Zakadiia 2 - O Mikanda Ikola

Kisukila kia katatu: Jeluzaleme a mu zonga

¹ Anga ngi tona kuzambula mesu. O ki nga tale, nga mono diiala, o bhu lukuaku luê bhuala longoji lua kuzongela.

² Eme-phe, ngixi: Eie ua mu-ia kuebhi? Muene anga u ngambela, uixi: Mu kuzonga Jeluzaleme, phala o kutala kia soko o kuzanza kuê ni kia soko o kulebhelela kuê.

³ Bhenhobho-phe, o anju ia kexi mu zuela nʼeme i sondoloka, anga anju ia mukuá i tunda mu ku mu kauidila.

⁴ Anga i mu tangela, iexi: Lenga, tangela munzangala iú, kuamba: O Jeluzaleme hádia ua kà tungiua dingi kala kia jisanzala ja kambe imbaka, mukonda dia kifuẋi momué, kia athu ni kia ibhaku.

⁵ O Eme-phe, nga kà mu kala ngi kimbaka kia túbhia mu jimbandu; o fuma iê, Eme-muène-muene nga kà kala mu kaxi kê, kiene kia tange Jihova.

Jihutile a Exana kuvutuka ku Bhata

⁶ Jihova, uixi: Enu, tata! Ku ixi ia suku kindala lengenu-ku; mukonda nga mi muange mukua ni itembu i uana ia diulu; Jihova muene ua ki tange.

⁷ Tatʼeie! Ziione! Dibhulule eie ua tunga kumoxi ni monʼa kilumba ua Babilónha.

⁸ Mukonda o Jihova dia Ifuẋi, uambe kiki: Phala muene a tambule o fuma, ua ngi tumikisa kua akua jixi a mi bhundu imbamba ienu; mukonda uoso u mi kuata enu, ua kuata mu mona uê-muène ua diesu.

⁹ Mukonda, talenu-phe kiá: Nga kà zenga lukuaku luami ku thandu diâ ene, ene anga a kà kituka mbole ia enhó a kèxile mu ku a bhikila. Kienhókio kiene enu ki mua kà kʼijiia kuila Jihova dia Ilombo muene ua ngi tumu.

¹⁰ Imba! Sanguluka, eie u monʼa kilumba kià Ziione! Kuma, tala, eme ngiza, nga-nda kutunga mu kaxi kê, kiene kiambe Jihova.

¹¹ Bhu kizuuʼokio miji ia ndumba ia-nda kua kà bhongolokela kua Jihova, anga a kà kala kifuẋi kiami; hé nga kà tunga muʼaxaxi kè-eie, anga ua kà kʼijiia kuila Jihova dia Ilombo muène-muene ua ngi tumikisa kokué.

¹² Kienhokio-phe o Juda ua kà kituka undundu uangene ua Jihova, kuma diene dikânda diê mu ixi iê ia ngene; o Jeluzaleme a kà mu sola dingi lua mukuá.

¹³ Xitu ioso i di xibhe bhu pholo ia Jihova, kuma muene ua balumuka mu kibuta kiê kikôla.