Obadiia 1 - O Mikanda Ikola

O ituxi ni kaxtiku ka Idomo. O kubhanduluka ni kuzediua kua Izalaiele

¹ Kisuma kia Obadiia. Kienhiki kia tange Ngana dia Jihova kua Idomo: Tuene mu kuívua o ulongelu ua Ngana; ku jixi joso a tumukisa-ku mukunji, kuila: Balumukenu, tu imane, tuie mu kúlua ita ni Idomo.

² Talesa, eie nga ku tolesa muʼaxaxi ka akua jixi; ua beta kusebuluka mu akuenu.

³ Ukumbu ua muẋima ué ua ku nganala, mukua ni ió uoso u tunga mu mabanda a matadi; kifua ua tungu ua somo, hé u tanga ku muẋima uê kuma nanhi ua kà ngi muanga kulu dia mundu?

⁴ Né u di leka kala holokoko, ni u te kikalanga kié mu jithéthembua, kuenhoko nga kà ku lundumuna-ku, kiene kiambe Ngana.

⁵ Se kua ku ijiie eii, mba akua kubula ni usuku, (tala kioso ngó kia ku muange!) manhi keje kunhana katé kia lémbua? Se akua kubhongolola jiuva ejiie ko kué, manhi keje kuxisa tuílende tua ijimbuete?

⁶ Tala kia bhongolola imbamba ia Ezaú! Tala kia di bongo ni kusolokota o masuamenu mê!

⁷ Makamba mé ma akua jixi jengi ma ku xinjikila ni ku ku bheka ku kanga katé kia ku tubhula mu mbambe; oso a dielela o kutululuka kué a ku nganala katé kia ku lende; o ene kúdia ku mbolo ié, lelu a ku tela mubhetu mu inama; eie-phe ua lémbua ku kʼijiia.

⁸ Manhi ki kia-nda kubhita kizuuʼokio, eme ngi Ngana, ki nga-nda kutatesa o jinjimu joso ja Idomo anga ngi ji jima o mbutu, kumoxi ni maunjimu moso ma mulundu ua Ezaú?

⁹ O mazonda mé, eie Temane, a-nda kukala ni uoma, phala athu oso a buike ku kijibha, mu mulundu ua Ezaú.

¹⁰ Mukonda dia kukakela phangʼié Jakobo, kua kèza kavanza ku thandu dié, katé ki u jima mbutu ku hádia ni hádia, nzaká.

¹¹ Mu kizuua ki ua mu mono pholo, kioso akuʼaxi iengi ki ambata o ilômbo iê ku ubhika, o athu engi hé a bokona bhu mabhitu ma Jeluzaleme, anga a mu tela jisorte, eie-phe ue ua di tele-nâ kumoxi, kuma eie ue bhene bhu ua kexi.

¹² Eie kua tokalele kusangulukila kizuua kia phangʼiê, o kizuua kia kubhondalala kuê, kia mu bheka mu ubhika; né o kizuua kia kubuika kua anʼa Juda eie u ki tanena, mba kanu dié u di zambesa ni kuzuela mu kizuua kia kubhondalala kuâ.

¹³ Né ngó kubhita bhu muelu ua povo iami mu kizuua kia lamba diâ, xi, mukonda eie ku fuamena kutala o hadi iâ ni mesu mé, hé u ki sangulukila, mba kuzangula maku mé ku thandu dia ilômbo iâ mu kizuua kia divuua diâ.

¹⁴ Né ngó ku a batuila bhu jiphambu phala kubuidisa oso ala kulenga, mba kuthelekala iá a subhuka-ku mu kizuua kia lamba diâ.

Nzambi ua kà fundisa o miji

¹⁵ Mbata o kizuua kia Ngana kia zukama ku thandu dia mundu uoso ua akua jixi jengi; kioso ue ki ua bhanga eie, kiene muene ue kia kà ku vutuila. O futu ia kuiibha kué ku ua bhange, iene ia kà ku vutukila ku thandu dia mútue ué muene.

¹⁶ Kuma, kala enu kioso ki mua nuina ku mulundu uami ukôla, akua jixi jengi ue a ka tana thembu joso mu kúnua kala enu, a kà nua, a kà zuuela muene hé a kà minha, anga a kèla kala nuka a ki kexile.

O kikoue kia akua Izalaiele

¹⁷ Maji-phe ku mulundu ua Ziione kua kala kubhanduluka; kuá kala kuiuka kuma mulundu ua kà kala mulundu ukôla; anʼa Jakobo a kà lundula mabhata mâ.

¹⁸ Dibhata dia Jakobo dia kà kituka túbhia, o dia Zuze mulengu, maji o dia Ezau di di bhanga mafe a kukuta, a kuuika túbhia tu tunda kua ió katé muene kia buila; phala ki bhu xale dingi muthu mu dibhata dia Ezau; mukonda dikanu dia Jihova dia ki tange.

¹⁹ O akua sulu ene a kà lundula mulundu ua Ezau; o akua mikáu mu kiphenza, ene a kà lundula ixi ia akua Fidíxia; a kà lundula ue mikáu ia Ifalaíme, ni mikáu ia Samádia; o Bejamí ua kà tambula Ngiliiade.

²⁰ O abhika a jihutile ja kilômbo kiki, kia anʼa Izalaiele oso a a balakala, ala mu kaxi ka akua Kanana, a kà lundula ixi ia akua Kanana katé mu Zalefate; o iá aii ku ubhika a a kutile mu Jeluzaleme ia ala mu Sefalade, a kà lundula jimbonge joso ja sulu.

²¹ O ku mulundu ua Ziione kua kà banda abhuludi phala kufundisa o mulundu ua Ezaú; o utuminu-phe ua kà kala ua ngene ua Jihova.