Sofoniia 2 - O Mikanda Ikola

Jindumu ku muiji ua akua Fidíxia

¹ Dibhongolole, luamukuá dingi, dibhongolole u di tongolole kia mbote eie u muiji kuene ni sonhi!

² Kioso ngongo kiluua itunda, kizuua kiluua kiza kia kubhita kala ibhiate ia-lu phephuluka ni kitembu, kioso njinda ia Ngana kiluua iza, kuthandu dienu, xi, kioso kizuua kia njinda iê ku thadu dienu kiluua kiza.

³ Sotenu Jihova enu oso mua batama miẋima, muala mu ngongo, muene mu ku kaiela o mabatuilu mê; Sotenu kubhanga o mbote, Sotenu o kulenduka ni kubatama, sumba bhu kizuua kia njinda iê, Jihova u mi sueka.

⁴ Ngaza ua kà bhindama kuma ua kà xala ngoho; Axikilone ua kà muangana hé uxala ngundu; Ajindode a kà mu kaia-kaia ni ku mu bhunda, mu kumbi dia mediia, ua kà jimuka; o Ekolone a kà mu vuza, uendelela muene, nzaká.

⁵ Lamba dia ió oso a tungu ku ndundu ia kalunga, kokolo dia mundu ua ifuẋi ia akua Keleta! Kizuelu kia Jihova kia kà tula kokuenu enu mu akua Kanana, mua tunga mu ixi ia akua Fidíxia; nga kà mi muanga katé ni umoxi ngó kaxala-ku, u tunga momué.

⁶ O ndundu ia kalunga ia kà kala dikela ni ikunha mu dila ibhaku, ni jifundu phala abidi, ni ibhanga phala o ilunga.

⁷ Ndundu ia kalunga ia kà kala iangene phala oso a subhuka ku muiji ua Juda, nʼaxalela momo; muene mua kà disila o ilunga iâ ia ibhaku; o mu ngoloxi a kà zekela mu jinzu ja Axikilone, mukonda o Jihova Nzambi iâ ua kà a zungila, o uíndua uâ ua kà u lungulula kuzediua anga u a tula dingi bhu kididi kiâ; o jihutile jâ ua ka ji vutula dingi kʼoxi iâ.

Jindumu kua Mouabhe ni Amone

⁸ Eme ngevu o môndo uene mu kuta Mouabhe ni kuxinga kua anʼa Amone, kia mu kuata kutobhesa ni kubhana malebhu ku mundu uami anga ene a di zangeleka ni ixi iâ.

⁹ Kala kiki, mu kidi kiene, Eme Jihova dia ifuẋi, Nzambi ia Izalaiele, nga lokela muenhu uami kuma Mouabhe ubuika kala Sodoma, anʼa Amone a di bhanga kala Ngomola; o ixi iâ i di bhanga kangu dia môngua, mu sabhuka isása i xixima, i biluka ngundu i nangenena, kuma ene aia muene nzaká, kà moneka dingi. O ió oso a subhuka ku mundu uami, a kà kituka ene tubhinganu tuâ, a subhuka ku athu ami a kʼèza hé a a kuata anga a avua.

¹⁰ Kuma kene o kazabu ka izala iâ, mukonda a di zangeleka, ni kutobhesa o mundu uangene ua Jihova dia Ifuẋi.

¹¹ Jihova ua kà a lungulukila, o jinzambi joso ja mu ngongo anga u ji jikinisa; akua jixi ene oso a kʼèza kua Muene ku mu bheza, tunde mu ididi iâ ni miji ioso mu ikolo.

Jindumu kua Itiiópia ni Asídia

¹² Enu ue mu akua Etiiópia ki mu subhuka ku xibhata iami.

¹³ Lukuaku luê lu bhiẋila ue ku suku, ni Asídia u jima, o Ninive uxala ngundu, u kituka ixi ia kukuta mukuâ ni kikangalakata.

¹⁴ Mu kaxi kâ mua kà di bhanga dikèla dia kunhohena jimbudi ni ibhaku ioso ia athu; o iama ia mukáu ue, muene mu nangu diâ; o isaka ni minzoue ia kà tunga mu jinzo ja thandu, dízui dia kuimba kuâ a divila mu jinjanela, o bhu mielu bhua kà di bhanga maxita, mukonda o maleka ni huua ia sédulu kʼonzo a i katula-ku kiá.

¹⁵ Iii-phe iene o mbanza, o mbonge iadijimbi iala kutumbujuka ni ngalasa, ni ku di dielela iene, hé uia ni kuzuela mu muẋima uê, uixi: Eme ngó kuabhu, ki bhuala dingi nga soko-nê! Kiki-phe ueza ngúndu, ua biluka dinangu dia iama! Muthu uoso ubhita-mu, u diuuana! Uxika muphióphio, hé u bhabha ibhubhu!