Tiiaku 3 - O Mikanda Ikola

Kutondala mu kuzuela. O dimi

¹ Enu phange jami, athu mudienu ka vudile ku di bhanga jimesene ja kulonga maka mu Ngeleja, kuma mua kʼijiia kuila etu, tua mu longa o maka, hinu tua kà kala kota mu kuêla athu oso ndenge, hàdia kia kà tu fundisa.

² Kuma etu-ene oso, tuene mu tondajala mu ima iavulu. Uoso u kamba kudibhukana mu kuzuela, ió muene muthu uatenena, ua soko-bho o kukuika mukutu uê uoso.

³ Talesenu, etu tu ta felu mu kanu dia kabalu, phala ni ka tu belesele, etu ni tu mu tumina o mukutu uê uoso, kuoso ku tua mesena kuditela.

⁴ Xinganekenu ue jinaviiu: Sumbala ja kulu kiosuʼiki, sumbala a ji xinjika kuala kitembu kia suina, maji a ji lungulula-phe ni kaleme kofele ngó, kuoso-kuoso kua kane o mutabhuidi.

⁵ Kiene ue o dimi, sumbala kidiandu kiofèle ngó, maji di di hanza ni ima ia makota. Talesenu, muxitu né ua kulu kiavulu, u tambula tubhia ku mulengu uofele ngó!

⁶ O dimi, tubhia. Diene ubheka uê, diala ni nzungule ia usuéia! Dia tambula kididi mu idiandu ietu ioso, hé di kasanesa o mukutu uetu uoso, o dimi dienhidi! Dia di bhange mukuâ ni tubhia tua mu tunda mu infernu, diene di ta o mukutu uetu uoso mu mulengu.

⁷ Kuma o mbutu ioso ia iama, ni mbutu ioso ia jinjila, ni ia tubamba tu zanzala, ni ia jimbiji mu menha, ene ku i tolola kuala o mbutu ia muthu.

⁸ Maji o dimi-phe, kana muthu luua ua tena ku di tolola! O dimi kimbamba kiaiibha, kiaẋinuka, kiezala ikolakola ia kalunga! O dimi kana muthu u tena ku di tumina!

⁹ O dimi diene di tu bheza na-diu Ngana dia Tata, diene ue di tu xinga na-diu athu a a bhanga mu kidifuanganu kia Nzambi.

¹⁰ Mu kanu dimoxi mu tunda maka a ujitu, mu tunda o ndaka. Phange jami, tata! Imʼiii ki kiene ki ia tokala kukala!

¹¹ Kifua bhʼotho ia menha, kididi kiene kimoxi, bhu fuafua menha matouala ni menha ma ngangama?

¹² Inga mufiku, phange jami, u tena kubhana jinjotona, mba kixina kia muvide ki bhana jifiku? Kiene ue, otho ia menha ki i tena kubhana menha a tome ni menha a môngua.

Unjimu u tunda bhulu

¹³ Nanhi mudienu uejiia, uala njimu? Kiene-phe! Edikize o unjimu ni kuijiia mu muenhu uê uambote ni imbamba ioso ia bhanga mu kubelesela kua unjimu ni kuximbakata.

¹⁴ O ki kala-phe enu mu kala ni difutu, ni kulula, ni kudiuabhela kia ngó enu-enu mu miẋima ienu, ki mu di ximane-phe, ki mu kale mu kuta makutu.

¹⁵ O unjimu u kala kiki, ki unjimu u tunda bhulu, maji ua mu ngongo mumu, ua xitu, ua tundu kua Diabhu.

¹⁶ Kuma bhuoso bhuala o difutu ni kumesena kuila ima ioso eie ngó, bhu kala ue kavuanza ni isunji ioso ia ima iaiibha.

¹⁷ Maji o unjimu-phe u tunda bhulu, u dianga kuzela, anga u tululuka, u lenduka, u bhekela ukamba. Uene u vula kukuatela henda, u bhekela kubhongolola ibundu ia ibhangelu iambote. Ki u moneka katungu, mba u kala ni mangonha.

¹⁸ Mukonda o ibhangelu ia tokala o kuiuka, iene o ibundu ima ku mbutu ja kunu ni kutululuka kuala athu ka moneka mvunda.