Zakadiia 14 - O Mikanda Ikola

Difundisilu dia Jeluzaleme ni ingulungumba iê

¹ Tala, kizuua kia Jihova ki kiza, kia kuila ni ioso i uala na-iu ia kà kituka mbole ia ku uana-uana momuʼé.

² Mukonda eme miji ioso nganda ku i bhongolola mu kubhânga, a lua ita ni Jeluzaleme; mbonge a kà i tambula o jinzu a kà ji bula ni ku ji bhûnda; ahetu a kà a ta jiphanda; mbandu muene ia mbonge ia kà-ia ku ubhika, maji o tumbalu-mbalu tua subhuka, mu mbonge ka kà tu kaia-mu.

³ Jihova phe ua kà tunda mu kuzoka ni miji ienhiʼii, muene ua kà lua kala kiene kuzoka mu kumbi dia ita.

⁴ Mu kizuuʼokio-phe, inama iê ia kà tula ku mulundu ua Midiva, ua lulama ni Jeluzaleme ku mbandu ia Mutundila-Kumbi; o mulundu ua Midiva a kà u jikula muʼaxaxe, mbandu iii kuthunda, o mbandu ia mukuá ku luiji; kienhókio bhua kà kala dikôlo dia dikota kinéne bhuʼaxaxe; anga mbandu ia muvimba ia mulundu ia kà uanunukina ku Suku o ia mukuá ku Sulu.

⁵ Enu-phe mua kà lengela mu dikôlo dia milundu iami, kuma o dikôlo dia milundu dia kàia katé ku Kazela; kidi-ze muene, enu mua kà lenga kala ki mua lengele o kitungutisu kiaʼxi mu izuua ia Uziiia, sobha ia Juda; kienhokio-phe Jihova Nzambi iami ua kèza, ni athuʼê a ngene oso a di zelesa, Jisandu a kèza kumoxi ni eie, Ngana.

⁶ Anga kia kà bhita-phe kuila, bhu kizuuʼokio, ki kuá kala dingi mukengeji, maji mbàmbi ngó ni menha a di kuata matadi.

⁷ Kia kà kala kizuua kia ngene kia Jihova ngó, kia di tungula; o ukalelu uê kuà kalʼé ngó muanha kana, o usuku kana; kuma ni mu usuku, hanji kuzela kukuê.

⁸ Mu kizuuʼomo-phe, kia kà bhita kuila mu Jeluzaleme mua kà fuáfua ngiji ia menha ma di sanze, ma kà kungulukila mbandu ku musanza ua kalunga ku mutundila kumbi, o mbandu ia mukuá i kungulukila ku musanza ua kalunga ku mutudila-kumbi; O kienhiki kiene ki kia kà kala, ni bhu mvula ni bhu kixibhu a kunguluka jinga.

⁹ Jihova muene ua kà kala Sobha mu ngongo ioso. Bhu kizuuʼokio-phe, Ngana ia kà kala imoxi ngó ni dijina diê dimoxi ngó.

¹⁰ O ixi ioso ia kà kituka mukua ni kiphenza kia tundu mu Jeba katé ku Dimone ku mbandu ia Sulu ia Jeluzaleme; Jeluzaleme muene a kà mu zangeleka; ua kà tunga ua kà soma tunde bhu kididi kia dibhitu dia dianga katé bhu thungi; tundé bhu inzu ia matala ia Hananiiele katé ku makamenu-ma-vinhu ma sobha.

¹¹ A kà tunga muenhomo, ki kuà kala dingi muthu a mu ta mázui, mukonda Jeluzaleme ua kà tunga ua kà soma.

¹² O dibhebhu, Jihova dia-nda kuà kà jikinisa na-diu akua jixi oso alu ita ni Jeluzaleme, dienhidi: Xitu iâ ia kà sekumuka ku mukutu kuila ene hanji emana; mesuʼâ a kà bolela mu mútue; o dimi diâ, mu kanu, dia kà lutuka.

¹³ Mu kumbi dienhódio, Jihova ua kà kuua uoma ua vulu mu kaxi kâ; mukonda kala muthu ua-nda kua kà kuata mukuá mu lukuaku ẋaba! Muthu ua kà zengela mukuá lukuaku phala ku mu banga kiaiibha.

¹⁴ Ni Juda ue ua kà bhânga mvunda mu Jeluzaleme; o umvuama uoso ua akua jixi jala mu jimbandu, a kà u bhongolola ndumba muene; Ni ulu, ni phalata, ni izuatu ia kà kala nzungule.

¹⁵ O dibhebhu ku jikabalu, ni ku jimula, ni ku jikamelu ni ku jibulu ni iama ioso ia kà kala mu mukáu mu ilombo ienhoio, dia kà soka ni dibhebhu diâ ene.

¹⁶ Kieneʼokio, ene oso a subhuka ku miji ioso iejile mù-lua ni Jeluzaleme, a kà banda muvu ni muvu phala kubheza Jihova dia Ifuẋi, o sobha, ni kubhanga ue o fesa ia jifundu.

¹⁷ Se mu jifamília ja athu mu ngongo mu kala imoxi i kamba kubanda mu Jeluzaleme, mu kubheza Jihova dia Ifuẋi, o sobha, ku thandu diê ki kua kèza mvula.

¹⁸ Se o mbutu ia jifamília ja akua Ijitu nguauá kubanda, nguá kuiza, o mvula ki ia kà noka kokuâ, maji ku thandu diâ kua kèza dibhebhu, Jihova dia-nda ku kuama na-diu akua jixi, a kambe kubanda mu kubhanga o fesa ia fundu.

¹⁹ Kenhaka kene o kaxtiku ka akua Ijito ni akua jixi oso a kamba kubanda mu kubhanga fesa ia jifundu.

²⁰ Mu kizuuʼokio, ku manzuela a jikabalu a kà seta-ku kiki: Kio lumbile Jihova mba Kiangene kia Jihova; o jímbia mʼonzo ia Ngana ja kèla kala malonga a menha a pholo a lulama ni Kalatódio.

²¹ Kiene muene, jímbia joso mu Jeluzaleme ni mu Juda a kà ji lumbila Jihova dia Ifuẋi; ene oso a kèza mu ku bhakula jisata, a kà katula jímbia jenhojo, muene mua kà lamba xitu ia Sata. Ki kuà kala dingi muthu uengi mʼonzo ia Jihova dia Ilombo Ieta, kizuua kienhókio.