Tiiaku 4 - O Mikanda Ikola

Tua fuama kudilenda jihânji jetu. Ukamba ua mundu

¹ Kuebhi ku tunda o ita ni jimvunda mudienu? Ku ia tundu manhi ki kuenhuku, ku jihânji jenu jaiibha ji lua ita mu idiandu ienu?

² Enu mua Seme ima, maji mukonda ki mua i mono, muala polondo ia kujibha phala mu kale na-iu. Mua kuata luimbi, maji kuma i muandalele mua i lémbua, mua zoko, mua lu ita, maji mua tokoka-ku! O ioso i mua bhindamena mu kamba ku i mona, mukonda mua kambe kubhinga kua Nzambi.

³ O kioso ki mu bhinga mu kamba kutambula, mukonda mua bhingi kiaiibha. Kuma enu mu bhinga ima, phala mu i bhuise ngó mu jihânji jenu.

⁴ Mu akua jiphànda! Kifua ki mua kʼijiia kuma o ukamba ua mundu unguma kua Nzambi? Uila kiki, uoso ua mesena kukala kamba dia mundu, ua di bhange nguma ia Nzambi.

⁵ Inga mua fika kuma o Madivulu Makôla ma ki zuela ngoho, kuila: Nzumbiʼoio, a mu ta Nzambi moxi dietu, ua tu indi ni difuba.

⁶ Maji o dikuatekesu di tu bhana Nzambi phe, dia beta kota mu ujitu. Mukonda o Mikanda ia Ngana, iexi: Nzambi u zoka ni akua izala, maji oso a batama u a kuatekesa ni kiadi kiê.

⁷ Uila kiki, tolokenu kua Nzambi; zokenu-phe ni Diabhu, muène u mi lenga.

⁸ Zukamenu kua Nzambi, muène u mi zukama enu. Di sukudienu maku, mu akua ituxi! Di zelesienu miẋima, mu akua miẋima iiadi!

⁹ Kenananenu, mu di kuate mukondo, mu dile. Jingolela jenu ji biluke jingololo, o kutana kuenu kukale kudisuuata.

¹⁰ Di tolesienu bhu pholo ia Ngana, muène anga u mi zangeleka.

O kifua kia kudilongolola

¹¹ Enu, jiphange jami, ki mu kale mu ku di âmba mudienu. Uoso u âmba phangʼiê, mba phangʼiê u mu fikila, uambe o Kitumu, ua fikila o Kitumu. O ki uila Kitumu u ki fikila, kualé dingi u mubhangi a Kitumu, maji u mubatuidi a milonga.

¹² Sai-phe umoxi ngó u bhana o Kitumu, u batula o milonga,—muène Nzambi. Muenhó, muène u tena kubhulula, muène u tena kufuisa. Eie-phe ua di fika eie nanhi, u êlesa phangʼié mua Kristu?

Ima ia mundu ijila kubhua

¹³ Kindala ivenu, enu mu akua kuila: Lelu mba mungu tuia ku mbanzʼoko, tu bhanga-ku muvu mu uenji, tu nganhale kitadi kiavulu.

¹⁴ Sumbala anuenu kioso kʼiza-ku mungu ku mienhu ienu, ki mua kʼijiia! Mukonda o muenhu uenu ua soko kiebi? Muala mu mbundu, i moneka ngó kathangana kofèle, kindala-phe ia jimuka ku mesu!

¹⁵ Inda mua fuama mu ila: Ngana se ua mesena, hé tu kola muienhu, tu ila kiki, tu ila kiokio.

¹⁶ Maji enu-phe mu di thatha mu jinzabala jenu, mukonda dia kudizangeleka kuenu. O kudithatha kuosuʼoko-phe, kuaiibha!

¹⁷ Uila kiki, muthu uoso uejiia o kubhanga mbote, nʼa kambe ku i bhanga, kiene o kituxi kiê.