngaimane pinion Apudyus ipaigammu. Ḵad awad os da naittan aḵ ḵabooḻane angimatun nu aḵ Apudyus naḻpuwan da ngaimane ḵabooḻan baḵon nu naḻpu'tta aḻan. Ḵad da udum, naittanda'ḵ ḵabooḻane an-ugud atte sabali ye ugude adidapun inadaḻ. Ḵad naittan os da udum aḵ ḵabooḻane angipaḵaawat atta pion ni ugud ḵanan.

¹¹ Losan da sanae ḵabooḻan, ossaan naḻpuwandae sa Ispiritu Santu. Ittana sin-ossaossae namati sigun si piona.

Da Adu We Ḵamangay Ni Ossaane Long-ag

¹² Sa long-ag taḵu we tagu adu ḵamangayna yaḵon ossaane long-ag. Isuna bos aḵ Kristu ya ditaḵu we namati ḵan siya.

¹³ Losan taḵu we namati, Judyu baḵon nu Gentil, musassu baḵon nu daḵampun, nabonyagan taḵu we ossaane long-ag mipagapu'tte ossaane Ispiritu Santu ya sa sanae Ispiritu, siya inawat taḵu we losan.

¹⁴ Te sa long-ag, daḵampun aḵ ossaan ḵamangayna yaḵon adu.

¹⁵ Awatna nu ḵanan ni suḵi, “Gapu ta daḵanaḵpun aḵ ima, daḵanaḵpun aḵ ḵamangay ni long-ag.” Yaḵon sissiyae ḵamangay ni long-ag taḵon ay nu ḵananae daḵampun aḵ ḵamangayna.

¹⁶ Ḵad nu ḵanan ni inga, “Gapu ta daḵanaḵpun aḵ ata, daḵanaḵpun aḵ ḵamangay ni long-ag.” Yaḵon sissiyae ḵamangay ni long-age isun ni ata.

¹⁷ Nu abuse ata long-ag, ngai andongoḻ nu? Ḵad nu abuse inga long-ag, ngai ansungsung nu?

¹⁸ Yaḵon sa ḵatuttuwaan, iyyuḻnus Apudyus losane ḵamangay ni long-ag sigun atte piona.

¹⁹ Nu ossaan ḵamangay ni long-ag, ngai inonae maḵwa'ḵ long-ag?

²⁰ Yaḵon sa ḵatuttuwaan, adu ḵamangayna yaḵon ossaane long-ag.

²¹ Pun adipun maḵwae ḵanan ni ata atte ima, “Daḵampun aḵ ḵasapuḻaḵ siḵa.” Baḵon nu sa uḻu, adipun maḵwa ḵanana'tte suḵi, “Daḵampun aḵ ḵasapuḻaḵ siḵa.”

²² On adipun maḵwae ibagada ḵaḵnat nu adi da ḵamangay ni long-age ibelang taḵu we anḵuya, dida da ḵasasappuḻan taḵu.

²³ Ḵad da ḵamangay ni long-age ibelang taḵu we ippun patogda, sanat da patpatgon taḵu ayyuwanan ḵad da ḵamangaynae adi oḵyan mibuḵsag, umman taḵu silupan ta matalingdan.

²⁴ Ḵad da ḵamangay ni long-age ambaḻu ḵail-ana, daḵampun aḵ ḵasapuḻane matalingdan. Yaḵon aḵ Apudyus, iyyuḻnusna da losane ḵamangay ni long-ag ta da ḵamangaynae ippun patogda, dida da amo ayyuwanan ya patgan taḵu we ustu,

²⁵ ta adi an-asisullagi da ḵamangay ni long-ag nu adi an-asiayyuwanda.

²⁶ Pun nu awad ansigab si osae ḵamangay ni long-ag, giḵnaon da losane ḵamangay ni long-ag. Ḵad nu madayaw osa, maḵalaylayad da losan.

²⁷ Ditaḵu we namati, nipani taḵu si long-ag Kristu. Pun sa sin-ossaossa ḵan ditaḵu ḵamangay ni long-agna.

²⁸ Ḵad da dinutuḵan Apudyus atte gimung da namati, ummuna da apostol, ḵumagwa da profeta we an-uuggudona, ḵumaḵlu da angituttudu'tte ugudna, asiyot da angwa'tta nakaskasdaaw, da naittan aḵ ḵabooḻane angaan atta saḵit. Awad os da naittan aḵ ḵabooḻane bumadang ya da naittan aḵ ḵabooḻane angipangpangu'tta namati. Ḵad awad os da naittan aḵ ḵabooḻane an-ugud atta nansabasabali ye ugude adidapun inadaḻ.

²⁹ Daḵampun ay aḵ losane namati losanda apostol baḵon nu profeta, angituttudu, baḵon nu anna ḵabooḻanae angwa'tta nakaskasdaaw.

³⁰ Baḵon nu losanda naittan aḵ ḵabooḻane angaan atta saḵit, an-ugud atta nansabasabali ye ugude adidapun inadaḻ baḵon nu angipaḵaawat atta pion ni sadi ye ugud ḵanan.

³¹ Pun siya oḵyan amaamayonyu da ampapatoge ḵabooḻane itton ni Ispiritu Santu. Ḵad ipaigammuḵ ḵan diḵayu amo napatpatog ḵan nabaḻbaḻu we daḻan.