Sofoniia 1 - O Mikanda Ikola

O kizuua kia Jihova. Jindumu kua Juda ni Jeluzaleme

¹ Kizuelu kia Jihova kieza kua Sofoniia, monʼa Kuxi, monʼa Jedaliia, monʼa Amadiia, monʼa Hezekiia, mu izuua ia Joziia, monʼa Amone, Sobha ia Juda.

² Jihova, uixi: Nga-nda kua kà jima ioso iala mu ngongo ku thandu dia ixi.

³ Nga kà jikinisa muene ni athu ni iama, nga kà jima jinjila ji bhita bhulu ni jimbiji mu kalunga, nga kà jimunaku o idibhukanu ioso kumoxi ni iá abhukumuka; Jihova uixi: Nga kà muanga athu oso, kulu dia mundu anga abhua-ku.

⁴ Nga kà sunununa lukuaku luami kua Juda mu kuzoka-nê, ni kua ene-oso a tungu mu Jeluzaleme, anga ngi zubha kujikinisa mu kididi kiki ió oso a subhuka kua Baale, ni dijina dia akua kubhakuila iteka ni jinganga jâ;

⁵ ni iá a mu sambela mù bheza ifuẋi ia diulu ku thandu dia jinzu jâ; ni iá a fukama mu kubheza Nzambi, anga a lokela kua Ngana ni kua Mala-kane;

⁶ ni iá a xisa kuendela mu njila ia Nzambi, ni iá aditunu kusota Nzambi mba kuibhula dingi kua muene.

⁷ Eie-phe ximbakata bhu pholo ia Jihova Nzambi ié, kuma kizuua kia Jihova kia zukama. Mukonda Jihova ua iudika kiá o sata iê, iú ua zelesa asonhi oso a exana kuala muene.

⁸ Kia kà kala-phe kiki: Mu kizuua kia sata ia Jihova, nga kà bhana kastiku ku makota ni ku anʼa sobha, ni ene-oso kiá ene mù zuata o izuatu ki ia a tokala.

⁹ Mu kizuʼokio nga kà beta ue ene oso ió a bokuena bhulu dia muelu, anga ezalesa jinzo ja jingana jâ ni kusuina ni usuéia.

¹⁰ Mu kizuʼokio, Eme ngi Jihova, a kèva dízui dia mitendu ni kudila, tunde bhu Muelu ua Mbiji, ni mikemu ku mbandu ia Mbanza Iaubhe, o ku milundu ue malamba mʼonéne.

¹¹ Dilenu enu mua tungu Makatexi kuma mundu uoso ua Kanana ua jimi, akua kuambata itadi ia phalata ene-oso a buila.

¹² Anga kià kala-phe kiki: Mu izuuʼomo nga kà solokota Jeluzaleme ni tundeia, nga kà bhana kastiku ku athu a xikama ku mavunze a vinhu, anga a zuela ku miẋima iâ, exi: Kua Ngana ki kuizé kima. Kuma Jihova imʼii kene ku i suua, kuila ubhanga kiambote mba ubhanga kiaiibha.

¹³ Mukonda dia kiki, mabhata ma enhó a kà ma bhûnda, o jinzu jâ ja kâ muangana. A kà tunga jinzu, maji ka kà zeka-mu; a kà dima mábhia ma mivide, maji hadi ia ngó, vinhu iê ka kà inua.

¹⁴ Kuma kizuua kionéne kia Jihova kia zukama; ku kizuelu kiê, kia-nda kuiza muene lusolo, ki ki kokoloka; bhu kizuua kia Jihova katé ni mazonda a kà di bhana mitendu mukonda dia uoma.

¹⁵ Mbata kizuuʼokio kizuua kia njinda, kizuua kia malamba ni phaxi, kizuua kia kavuanza ni mukondo, kizuua kia mujijima uadikota ni kuvunda kuonéne, kizuua kia matuta mavulu ni mbundu iavundu, kizuua kia kitombe kiedi muene buí!

¹⁶ Kizuua kia kuxika koloneta ni mitendu ia kumuanga jimbonge jʼonéne ni tuthôndo tua dileka.

¹⁷ Athu nga kà a tatesa anga mu kuenda kuâ a biluka kala ifuófuo, mukonda a te ituxi kua Jihova; o manhinga mâ ma kà di muangena bhoxi kala fufuta, o mikutu iâ ia kà kituka mukuâ ni ditobe.

¹⁸ O phalata iâ ni ulu uâ ki itena ku a kudila mu kizuua kia njinda ia Jihova; maji ku túbhia tua njinda iê ixi ioso iii ia kà jikata; mukonda, ni kidi kiene, Muene athu oso a tunga mu ngongo ua-nda ku a buikisa muʼanzanzʼumu né ngó muthu ka kà subhuka-ku.