Zakadiia 6 - O Mikanda Ikola

Kisukila kia kanake: O Makalu a uana

¹ Lua mukuá dingi, ngi zangula mesuʼami mu kutala, ngi mona makalu a uana, a tundu bhu kaxi ka milundu i iadi; o milundu ienʼiii, milundu ia utadi ua ngòndo.

² Ku dikalu dia dianga kuala jikabalu ja kusuka; o ku dia kaiadi kuala jikabalu ja xiketela.

³ Ku dia katatu jikabalu ji zela; o ku dikalu dia kauana jikabalu ja kiphembe; tubalu tuoso tua nguzu muene.

⁴ Bhenhobho ngʼibhula anju ua kexi mu ku zuela ni eme, ngixi: Kima kiahi kienhiki, Ngana iami?

⁵ Anju anga u ngi vutuila, uixi: Iá, iene itembu i uana ia diulu, iala mu ku tunda ku ia kexile bhu pholo ia Jihova uavu ixi ioso.

⁶ Dikalu kuala tubalu tu xiketela dia mu tunda ku ixi ia thunda; o dia tubalu tu zela dia mu kaiela kuema diá; o dia tubalu tua kiphembe dia mu tunda ku ixi ia Sulu.

⁷ O tubalu tua nguzu, mu kutunda, tu di sunga ku pholo mu kusota kunhunga mu ngongo. Muene anga u zuela uixi: Ndé-nu, ndé-nu mu nhunge mu ngongo. Anga a kuata kunhunga mu ngongo.

⁸ Anga u ngʼixana u ngi tangela, uixi: Talesa, o ió aii ku ixi ia thunda, a bhangesa kuila o Nzumbi iami ia nhoha mu ixi ia thunda.

Josuué a mu ta kitundu ku mútue. Luthangu lua Ubhe

⁹ O kizuelu kia Jihova anga kʼiza kokuami, kuila:

¹⁰ O kua iá a ambata ku ubhika tambula-ku ujitu; Ni kua Heledai ni kua Tobiia ni kua Jedaia, (mu kizuua kieneʼokio uize u bokone mʼonzo ia Joziia monʼa Sofoniia) ió a tundu ku Babilónha.

¹¹ Nga kiambe muene, tambula-ku phalata ni ulu, u bhange itundu u i te ku mútue ua Josuué, monʼa Jozadake, nganga ia dikota.

¹² Hé u mu tangela, uixi: Jihova dia Ilombo Ieta, mu kuzuela, uambe kiki: Talesa-ze, muthu iú ua bhingi kuila jina diê, Thangu Luobhe; muene ua kà sabhuka bhu kididi kiê, anga ua kà tunga o Tembulu ia Jihova.

¹³ Muene-muène ua kà tunga o Tembulu ia Jihova, a kà muizalesa ni fuma ni unène; anga ua kà xikama bhu kiandu kiê, nʼa kala mu ku tumina anga ua kà kala nganga bhu kiandu kiê; o ima i iadi iii anga ia kà divisa muene kiambote ni kutululuka kuoso.

¹⁴ O itundu iii ia kà kala ia Heleme, ni Tobiia, ni Jedaia, ni Heme monʼa Sofoniia, ia kà di bhanga dilembalesu diê mu Tembulu ia Jihova.

¹⁵ O ió oso ala ku makanga, a kèza mu ku kuatekesa kutunga Tembulu ia Jihova, enu anga mu kʼijiia kuila Jihova dia Ilombo leta, muene ua ngi tumu kokuenu. Kienhiki kia kà bhita, se enu muividila muene kiambote o dízui dia Nzambi ienu.