Zakadiia 8 - O Mikanda Ikola

Kuzediua a ku lekelela

¹ Bheneʼobho, o kizuelu kia Jihova dia Ilombo Ieta kiza dingi kokuami, kuila:

² Jihova dia Ilombo Ieta uambe kiki: Ziione nga mu lange ni muanu uoso; ni difuba dia vulu Ziione nga mu lange muene.

³ Jihova dia Ifuẋi uambe kiki, uixi: Ziione nga kà mu vutukila. Nga kà tunga mu kaxi ka Jeluzaleme. Jeluzaleme a kà mu ixana exi: Mbanza ia ujitu, mulundu uangene ua Jihova dia Ilombo Ieta, mulundu uê ukôla.

⁴ Jihova dia Ilombo Ieta uambe, kiki: Bhu itanda ia Jeluzaleme hanji bhua-nda kua kà tunga ikulakaji ia mala ni tukulakaji tua ahatu; ene oso a kʼàmbata jimbangala jâ bhu maku, mukonda dia kukuka kià kiavulu muene.

⁵ O mu jinzunga joso ja mbonge mua kèza tuana tua mala ni tuana tua ahatu, a kà tonokena mueneʼomo.

⁶ Jihova dia Ilombo Ieta uambe, kiki: Se o kiki kia kà kala kisunji ku mesu ma iá a subhuka ku muiji uenhú, mu izuua ienhoio, kia kà kala ue kisunji ku mesu mami? Kiene kia tange Jihova dia Ilombo Ieta.

⁷ Jihova dia Ilombo Ieta uambe: Tala-ze, nga kà bhulula mundu uami ku ixi i kala ku tundila o dikumbi ni ku ixi i kala ku tudila o dikumbi.

⁸ Nga kèza-nâ; a kà tunga muʼaxaxi ka Jeluzaleme. Ene a kà kala mundu uami, eme nga kà kala ngi Nzambi iâ, mu kidi ni mu kufundisa kua iuka.

⁹ Jihova dia Ilombo Ieta uambe, kiki: Kolesenu o maku enu, enu oso mu izuua mumu muevu makʼama mu kanu dia jipolofeta ja kexile-bhu, kizuua kia tele o disesa dia Inzu ia Jihova dia Ilombo Ieta, phala kutunga o Tembulu.

¹⁰ Kuma kioso izuuʼoio kiluua i bhixila, ki ku kexile futu ia athu mba o iama; ki ku kexile ue kutululuka phala uoso u tunda mba uoso u bokona, mukonda dia nguma. Kuma athu oso nga a vunzile muẋima eme nga a bhangesele kuila muthu u lungulukila mukuá muthu u lungulukila mukuá.

¹¹ Maji Kindalʼiki-phe, o mundu iú ua subhuka-ku ki nganda ku a bhanga dingi kala mu izuua ia dianga, kiene kiambe Jihova dia Ilombo Ieta.

¹² Mukonda eme nga-nda ku kuua o kutululuka o mbutu ia kà kala ni kuzediua. Muvide ua kà lukula ibundu iê, o ixi ia kà bhana idima, o diulu dia kà bhana dimume diê mu kimene; anga ngi bhangesa kuila, o ima ioso iii ia kà biluka undundu ua ngene ua iá a subhuka ku muiji uenhú.

¹³ Anga kia kà bhita-phe kiki, eie bhata dia Juda ni eie bhata dia Izalaiele, kuila, kala kioso ki mua kexile mu akua mázui muʼaxaxe ka miji iengi, kiene ue ki nga kà mi bhulula anga mua kà kituka dibesá muʼaxaxe kâ. Ki mu kale-phe ni uoma, maku enu a suine muene.

¹⁴ Mbata o Jihova dia Ilombo leta uambe kiki: Mukua ni kiki ki nga xinganeka ku mi bhanga kiaiibha, kioso jitata jenu kia ngi lokalala ni ku ngi thathamesa, eme ki ngi dielesa dingi, Jihova dia Ilombo ua kiambe,

¹⁵ kiene ue ki nga xinganeka lua mukuâ o kubhanga mbote kua Jeluzaleme ni ku dibhata dia Juda mu izuua muenhumu. Ki mu kale-phe ni uoma.

¹⁶ Ima i mua tokala kubhanga ienʼiii: Mu ku zuela ditangedienu o kidi muthu ni mukuâ; fundisenu mu kidi ni mu kutululuka bhu mabhitu menu.

¹⁷ Ki bhu kale muthu mudienu u xinganeka mu muẋima uê kima kia phulu kua mukuâ, mba bhu kala muthu u uabhela kuloka mu makutu; kuma ima ioso iii ia ngi ibhila, Jihova ua ki tange.

¹⁸ Kizuelu kia Jihova dia Ilombo Ieta anga kiza kokuami, kuamba:

¹⁹ Jihova dia Ifuẋi uambe kiki: O kujila kua mbeji ia kauana, ni kujila kua mbeji ia katanu, ni kua mbeji ia kasambuadi, ni kua mbeji ia kakuinhi, kua kà kituka kutana ni kusanguluka kua dibhata dia Juda, kuma ji kala Tesa jê ja makembu. Zolenu-phe ngoho o kutanga kidi ni kutululuka.

²⁰ Jihova dia Ifuẋi uambe kiki: Hádia hanji kia-nda kua kà bhita kuma, kua kèza miji ni athu a tungu mu jimbonge ja vulu,

²¹ anga akua mbonge ii a kàia mu mbonge ia mukuá exi: Tuienu lusolo mu kudionda o kiadi kia Jihova, ni kusota Jihova dia Ilombo Ieta; eme uami nga-nda kuia!

²² Kienhókio miji ia vulu ni ifuẋi ia mazonda ia kèza mu Jeluzaleme mu kusota Jihova dia Ilombo Ieta ni kudionda o kiadi kia Ngana.

²³ Jihova dia Ilombo Ieta uambe, kiki: Bhu kizuuʼokio kia kà bhita-phe kuma kuinhi dia muthu a tokala ku madimi mʼengi ma miji ioso mu ngongo, a kà naminina, ni kidi-ze muene, a kà naminina ku muxiku ua kizuatu kia Judé imoxi, anga a muambela, exi: Tuanda kuia ni enu, mukonda tuene mu kuívua kuila o Nzambi uala ni enu.