1 Corinthians 10 - Sa Ugud Apudyus

Sa Ḵinaḻaweng Ni Andayaw Atta Sinan-apudyus

¹ Susunudḵu ḵan Kristu, pioḵe paiḵagasmoḵ ḵan diḵayu naḵwa'tta danaḵḵoḻ taḵu'tte awe atte nangipuyutan Moses ḵan dida si nanenanda'd Egypt. Sa sadi ye timpu, inalidungan Apudyus dida losan si libuu we nangipuyut ḵan dida woḵ nanaddaḻanda si Dilaage Baybay.

² Ḵad da danaḵḵoḻ taḵu, isun di nabonyagandae niyossaan ḵan Moses te binigbigdae siya pangatda si naalidunganda'tte libuu ya sa nanaddaḻananda si baybay.

³ Ḵad losanda nangan atte naispirituwane maḵane innatod Apudyus,

⁴ ḵan losanda umminum atte naispirituwane danume naḻpu si naispirituwane batu. Sa sanae batu siya'ḵ Kristu te tuttuwae inninggaw ḵan dida.

⁵ Yaḵon taḵon ay nu ḵatti ye binadangan Apudyus dida, adipun nas-om atta ḵaaduwan ḵan dida, pun sadi gapun ni nanusaana ḵan dida woḵ nanḵulitagtagona da ladagda'tte bumbummaaw.

⁶ Ḵad losan atta sanae naḵwa, an-adaḻan taḵu oḵyan ta adi taḵu maawis atta isun da danaḵḵoḻ taḵu'tte awe.

⁷ Ḵad adi taḵu andayaw atta sinan-apudyus we isun ni ḵingwan da udum ḵan dida. Te sa ḵanan ni nigili, “Tummutuḵdudae nanganangan ya umminuinum, maabus ḵad summisiḵaddae nanggangganase isun da tagu we ippun pammatida ḵan Apudyus”

⁸ Adi taḵu bos ḵoon isun ni ḵingwan da udum ḵan didae adaḻugonda da daḵampun aḵ asawada. Siya gapunae nanḵaḵatoy da duwampuḻu ya tuḻu we libu'tte sin-aḻgawan.

⁹ Adi taḵu bos pappadason aḵ Kristu we isun ni ḵingwan da udum ḵan dida woḵ nanḵaḵatoyda gapu'tte ḵotob da uḻog.

¹⁰ Ḵad adi taḵu bos ngumonongonote isun os ni ḵingwan da udum ḵan dida woḵ pinatoy ni anghel we imbuun Apudyus dida.

¹¹ Naḵwa losan da sana'tta iyIsrael ta mabagbagaan da udume tagu ḵad nigilida bos ta mabagbagaan taḵu. Te anna taḵu'tte timpu we madam-an anungus ni timpu.

¹² Pun ngaimane ḵananae ampigsa pammatina ya adipun masulisug, ummana ta adi bumasuḻ.

¹³ Naippun impadasyu'ḵ sulisug aḵ adin os da udume tagu impadas. Yaḵon aḵ Apudyus mataḻgodan te adinapun iyunude masulisug taḵu'tta aditaḵupun lamog maattoman. Yaḵon nu awad sulisug, siyae mismu angwa si inon taḵu we miligsi ta lamog taḵu maattoman.

¹⁴ Pun ay-ayatoḵe susunud, adi ḵayu ogon andaydayaw atta sinan-apudyus.

¹⁵ Igammuḵe naangsan ḵayu. Pun somsomḵonyu da annae ibagaḵ ḵan diḵayu.

¹⁶ Nu uminum taḵu'tte nabasu we bayas, nu maabus taḵu we anggappiya ḵan Apudyus, daḵampun ḵamman aḵ milaḵ-am taḵu'tte bindisyune mipagapu'tte pummoy-ase daḻan Kristu si natoyana? Pun nu ḵanon taḵu tinapaye nabisbisaḵ nu magangput taḵu anggappiya ḵan Apudyus, daḵampun ḵamman os aḵ milaḵ-am taḵu'tte bindisyune mipagapu'tte long-ag Kristu we nipattoḻ atte kros?

