Zakadiia 12 - O Mikanda Ikola

O Kubhuluka kua Jeluzaleme

¹ O mabatuilu ma Jihova ma bilukila Izalaiele. Jihova ua zala o diulu, iú ua te o madisesa ma ixi anga u bhanga o nzumbi ia muthu moxi diê, ua zuela, uixi:

² Talesa, eme Jeluzaleme nga-nda ku mu bhanga mukua ni kopho i bhekesa uoma oso ala mu jimbandu, ni Juda ue u kala ni uoma kia-nda kumona Jeluzaleme a mu kondoloka.

³ Kizuuʼokio Jeluzaleme nga kà mu bhanga ditadi dia neme phala miji ioso; oso a kà di zangula, dia kà sasujula; miji ioso mu ngongo ia kà di bhongolola mu ku mu bilukila.

⁴ Jihova uixi: Bhu kumbiʼodio o jikabalu joso nga kà ji kuama ni kisasumuke, o ió oso a ji mondala a ká saluka malaji; mesu mami ma kà tona kʼonzo ia Juda o jikabalu joso ja akua jixi nga kà ji kuama ni ufofo.

⁵ Kienhôkio o ilamba mua Juda a kèla ku miẋima iâ, exi: O nguzu ia iá a tungu mu Jeluzaleme, iala kua Jihova dia Ifuẋi, Nzambi iâ.

⁶ Bhu kumbi dieneʼodio o ilamba mua Juda nga kà a kitula kala dikala dia túbhia koxi dia jihuinhi; a kà di bhanga kala kixinji kia túbhia mu ita ia iangu; ni ku dilu ni ku kiasu a kà jikinisa ifuẋi ioso mu jimbandu, anga mu Jeluzaleme mua ka tunga dingi athu lua mukuá bhu kididi kiê, mu Jeluzaleme muene.

⁷ Jihova ua kà dianga kubhulula o jibalaka ja Juda phala o fuma ia dibhata dia Davidi, ni fuma ia iá a tungu mu Jeluzaleme, ki ia ka zangalale ku thandu dia Juda.

⁸ Bhu kumbiʼodio Jihova ua kà ongeka iá a tunga mu Jeluzaleme; o uoso ua tolo nguzu mu kaxi kâ, bhu kumbi dieneʼodio ua kà kala mukua ni Davidi; o dibhata dia Davidi dia kèla kala Nzambi, mukuá ni anju ia Jihova bhu pholo iâ.

⁹ Anga kia kà bhita kiki bhu kizuuʼokio, kuila, nga kà sota kujimisa miji ioso ia kèza mu ku zoka ni Jeluzaleme.

¹⁰ O ku dibhata dia Davidi, ni ku thandu dia iá a tungu mu Jeluzaleme, nga kà lunduluila-ku Nzumbi ia Kiadi ni ia kudionda anga ene à kenda ni kutala kokuami. O ió uoso a mu kubula, ene a kà mu tela jingololo kala mona umoxiʼèlele, a kà mu dila muene ni kajikijiki kala kia dila mona ua phandekumbi.

¹¹ Bhu kumbiʼodio, mu Jeluzaleme mua kà kala ngololo ia dikota, kala kudila kua Hadademono mu dikôlo dia Mejidu.

¹² O ixi ia kà dila, dibhata ni mbandu iê, dibhata ni mbandu iê; muiji ua dibhata dia Davidi ni mbandu iâ, o ahetuʼâ ue ni mbandu iâ; muiji ua dibhata dia Netane ni mbandu iâ, o ahatuʼâ ue ni mbandu iâ;

¹³ Muiji ua dibhata dia Levi ni mbandu iâ, o ahetuʼâ ue ni mbandu iâ; o muiji ua dibhata dia Simeii ni mbandu iâ, o ahetuʼâ ni mbandu iâ;

¹⁴ Miji ioso ia mukuá dingi, muiji ni mbandu iê, muiji ni mbandu iê, o ahatuʼâ ue ni mbandu iâ.