Zakadiia 9 - O Mikanda Ikola

O hadi ni kaxtiku ka miji imox-mu

¹ Ubatuilu ua Jihova ua lungulukila ixi ia Hadalake ni ixi ia Damasku, o kibuta kiê, kuma Jihova mesu mê uene ku ma ta kuthandu dia athu ni kuthandu dia miji ioso ia Izalaiele.

² Ua tula ue ku thandu dia Hamate, ua su-nê mbambe, ni ku thandu dia Tilu ni Sidone, sumbala a di fika kuijiia kinéne.

³ O Tilu ua di tungila jimbonge ja imbaka, iú ua di bhongoluela phalata kala fufutila ni ulu ua fina kala malôua mu nzunga.

⁴ Tala-phe, Jihova hinu ua kà mu zula. Imbaka iê ua kà i lundumuina mu alunga, o muene a kà mu jikinisa kuala o túbhia.

⁵ Axikilone ua kà ki mona hé u kala ni uoma; Ngaza ue uà ki mona anga u kala ni misusu ia uoma ua vulu; Ekolone ue kiene kimoxi, kuma kudielela kuê kua kà kituka kingoho; Sobha ia Ngaza ua kà jikinina, o mu Axikelone ki mua kà tunga muthu.

⁶ Muiji ua katumba uene ua kà tunga mu Ajidode, anga ngi jimisa o izala ia akua Fidíxia.

⁷ O manhinga ma jisata ja iteka nga kà a katula mu kanu dia enhâ, ni kubhanga isunji iaíibha ngi ku katula ku mazu mâ; bheneʼobho muene ue ua kà xala kala kisubhuke, kia subhuka phala Nzambi ietu; ua kà di bhanga kiá mukua dijiku dia Juda, o Ekolone uà kela kiá kala Jebuzeu.

⁸ Anga inzu iami nga kà i xitila mu jimbandu ku ifuẋi ia ita phala ki bhu bhite muthu mba u vutuka; phala o nguma mukua ku a bhondeleka, ka a bhite dingi ku thandu; mukonda o kiki nga di muena-kiu ni mesu mami.

Sobha ia Ziione iú uiza

⁹ Sanguluka kiavulu, eie monʼa kilumba mu Ziione; Tumbujuka ni ngalasa eie u monʼa kilumba mu Jeluzaleme; tala, sobha ié iú uiza kokué, u fundisa mu kidi, Mubuludi, ngadiama, ua sambela ku thandu dia bulu, ku thandu dia kaseseme ka bulu, kamona ka bulu ia mukaji.

¹⁰ Muene ua kà jikinisa o makalu ma ita mʼoxi ia Ifalaíme, ni jikabalu ja Jeluzaleme; ni mufula ua ita ua kà u bukula ue; Muene nʼa kà tula jingolokela ja paze ni kutululuka ku akua jixi; o utuminu uê ua kà di zala tunde ku musanza katé ku musanza ua mukuá; tunde ku honga ia Ufalate katé kua suku oxi.

Nzambi u Bheka dingi Mundu uê ku Ufolo

¹¹ O kokué-phe, eie u Ziione, mukonda dia manhinga ma kikutu kié, jihutile jê ngà ji katula mu dikungu dia kambe menha, mua a tele.

¹² Anga ngʼambela, ngixi: Vutukenu mu kimbaka, enu sumbala a mi kutu maji hanji muala ni kudielela; lelu dienhidi ngi mi tangela kuila imbamba ienu ioso nga-nda ku mi vutuila-iu mu luiadi.

¹³ Mbata Juda nga mu bhetekela kokuaʼmi kala mufula, eme ngezalesa Ifalaíme ni nguzu kala misongo ia mufula; eie Ziione anʼé nga kà a funhisa, anga a kà lua ni anʼé eie, u Ngelexa! Nga-nda kuà ku tula, eie u Ziione, kala xibhata ia kiiala kia nguzu.

¹⁴ Jihova a kà mu muena ku thandu dia anʼa Ziione; o misongo iê ia kà tunda kala jinzaji ja mvula iala mu telaka; Jihova Nzambi ua kà xikisa koloneta anga ua kʼàia ni ibhungu ia kitembu kia Sulu.

¹⁵ Jihova dia Ilombo Ieta muene ua-nda ku a xitila; akua kubhânga ni jimbalafunda a-nda kua kà a jikinisa anga a a titidila muene bhoxi; o manhinga mâ a kà ma nua kala vinhu; a-nda kua kèzala kala jímbia ja sata, a kèla muene kiololo kala bhu jithungi ja Kalatódio.

¹⁶ Bhu kizuuʼokio Jihova Nzambi iâ ua-nda kubhulula o mundu uê, mukua ni kilunga kia jimbudi jê; mbata ene mu ngongo a kà benha kala matadi a kitundu ala ku lekujuka mu ixi iê.

¹⁷ Mukonda muene o jihenda jê jivula! O kuiuka kuê kuahi ngó! Minzangala ia mala ia ka tambula nguzu mukonda dia tiluku, o anʼa ilumba mukonda dia vinhu ia uisu.