¹⁷ Ḵad gapu'tte ossaane tinapaye ḵanon taḵu, isu taḵun ossaane long-ag taḵon ay nu adu taḵu.

¹⁸ Somsomḵonyu ḵad mipanggob atta ganaḵ Israel. Nu maḵaḵanda'tta midatun si altar para ḵan Apudyus, mipailae nilaḵ-amda andaydayaw ḵan siya.

¹⁹ Pioḵ ḵamman ibagae matattagu da sinan-apudyus ya awad ḵamman nansabaliyan da nidatun ḵan dida ya da udume maḵan?

²⁰ Sa pioḵ ḵanan ḵan diḵayu, losan atta adipun amati ḵan Apudyus we andatun, daḵampun ḵan Apudyus andatunanda yaḵon da aḻan. Adiḵpun pione midoga ḵayu ḵan dida.

²¹ Adipun maḵwae maḵainum ḵayu ḵan maḵaḵan ḵayu si angiḵagasmoḵanyu'tte natoyan Apu ya maḵainum ḵayu bos ḵan maḵaḵan ḵayu'tta midatun atta aḻan.

²² Nu ḵatti ḵoonyu, diḵayu angwa si angimunan Apudyus. Naḵosḵosdoḻ ḵayu ḵamman nu siya?

Sa Angwaan Taḵu Atta Losan Aḵ Madayawan Apudyus

²³ Awad da ḵanandae angibaga, “Nawayaaḵe angwa'tta ngaimane pioḵ ḵoon.” Tuttuwae nawayaan taḵu yaḵon daḵampun aḵ ambanag da losane ḵoon taḵu'tte bumaḻuwan taḵu ya daḵampun os aḵ ampapigsa'tta pammatin da buḻun taḵu.

²⁴ Daḵampun oḵyan aḵ abus bumaḻuwan taḵu'ḵ somsomḵon taḵu yaḵon sa bumaḻuwan os da udum.

²⁵ Pun maḵwa ḵanonyu da losane sidae mangin-an si market ya adiyu im-imuson gapu'tta somsomoḵyu.

²⁶ Te sa ḵanan ni Ugud Apudyus, “Ḵuwan Apudyus annae luta ya da losane awad.”

²⁷ Nu ayagan diḵayu'tta daḵampun aḵ namati'ḵ maḵaḵan, inḵayu nu pionyu. Ḵad losane ilusnuda, ḵanonyu we adiyu im-imuson gapu'tta somsomoḵyu.

²⁸ Yaḵon nu awad angibaga ḵan diḵayu ḵanane, “Nidatun atta sinan-apudyus illusnuda,” adiyu ḵanon gapu si nangibaga ḵan diḵayu ḵan gapu si somsomoḵna.

²⁹ Sa pioḵ ḵanan, adiyu ḵanon gapu ta lawweng somsomoḵ ni nangibaga yaḵon daḵampun aḵ gapu ta lawweng ḵan diḵayu. Awad da ḵanandae angibaga, “Ngai gapunae maḵuwis wayawayaḵe angan gapu'tte somsomoḵ ni osae tagu?

³⁰ Nu anggappiyaaḵ ḵan Apudyus atta ngaimane ḵanoḵ baḵon nu inumoḵ, ngaipaaḵ madellaw?”

³¹ Yaḵon sa ibagaḵ ḵan diḵayu, da losane ḵoonyu taḵon ay angananyu ḵan uminumanyu ḵoonyu'ḵ madayawan Apudyus.

³² Ḵad ummanyu ta adiyu ḵoon bumasuḻan da udum taḵon ay da Judyu baḵon nu Gentil baḵon nu da magimugimunge namati ḵan Apudyus.

³³ Unudonyu saḵone pasigḵu ibagabagay biyagḵu'tta losane tagu. Te sa singsingtoḵ, daḵampun aḵ bumaḻuwaḵ yaḵon sa bumaḻuwan da adu ta mataguda.