Tiiaku 5 - O Mikanda Ikola

O jimvuama ji dia mangonha

¹ Kindala, enu mu jimonhi, ivenu! Ndokuenu mu dile, mu di kole, mukonda dia usébhue ua-nda ku mi tula!

² Jimbongo jenu ja bolo, o izuatu ienu ia fina ia diua ku tubamba.

³ O ulu uenu ni phalata ienu ia fulujala. O fuluja iê i kala mbangi ia ku mi belesa, i mi dia jixitu kala tubhia. Itadi ienu, mu izuua ia sukidila-ku, enu mua i lundu,

⁴ o futu ia jingunza ja kalakala mu mabhia menu, mua emina-iu. O mu kuditenda kuâ ivenu kia-lu dikola! O mitendu ia enhó a munu o mabhia menu, ia bokona mu matui ma Ngana Nzambi, Muteni-a-Ioso.

⁵ Mu ngongo mumu enu muenhu uenu uoso ua kudia ni kukemba, enu mua nete kiambote kala ibhaku ia xikamena kuia bhu dijibhilu.

⁶ Athu ka moneka kikuma enu mu a êlesa hé mu a jibha, sumbala ene ka tena ku mi bhanga kima kioso-kioso kiaiibha.

O kukuata kinhenge. O kuloka. O kusamba

⁷ Kala kiki, kuatenu-phe kinhenge, enu jiphange, katé bhua kèjiia Ngana. Talesenu kidimakaji kioso kia kinga ibundu iambote i tunda mu mavu. Muène u i kuatela kinhenge, katé ki i nokena mvula ia kudinji ni ia kasamanu.

⁸ Enu uenu kuatenu kinhenge. Kolenu miẋima, mukonda o kuiza kua Ngana kua zukama.

⁹ Enu jiphange, ki muende ni kudilongolola mudienu, phala enu-enu Nzambi ka mi belese. Talesenu, Mufundixi ua zukama, iú kiá bhu muelu phala kuiza.

¹⁰ Xinganekenu, enu jiphange, o jipolofetʼ ojo ja zuelele mu dijina dia Ngana, kia tu bhana phangu mu kutala hadi, ni mu kukuata kinhenge.

¹¹ Talesenu kuma etu tua a mono kuzediua, mukonda dia kukolokota kuâ. O kukolokota kua Jobe mua ku ivua, muejiia ue o disukilu diê kioso Nzambi kia mu zediuisa. Mbata o Ngana ua vula o kukuatela henda ni kulendukila.

¹² Ku ima ioso-phe, phange jami, ki uila u bhana kizuelu kia kima kiosokioso, kota-kota kana kuloka, né kulokela diulu, nè kulokela oxi, nè mulôko uengi uoso-uoso. Se kua mi bhingi kutanga kima, mu ila kiene se kiene, mu ila kana se kana, mbé Nzambi ka mi êlese.

¹³ Se sai-ku muthu mudienu uala kutala hadi, a sambe. Se sai-ku ua sanguluka, embe mimbu ia kusakidila.

¹⁴ Se bhuala muthu mudienu ua-lu kata, a tume adiakime a Ngeleja, ene a sambe-nê, a mu uese maji mu mutue mu dijina dia Ngana.

¹⁵ O kusambʼuku, kua kuxikana, anga ku mu bhulula uoso ua-lu kata. O Ngana u mu balumuna, se ua tele ituxi, u mu loloka-iu.

¹⁶ Kala kiki, fisalenu mudienu ituxi ienu, mu di diondele mu kusamba, phala a mʼilule. O kusamba kua muthu uaiuka, ku lenda kiavulu mu kukalakala.

¹⁷ O Elija dia musèsedi, ua kexile muthu ni mukuetu, o jihânji jene jimoxi ni etu. Muène anga u samba lujiji phala mvula ki i noke, iene anga i bhanga mivu itatu ni mbeji jisamanu sè kunoka mu ngongo.

¹⁸ Muène anga u samba dingi luamukuá, ku diulu anga ku sonoka mvula, oxi anga i bhana idima iê.

¹⁹ Phange jami, se muthu mudienu u jimbila o kidi, anga bhu kala muthu u mu bheka dingi mu njila,

²⁰ a tume ku kʼijiia kuma, uoso u bheka dingi mu njila mukua ituxi ua jimbidile njila iê, ua bhulula muenhu ueji kùfua, ua lolokesa nzungule ia ituxi.