Zakadiia 7 - O Mikanda Ikola

O kujila kua ibhila Nzambi

¹ Anga ki bhita-phe, kuila, ku muvu ua kauana ua sobha Ndala, kizuelu kia Jihova kieza kua Zakadiia mu kizuua kia kauana ku mbeji ia kàvua, iene o mbeji ia Kijileu.

² Kioso bhu Betele, o dibhata dia Izalaiele ki dia tumikisa Sazele ni Lejemeleke kumoxi ni athuʼâ, phala kuia mu kudionda kiadi kia Jihova.

³ Iá ebhula ku jinganga ja kexile mʼonzo ia Jihova dia Ifuẋi ni ku jipolofeta, exi: Manhi, tu dila jinga kienhiki, ni kujila, bhu mbeji ia katatu kala ki tuene kiá ku ki bhanga mu mivu iavulu?

⁴ Bheneʼobho-phe kizuelu kia Jihova dia Ifuẋi kieza kokuami, kuila:

⁵ Tangela athu oso mu ixi mumu, ni ku jinganga, uixi: Kioso ki mua jila jinga ni ku disuuata bhu mbeji ia katanu ni ia kasambuadi mu makuinhi sambuadi a mivu osoʼá, ni kidi kiene eme, eme muene mua ngi jidila?

⁶ O kioso ki mua dia jinga ni ki mua nuá jinga, ki enuʼenu mua di dila jinga, mua di nuina jinga?

⁷ Ki muevu kizuelu kia Jihova kia miʼambelele ku ukunji ua jipolofeta jê ja mi diangelelè-ku, kioso Jeluzaleme kia kexi hanji ua tungu ua somo, ua tululuka, ni jimbanza jê joso ja mu kexile mu jimbandu; o ku Sulu ni mu kiphenza mua tungu athu?

O kuxibhaka kuene kua bhekesele ubhika

⁸ O kizuelu kia Jihova anga kiza kua Zakadiia, kuila:

⁹ Jihova dia Ilombo Ieta uambe kiki: Fundisenu mu kidi, londekesenu kiadi ni henda muthu ni muthu kua phangʼiê;

¹⁰ Kana kubhondeleka mutudi; mba mu bhondeleka hukunhu, mba muthu ua tunda dikanga, mba ngadiama, mba bhu kala muthu u xinganeka ku muẋima uê kubhanga phulu kua mukuá.

¹¹ Ene-phe anga a ditunʼâ kuívua, mu kubhukumuka kuâ a ngi bhana dikunda, mátui mâ a ma jika phala a lémbue kuívua.

¹² Kiene muene, a bhangesa miẋima iâ ku kola kala utadi ua diiamande, phala a lémbue kuívua o kitumu, mba o maka a tumikisa Jihova dia Ilombo Ieta ku Nzumbi iê ku jipolofeta ja tu diangelelè-ku; bhenhobho bhene bhua tundu o njinda ia dikota ia Jihova dia Ilombo Ieta.

¹³ Ki kiedi kuma eme ki nga a kolela, ene ka ngʼivu; ene uâ hádia a kà dikola kokuami, eme ue ngi kamba kua evua; kiene kia tange Jihova dia Ilombo Ieta.

¹⁴ Nga-nda kua kà a muangena ni kitembu kia kibhungu mu kaxi ka miji ioso ia kambe ene kuijiia, o ixi ku dima diâ, ia kà xala ia hatu, ià kala ia ngoho kala ia zuluka ku kibhungu kia dikota. O kienhiki kia kà bhangesa kuila ki bhu kala muthu u bhita-mu, mba u vutukila-mu; kuma ia kexile ixi iambote, o kiki a i kitula jingundu.