Tito 3 - O Mikanda Ikola

Kutendelela dingi akua Keleta

¹ Athu a lembalese kuma, a di tume ni jixefe ni jingana ji tumina, a tumake jinge, a sakalale mu kubhanga ikalakalu ioso ia mbote.

² A tangele kuila kana kuâmba muthu uoso-uoso, kana kulokalala, kikale a lenduke, a kale athu ambote, athu oso ende-nâ ni kubelesela.

³ Kuma mʼokulu etu-ene tua kexile, tua tobho, tua xibhaka, tua di nganala, tua bhikila maluimbi ma vula matelu, ni jihânji joso, tuende ni phulu ni dixinga, tua iibha, tua di zemba mudietu.

⁴ Maji kioso-phe kia tukuluka kiadi kia Nzambi, Mubhuludi uetu, ni henda iê ia kuatela muthu, ua tu bhulula.

⁵ Muène o ku tu bhulula, ki kia kaiela mu imbamba ia kuiuka kuetu i tua bhange etu, maji mu kulenduka kuê muène. O ku dibônzo diê, iú ua tu zelesa ni Nzumbi iê Ikôla mu ku tu vualulula dingi ni ku tu bhana muenhu ua ubhe.

⁶ Nzambi mukonda dia henda iê ia dikota ia-la na-iu, Nzumbi iê Ikôla ua mu lundulula kía nzungule ku thandu dietu, mukonda dia Jezú Kristu, Mubhuludi uetu.

⁷ Phale o ki tu zubha kulungila ku kiadi kia Nzambi muène, tu kale tu alundudi, tua dielela kutambula o muenhu ki uàbhua u tuala kukinga.

⁸ Makʼama ma fiiele. Nga mesena u jiza ni ku ma tanga, ni ki bhekela kuila oso a xikana Nzambi, a kala ni muanu ua kukuatu kubhanga midimu ia mbote. Imʼiii ia uabha, i bhandulula athu enhoso.

⁹ Maji o jiphata-phe ja uoua lenga-ju, ni jingu ja vumu, ni jimvunda, ni mauanji ma kufundila o Kitumu kia Jijudé. Imʼiii ki iala ni kubhanduluka kua kima, kuma ima ia ngoho.

¹⁰ Muthu uala mufundi se ua mu bazela lumoxi ni luiadi, mu ambule.

¹¹ Ijiia na-kiu kuma muthu kala kiki, ua juuala, mukua ituxi ku luelu, ua di belesa muène.

Kulekela

¹² Kioso ki nganda ku ku tumikisa Artema, mba Tixiko, eʼmuène kuata muanu ua ku ngi sanga bhu Nikopolo, mukonda bhene bhu nga solo bhu ngi bhitila o tembu ia mbambi.

¹³ Ngambi ia maka, na Zena, ni Apolo, a xinjikile ni muanu ku njila iâ, mbé ki bhu kale kima kia a kamba.

¹⁴ O mundu uetu ue a di longe kubhanga midimu ia mbote, mbebhu o kubhindumuna, phala ene ue ka kambe kukala ni ibundu.

¹⁵ Oso ngala-nâ kunu, a tumu ku ku menekena. Oso koko a tu zola mu kuxikana, a menekene. O kiadi kia Nzambi, ki kale ni enu oso koko.