Zakadiia 5 - O Mikanda Ikola

Kisuma kia kasamanu: Hata ia mu tuka

¹ Eme nga tona dingi kuzambula mesuʼami, o ki nga talesa, nga mono hata ia dilânda dia uinge ia mu bhita bhulu.

² Anju anga u ngʼibhula, uixi: Ua mu talaʼhi? Eme ngixi: Nga mu tala hata ia mu bhita bhulu, iala ni makuinhi a iadi a kóvadu mu kulebha ni kuinhi dia kóvadu mu kuzanza.

³ Bhenobho u ngambela, uixi: Iá ene o mázui a-nda kua kà di ta ku thandu dia ngongo ioso; Mukonda uoso-uoso u nhana a kà mu jikinisa ku mbandu kuku, ku mázui enhá; o uoso-uoso u loka ngó makutu, a kà mu jikinisa ue ku mbandu ia mukuá ku mázui ene amoxi.

⁴ Mázui eme nga kèza na-u, anga ngi bhangesa kuila a bokona mʼonzo ia muii ni mʼonzo ia iú u loka ngó makutu mu dijina diami; anga a kà bhita usuku ua muvinba muenhomo mu kaxi ka inzu iê, anga inzuʼoio a kà i jikinisa ni miẋi iê ni matadi mê, kumoxi, Jihova dia Ilombo Ieta ua ki tange.

Kisukila kia kasambuadi: Muhetu ni efa

⁵ Anju ia kexi mu kuzuela ni eme, anga i ngambela, iexi: Zambula mesu mé kindala u tale mba kima kiahi kiki kia mu tunda.

⁶ Eme, ngixi: Kima kiahi kienʼiki? Kuala muene uixi: Iii efa iala mu ku tunda. Uixi dingi: Kiki kiene o kidifua kiâ, mu ngongo ioso.

⁷ Anga a zangumuna o talendu ia ximbu ia futu ku thandu dia efa, anga ngi mona mu kaxi ka efa, moxi diê, mua xikama muhatu.

⁸ Anju anga u zuela uixi: Muhatu muenhú muene na kituxi. Anga u mu takuila bhu hole ia efa; o ku thandu diê anga u vunga-ku o talendu ia ximbu.

⁹ Anga ngi zambula mesu mami, ngi mona kua tundu ahatu kiiadi, ala mu ku bhuka-bhuka o kitembu ni mabhabha mâ, kuma a kexile ni mabhabha a di fu kala mabhabha a kinzuá; ene anga a zangula efa a tuka na-iu, aia na-iu mu dinga ni dinga, mu muxinda ua ixi ni diulu.

¹⁰ Eme bhenhobho, ngambela anju ua kexi mu zuela nʼeme, ngixi: O iá, efa aia na-iu kuebhi?

¹¹ Muene iú ua ngʼambela, uixi: Anda kuà i tungila inzu mu ixi ia Xinale. O inzo kioso ki ia kà bhua, o iene a-nda kua kà i ta muenhomo, bhu kididi kiê bhu ia tokala.