Tiiaku 2 - O Mikanda Ikola

Kana kusuua athu mu kuuabha jipholo

¹ Enu phange jami, mua xikana kua Ngana ietu Jezú Kristu, uene ku Ungana, kana kukala jinga ni katungu kʼathu mukonda dia kusuua o jipholo jâ.

² Kuma se mu bokona muthu mu dilombe dienu, ua zuata nela ja ulu ni izuatu ia fina, anga mu bokona ue ni ngadiama, ua di te izuatu ia kuka kiá,

³ enu-phe mu xila iú ua di te izuatu ia fina, muixi: Kididi kiambote kiki, xikama bha-bha. Maji mu ambela o ngadiama, muixi: Imana koko mba Xikama bhoxi bhabha, bhu mbanduʼa inama iami.

⁴ Mu kubhanga kiki, enu muala kuia ni kuditungula mudienu muene, enu muala kuia ni kuxinganeka akuenu ni ilunji iaiibha.

⁵ Ivenu, phange jami nga mi zola: Nzambi ua solo jingadiama mu ngongʼumu phala kukala jimvuama mu kuxikana, alundudi a ungana ua tange Muène ku u bhana oso a mu zola.

⁶ Maji enu-phe jingadiama ki mua mu ji bhana ujitu! Manhi o jimvuama ki ene ène ku mi bhikisa, anga aia ni ku mi sunga-sungila bhu ibhuna ia kufundisa milonga?

⁷ Ki ene ène kuẋonguena o dijinʼodio dia ujitu, Nzambi dia mi luku?

⁸ Enu-phe se mu kumbidila o Kitumu kia Utuminu mua bhange kiambote kala kia mi fuama o kubhanga. Mbata a ki soneka mu Mikanda Ikôla, exi: O mukuenu u mu zola kala ki ua di zola eʼmuène.

⁹ Maji enu-phe, o ki mu kala mu suua jipholo ja athu, kituxi ki mua mu ta. O Kitumu-phe kia mi kuata, mu akua muiônga uê.

¹⁰ Kuma uoso u aiuka o Kitumu kioso, hé u di bhukana-ku ngó diba dimoxi, Kitumu kioso ua ki tondala.

¹¹ Mukonda o ió uambe, uixi: Kana kuta phànda, uambe ue uixi: Kana kujibha mukuenu. O kiki ki u kamba kuta phànda, maji u jibha muthu, uala u mukua kituxi, ua tondala o Kitumu.

¹² Inda muila-phe ni kuzuela ni kubhanga kioso kia fuama athu a xikamena ku a fundisa mu kitumu ki tu bhana ufuôlo.

¹³ Mukonda o Nzambi kia kà fundisa, ka kà lendukila athu ió a kambele kukala ni henda ia akuâ. Maji o kukuatela henda kua somboka o kufundisa.

O kuxikana ni kubhanga

¹⁴ Ki sedivila-hi, enu phange jami, muthu se uambe, uixi: Kuxikana ngala na-ku, maji ka moneka ima ia bhanga? O kuxikana kuenhoko, ku tena ku mu bhulula?

¹⁵ Mukonda se bhu kala phange ienu ia diiala mba ia muhatu, uala ni tuẋi, mba ua kambe kùdia kuê kua lelu,

¹⁶ enu-phe bhu kala muthu u a ambela, uixi: Sulukenu ni paze, Nzambi a mi kuatekese, mu di fute, mu ikute, maji o ima-phe ia bhindamena ku mikutu iâ, ki mua a bhana-iu! Kienhoko, ki sedivila-hi?

¹⁷ Kiene ue kimoxi: O kuxikanʼoko, kua bhingi ki ku moneka ima iê ia kubhanga, kua di fuila.

¹⁸ Sai-phe ni muthu uila, uixi: Eie uala ni kuxikana, eme ngala ni ima i ngi bhanga. Ngʼidikize-phe o kuxikana kué kua di kalela sè ima i u bhanga, eme-phe mu ima i ngi bhanga, muene mu ngi ku idikiza o kuxikana kuami.

¹⁹ Eie ua xikana kuila sai-ku ngó Nzambi imoxi? Kia uabha! Ni madimonho ue a ki xikana, a teketa ni uôma.

²⁰ Semenhi ia muthu! Tuma-phe ku kʼijiia, kuma: O kuxikana kua di kalela sè ima ia kubhanga, kuxikana kua ngoho.

²¹ Mukonda diahi, o Mbalahamu dia kukululuʼetu, Nzambi ua mu tanesene? Mukonda dia ima ia bhangele, kia satele monʼê Izake bhu kalatodio.

²² Mua mono, kuma, o kuxikana kuê kua kalakala kumoxi ni ima ia bhangele. O mu ima ia bhangele, kuxikana kuê kua tenena.

²³ Kienhiki, o kia-mbe mu Madivulu Makôla anga ki bhita kiedi, exi: Mbalahamu ua xikana Nzambi, o mu kuxikana kuê muene Nzambi mua mu xikinina ni ku mu tanesa kuma ua lungu. Nzambi anga u mu ixana, uixi: Kamba diami Mbalahamu.

²⁴ Mua mono kuma, kua Nzambi, muthu a mu xikinina mu ima iê ia bhanga, kana ngó mu kuxikana kuê.

²⁵ Manhi ki kiene ue kia bhitile ni Lahaba dia kidianzunga, kioso kia tambulula o ilolo ia Jijudé ku dibhata diê, iú ua i sulula njila iengi? Muène-phe ua bongele ujitu kua Nzambi mukonda dia ima iê ia bhangele.

²⁶ Kuma, uila ki ala o mukutu, se ua di kalela sè nzumbi, uafu; kiene ue o kuxikana, kua di kalela sè ima ia kubhanga, kuafu.