1 Corinthians 11 - Sa Ugud Apudyus

¹ Unudonyu saḵone isun ni angunudaḵ ḵan Kristu.

Sa An-abbungan Da Bubai

² Idayawḵu diḵayu te pasigyu saḵon isisimoḵ atta losane ḵoonyu ḵad pagatupanyu unudon da tuttudu we intuttuduḵ ḵan diḵayu.

³ Yaḵon awad os osae pioḵe maawatanyu we aḵ Kristu isun di uḻun da losane laḻaḵi ḵad sa laḻaḵi isun di uḻun ni asawana. Ḵad aḵ Apudyus siya isun di uḻun Kristu.

⁴ Nu magimung ḵayu ya awad laḻaḵi'ḵ inabbungana uḻunae alluwaḻu baḵon nu angipaigammu'tte Ugud Apudyus, imbabbainna'ḵ Kristu we Apuna.

⁵ Yaḵon nu alluwaḻu bubai baḵon nu ipaigammuna Ugud Apudyus, ḵasapuḻane maabbungan uḻuna. Te nu adina, pabainana asawanae laḻaḵi ḵad isun ay di impapuluḵna uḻuna.

⁶ Te nu adimpun ni bubai abbungan uḻuna, ampapuluḵ oḵyan. Yaḵon gapu ta mabaine ampapuluḵ bubai, ḵasapuḻane an-abbung.

⁷ Yaḵon sa laḻaḵi, adipun oḵyan an-abbung si andayawana ḵan Apudyus te siya angipaila si ḵais-isu ḵan ḵinadayaw Apudyus. Yaḵon sa bubai, siya angipaila si ḵaḻabbongan ni laḻaḵi.

⁸ Te sa laḻaḵi daḵampun aḵ naḻpu si bubai yaḵon sa bubai naḻpu si laḻaḵi.

⁹ Ḵad daḵampun os aḵ ḵingwan Apudyus laḻaḵi'ḵ para si bubai yaḵon ḵingwana bubai'ḵ para si laḻaḵi.

¹⁰ Pun gapu'tta anghel, an-abbung oḵyan bubai ta ipailana ḵaḻabbongan ni laḻaḵi.

¹¹ Yaḵon sosomḵonyu we gapu'tte niyossaanan taḵu ḵan Apu, sa bubai ḵasapuḻana laḻaḵi ḵad sa laḻaḵi ḵasapuḻana bubai.

¹² Te taḵon ay nu sa laḻaḵi naḻpuwan ni ummunae bubai, sinsana sa bubai angiyanaḵ si laḻaḵi. Yaḵon aḵ Apudyus maḻpuwan da losan.

¹³ Diḵayu ud anomsomoḵ nu ustu ḵamman adi an-abbung bubai nu alluwaḻu ḵan Apudyus atte magimung ḵayu?

¹⁴ Ḵad gagangay atte ugalin da tagu we ḵababbain nu andu buuḵ ni laḻaḵi.

¹⁵ Yaḵon nu andu buuḵ ni bubai, siya dayawna te innatod Apudyus buuḵna ta ambalin aḵ isun di abbungna.

¹⁶ Yaḵon nu awad sumullagi si annae imbagaḵ, ibagaḵ ḵan diḵayu we ippun ugali taḵu'ḵ ḵaḵnat, taḵon ay da gimung da namati ḵan Apudyus.

Sa Angiḵagasmoḵan Si Natoyan Jesu Kristu

¹⁷ Nu mipanggob atta ibilinḵu ḵan diḵayu, adiḵpun dayawon diḵayu te sa magimugimunganyu, daḵampun aḵ ambanag si bumaḻuwanyu yaḵon sa lumawenganyu.

¹⁸ Umunae gapuna, dingngoḻḵu we nu magimung ḵayu we andayaw ḵan Apudyus, andaddasig ḵayu. Ḵad isun ay di an-agagaḵ os amati ye tuttuwa.

¹⁹ Te ḵasapuḻan daddasig ḵan diḵayu ta mimatunan da gattoḵ da pammatida.

²⁰ Sa magimunganyu we angan atte angiḵagasmoḵanyu si natoyan Apu Jesu Kristu, daḵampun ḵan siya sosomḵonyu,

²¹ te sa angananyu, adiḵayupun an-asiuway, awad da udume unaonda ḵanon da dinaanda. Ḵad mauḻat da udum ya naabus nabartek da udum.

²² Ngaipayu ḵoon ḵaḵnat? Ippun ḵamman boḻoyyu'ḵ angananyu ḵan uminumanyu? Amsewonyu ḵamman da magimugimunge namati ḵan Apudyus ya ibabbainyu da ippun mabalinda? Ngai namnamaonyu we ibagaḵ ḵan diḵayu mipanggob si anna? Idayawḵu diḵayu? Naid, adipun maḵwa!

Sa Anungus Ni Naḵaḵanan Jesus Atta Disipuluna

²³ Te inawatḵu ḵan Apu Jesus da losane intuttuduḵ ḵan diḵayu. Nanganda ḵad si labi ye nituyuḵana, innaḻana tinapay

²⁴ woḵ nanggappiya ḵan Apudyus. Binisbisaḵna woḵ ḵanana, “Annaya long-agḵu we midatun para ḵan diḵayu. Pasigyu ḵoon ḵaḵna ta angiḵagasmoḵanyu ḵan saḵon.”

²⁵ Nagangputda ḵade nangan, innaḻana bos sintasae bayase grape woḵ ḵanana, “Sa annae natasae bayas, siya Baru we Tuḻag Apudyus atta taguna. Ḵad sa daḻaḵ, siya amanoḵnoḵ atte sadi ye tuḻag. Ḵad nu inumonyu, pasigyu ḵoon ḵaḵna ta angiḵagasmoḵanyu ḵan saḵon.”

²⁶ Sa timpu we angan ḵayu si tinapay ḵan uminum ḵayu si bayas, ipaigammuyu natoyan Apu inggana'ḵ angulinana.

²⁷ Pun ngaimane angan baḵon nu uminum atte natasae bayas ya adinapun somsomḵon ustu we ḵausarana, maḵabasuḻ ḵan Apu te inamsewna long-agna ḵan daḻana.

²⁸ Yaḵon awad osa ya umunae usigona oḵyan long-agna ḵad asiyot maḵwae angan atte tinapay ḵan uminum si bayas si angiḵagasmoḵana'tte natoyan Jesu Kristu.

²⁹ Te nu maḵaḵan ya maḵainume adinapun maawatan nu ngai pion ni long-ag Kristu ḵanan ya sa ḵapatogna, madusa gapu'tte ḵingwana.

³⁰ Sadi gapunae adu da anḵuya ḵan nasaḵit ḵan diḵayu ḵad siya bos natoyan da udum.

³¹ Yaḵon nu unaon taḵu usigon da long-ag taḵu we ustu adimpun Apudyus ditaḵu dusaon.

³² Yaḵon nu dusaon Apudyus ditaḵu, madisiplina taḵu ta adi taḵu midoga si dusan da tagu we adipun amati.

³³ Pun susunudḵu ḵan Kristu, nu magimung ḵayu we angan si angiḵagasmoḵanyu si natoyan Apu Jesus, an-asiuway ḵayu.

³⁴ Ḵad nu awad nauḻat, umuna oḵyane angan atte boḻoyna ta magimung ḵayu ḵad adin diḵayu ḵan Apudyus ḵuwison. Ḵad sa mipanggob atta udume ibilinḵu ḵan diḵayu, asiḵ ibaga nu umaliyaḵ sinat.