Zakadiia 3 - O Mikanda Ikola

Kisukila kia kauana: Nganga ia di-kota a mu tatela kuala Satana, o Nzambi-phe u mu lungisa

¹ Anga Nzambi u ngi londekeza o nganga ia dikota, Josuué, ua kexile bhu pholo ia Anju ia Jihova, ni Satana uaia ku lukuaku luê lua dilu phala kuenda ni ku mu tatela.

² Maji o Ngana anga uambela Satana, uixi; Jihova a ku bazele, eie Satana; kiene muene, O Jihova, ua solo Jeluzaleme, a ku bazele. Ki muenhú kixinji kia túbhia kiʼo katule bhu jiku?

³ O Josuué-phe, ua zuata izuatu ia xidi, uemana bhu pholo ia anju.

⁴ Bheneʼobho mu kuzuela anju uambela iá a kexi bhu pholo iê, uixi: Mu katudienu izuatu iii ia xidi. O muene ue ua mu tangela, uixi: Tala, nga bhangesa kuila o ikuma ié i ku somboka, nga-nda ku ku zuika izuatu ia ubhe ia makembu.

⁵ Eme-phe, ngixi: Ku mútue mu zuikienu-ku mítala ia zele kiambote. Anga a mu ta mítala ia zele kiambote kú mutue, hé a mu zuika izuatu ia tokala; O anju ia Jihova bhene bhu ia kexile.

⁶ O anju ia Jihova anga u lokela Josuué, uixi:

⁷ Jihova dia Ifuẋi uambe kiki: Se uenda mu jinjila jami, anga uaiuka kiambote o ima i nga kuambela, eie ue ua kà findisa dibhata diami, ua kà kala ue u mulangidi ua imbaka iami, nga kà ku bhana kididi, ua kà nhungʼé muene muʼaxaxe ka iá ala bhabha.

⁸ Ivua-phe, Josuué, u nganga ia dikota, eie ni akuenu a mu xikama bhu pholo ié, kuma mu ala mu azambuidi; eme-phe nga kà bhangesa kuila mubhikʼami uà kèza, Luthangu lua Ubhe.

⁹ Mukonda, talesa-ze, ditadi didi di nga tula bhu pholo ia Josuué. Ku ditadi didi, dimoxʼèlele, kuala sambuadi dia mesu; Eme-phe nga-nda kuseta-ku o kisetelu kiê, anga kikuma kia ixi iii ngi ki katula mu kizuua kimoxi, kiene kiambe Jihova dia Ifuẋi.

¹⁰ Mu kizuuʼokio, mua-nda kua kèla, o iú uixanena mukuá mu kilembeketa kia muvide, o iú ixanena mukuá moxiʼa a mufiku, Jihova dia Ilombo muene ua ki tange.