Zakadiia 11 - O Mikanda Ikola

O kaxtiku ka oso a kamba o kudiela

¹ Eie Libanu jikula mabhitu mê phala o túbhia tu jikatese misedulu iê:

² Eie u muẋi ua faia enda ni kukema mukonda o misedulu iai bhoxi, kuma o miẋi ia matunda a i jikinisa; enu mu miẋi ia mikalavádiu ia Basane kuatenu mikemu mukonda ditutu dia xitile kiambote a di kokela bhoxi.

³ Ivuenu o kudikola kua abidi, kuma o fuma iâ ia muangana! Ivuenu o kudila kua anʼa jihoji mukonda izala ia Njolodá ki iala-ku dingi.

Kifika kia mubidi uambote

⁴ Jihova, Nzambi iami uambe kiki: Enga jimbudi jiji ja xikamena o ku ji jibha

⁵ Mbata oso ene ku ji sumba, aia ni ku ji jibha; ki bhuala muthu u a ebhula kuma oso ala mu ku ji sumbisa a mu kuila exi: Nzambi a tane-ku, mukonda eme nga kituka kiá ngi mvuama! o abidi ue kene ngó ku ji kuatela henda.

⁶ Jihova iu uambe kiki: A tungu mu ixi mumu eme ue, ni kidi kiene, ki nganda ku a kuatela dingi henda; nga-nda kuila muthu ngi mu bhakula bhu maku ma mukuá ni bhu maku ma sobha iê, ixi ioso ene anga a i kuama, eme ue ki nga-nda ku a bhulula bhu maku mâ.

⁷ Eme-phe kiá anga ngi langa o jimbudi ja muia ni ku jibha, o tumbudi tua kilunga, akuetu! Anga ngi katula mbangala jiiadi phala eme: Imoxi nga i luku “Kiadi” o ia mukuá ngixi, “Kuongama”, anga ngi langa na-ju o tumbudi.

⁸ Anga ngi jimisa o abidi ene oso kitatu mu mbeji imoxi, kuma o muenhu uami ua bhondalala mukonda dia ene, o ene uâ eme a ngi kumine kiá ku mienhu iâ.

⁹ Anga ngiia ngixi: Eme ki nga-nda ku mi inga dingi; uoso u fua a fue, uoso a mu sendumuna a sendumuke; o joso ja subhuka-ku, kala mbudi i die xitu ia mukuá.

¹⁰ Anga ngi zangula mbangala iami “Kiadi” anga ngi i bukulʼé phala kusendumuna o kikutu kiami ki nga tele ni miji ioso ienhiʼii.

¹¹ Kikutu nga ki sendumuna muene ku kizuua kieneʼokio; o akuetu tumbudi tua subhuka-ku, a ngi dielelele, anga a kijiia kuila kiki kizuelu kia Jihova muene.

¹² Eme anga ngʼa tangela, ngixi: Se mua ki mono kuuabha, ngi bhanienu futu ioso ia ngi tokala; o ki muila kana, kuabhuʼé. Anga a pezala o futu iami, hé a ngi futa makuinhi a tatu a itadi ia phalata.

¹³ Bheneʼobho, Ngana ua ngʼambela, uixi: O suilu iii, ia ngi fika ene kuila iene i nga te, takuila-iu kua mumbi-a-jímbia. Anga ngi zangula makuinhi a tatu a itadi ia phalata, ngi i takuila kua mumbi-a-jímbia, monzo ia Jihova.

¹⁴ Anga ngi bukula mbangala iami ia kaiadi “Kuongama” phala kumuanga uphange bhu kaxi ka Juda ni Izalaiele.

¹⁵ Jihova anga u ngambela, uixi: Tambula hanji ingolongondo ia mubidi ua kiôua.

¹⁶ Mukonda ku mundu nganda kubalumuina-ku mubidi u bhinga kuila ka lange mbudi ja mu fua, o ia jimbidila muene kaii mu ku i sota, o ia kate muene u iehelela kienhókio, o mbudi ia disanze ue muene kà xikina ku inga; maji o xitu ia nete muene u dia, katé ni ikoto u i ẋomona.

¹⁷ Lamba dié! mubidi ua kilalu, ua bhingi jimbudi u ji ehelela! xibhata ia kà ku tula ku lukuaku ni ku diesu dié dia kadilu! Lukuaku lué lua kadilu lua kà kukuta muene luene luoso, o diesu diê dia kèla muene babadi!