Nzuá 9 - O Mikanda Ikola

Jezú uilula muthu a mu vuala kifofo

¹ Kia kala mu kubhita, Jezú u mona muthu a mu vuala kifofo.

² Jixibulu jê anga a mu ibhudisa, exi: Mesene, phala-hi muthu iú a mu vuala kifofo? Nanhi uate kituxi? Muène ua te kituxi, inga o jitata jê a te kituxi?

³ Kuala Jezú: Muène kala kifofo mukonda dia ituxi iê iate, mba mukonda dia ituxi ia jitata jê; maji muène uala kifofo, nda o kutena kua Nzambi ni ku di londekese mua muène.

⁴ Kioso ki kuala hanji muanha, kia ngi bhingi kubhanga o ikalakalu ia ió ua ngi tumu. Mukonda usuku iú uiza, mua bhingi kana muthu utena kukalakala-mu.

⁵ Kioso ki ngala hanji mu ngongo, ngala ngi mukengeji ua mundu.

⁶ Kia zubha o kuzuela kiki, Jezú u ta mathe bhoxi, u bhanga-bhu malôua ni mathe-mê, o malôua u ma ta mu mesu ma kifofo.

⁷ Anga u mu ambela, uixi: Ndé, ka di sukule mu dizanga dia Silôua. (Dijinʼ idi, mu ku di jimbulula diedi: A mu tumu). Muène anga uia-bhu, hé u di sukula. O mu kuiza, ua-lu mona kiá kiambote.

⁸ Akua diembu diê, ni oso a mu ijiia okulu kuma mubhingi a jimola, exi: Ki muenhú ua xikamene jinge mù bhinga jimola?

⁹ Amukuá exi: Muène! Amukuá exi: Kana, ki muène! Ua di fangana-nê ngó. Muène uixi: Eme-muène!

¹⁰ Ene bhenhobho a mu ambela, exi: Mesu mé-phe, ma jikuka kiebhi?

¹¹ Muène uixi: Muthu a mu ixana Jezú, ua bhange malôua, ua ngi uaie-nâ mu mesu, iu ua ngʼ ambela, uixi: Ndé, kà di sukule mu dizanga dia Silôua. Eme ngele-bhu, nga di sukula, anga ngi kala mu kumona.

¹² Exi: Muène iú kuebhi? Uixi: Manhí!

Jifalizeu ji kuata kuibhula

¹³ Muenhú ua kexile kifofo, anga a mu bheka ku Jifalizeu.

¹⁴ Kiene-phe kizuua kia Sábhalu kia bhange Jezú o malôua, anga u mu jikula mesu.

¹⁵ Jifalizeu anga ji mu ibhudisa dingi, mba ua tena kiebhi o kumona. Muène ua ambela, uixi: Muène ua ngi te malôua mu mesu, eme nga di sukula, kiki ngala kumona.

¹⁶ Jifalizeu jamukuá, jexi: Muthu ió ua bhange kiki, ka tundu kua Nzambi, mukonda o Sábhalu ka i aiuka. Amukuá, exi: Mukua-ituxi utena kiebhi, kubhanga madiuanu kala iá? Anga a di uanuna mudiâ.

¹⁷ Bhenhobho jifalizeu anga ambela dingi o kifofo, exi: Eie uambe kiebhi, kua ió ua ku jikula o mesu? Uixi: Muène, polofeta.

¹⁸ Jijudé-phe ki ja xikana luua kuma muène a mu vuala kifofo, lelu iu uala kumona, katé kia tumu kuixana tatʼâ ni mamʼâ.

¹⁹ Anga a ebhudisa, exi: Muenhú monʼ enu, muala ku mu ila kuma mua mu vuala kifofo? Kiki-phe, uala kumona kiebhi?

²⁰ Tatʼâ ni mamʼâ a vutula, exi: Etu tuejiia kuma muène monʼ etu, tua mu vuala muene kifofo.

²¹ Maji ki tua kʼijiia-phe kioso kiala kumona kindala, mba uoso ua mu jikula o mesu. Mu ibhudisienu muène. Uala kiá ni kitala, muène a di tange kioso kia mu bhiti.

²² Tatʼâ ni mamʼâ a zuela kiki, mukonda dia uôma ua Jijudé. Kuma Jijudé ja tele kiá kikutu kuila, uoso u fisala kuma Jezú muène Kristu, mʼonzo ia kusambela Nzambi, a mu kaiesa-mu.

²³ Tatʼâ ni mamʼâ kiene kia ki ambela, exi: Muène uala kiá ni kitala, mu ibhudisienu muène.

²⁴ Bhenhobho jifalizeu jʼixana lua kaiadi o muthu ua kexile kifofo, anga a mu ambela, exi: Fumanesa Nzambi. Etu tuejiia kuma muthu ió mukua-ituxi.

²⁵ Kuala muène: Se mukua-ituxi, eme ki ngi kʼijiia. Ngʼejiia kima kimoxi: Nga kexile ngi kifofo, kiki-phe ngala kumona!

²⁶ Exi dingi: Muène ua ku bhange kiebhi? Ua ku jikula kiebhi o mesu?

²⁷ Uixi: Eme nga mi ambela kiá, enu ki mu ngʼivu. Phala-hi muandala dingi kuívua lua mukuá? Mu andala mu biluka jixibulu jê?

²⁸ Ene anga a mu xinga, exi: Eiemuène u xibulu iê! Etu-phe tu jixibulu ja Mozé.

²⁹ Etu tuejiia kuma Nzambi ua zuelele ni Mozé. Maji iala ió ki tuejiia kuoso kua tundu.

³⁰ Muène u a vutuila, uixi: Kidiuanu, ki mua kambe ku mu ijiia kuoso kua tundu, sumbala ua ngi jikula o mesu!

³¹ Tuejiia kuma Nzambi kene mu kuívua mukua-ituxi. Maji se muthu-phe u kala mubhezi a Nzambi, hé u bhanga vondadi iê, muenhó Nzambi u mu ívua.

³² Tunde ku dimatekenu dia mundu, kiluua tu kʼivua kuila sai-ku ua jikula mesu ma muthu a mu vuala kifofo.

³³ Muthu iú se ka tundile kua Nzambi, keju tena kubhanga kima.

³⁴ Ene a mu vutuila, exi: Eie u muthu a ku vualela mu nzungule ia ituxi, ua-nda ku tu longa etu? Mu dilombe anga a mu kaiesa-mu.

O ufofo ua nzumbi

³⁵ Jezú ki evu kuma muthu ió mʼonzo ia kusambela Nzambi a mu kaiesa-mu, u takana-nê, hé u mu ambela, uixi: Eie ua xikana o Monʼa Nzambi?

³⁶ Uixi: Monʼ a Nzambi, nanhi Ngana, ngi mu xikane?

³⁷ Kuala Jezú: Eie ua mu mu mona. Eme-muène nga mu ku zuelesa.

³⁸ Muène, uixi: Ngana, nga xikana. Anga u mu fukamena.

³⁹ Jezú anga u zuela, uixi: Eme ngeza mu ngongʼ umu mù fundisa; phala oso ala ifôfo, ka mono, a mone; o oso a mu mona, a biluke ifôfo.

⁴⁰ Jifalizeu jala-nê bhenhobho, kia zuela kiki, exi: Kífua uambe kuma etu tu ifuôfuo, kuambe?

⁴¹ Jezú ua a vutuila, uixi: Se mua kexile mu ifôfo, ki mueju kala ni kituxi. Maji o kiki, ki muala kuila-phe, tua mono, kienhiki hanji kituxi kienu kia xalela.