Nzuá 6 - O Mikanda Ikola

Jezú u disa o midi jitanu ja athu

¹ Kia bhiti imʼiíi Jezú u zaúka ku sámbua dia kizanga kia Ngalileia (a kʼixana ue kia Tibeliiade).

² Kifuẋi kiònene anga ki mu kaiela, mukonda a mono madiuanu mê mala mu bhanga ku jihaxi.

³ Jezú anga u banda ku mulundu, anga u xikama kuenhoko ni jixibulu jê.

⁴ Kienhókio o Phasu, fesa ia Jijudé, ia zukama kiá.

⁵ Jezú kia bhetula o mesu, iu ua kengelela mu jimbandu jê, ua mono kifuẋi kiavulu kia mu kane, anga uambela Felipe, uixi: Kuebhi ku tu sumba jimbolo, athu oso iá nʼ a kale ni kúdia?

⁶ (Jezú uambela Filipe, kiki, ku mu tala kioso kia vutula, mukonda Muène uejiia kiá kioso kia-ndu bhanga).

⁷ Felipe uixi: Jimbolo ja hama jiiadi ja itadi ki ji soko, kala muthu ni a tambule ngó kambandu.

⁸ Xibulu iê imoxi, Mandele, phangeʼ a Ximá Phetele, uixi:

⁹ Bhabha bhuala kamunzangala uala ni jimbolo jitanu ni mbiji jiiadi; ji soka-hi-phe ku mundu uosʼú?

¹⁰ Jezú uixi: Ambelenu o mundu uoso a xikame bhoxi. (Bhu kididi bhenhobho sai-bhu iangu iavulu.) Anga a xikama; ku midi jitanu ja athu kua kambe ngó mù kutena.

¹¹ Jezú anga u tambula o jimbolo, u sakidila Nzambi, anga u a uanena, oso a xikama. Ua a uanena ue o mbiji anga a dia kioso kia tena, katé ki ekuta.

¹² Kia zubha kuikuta, Jezú uambela jixibulu jê, uixi: Nonenu tumbandu tua subhujuka, mbé ki kutexika kima.

¹³ Ene anga a tu nona. Anga ezalesa kuinhi dia ngalu ni kiiadi, ni tumbandu tua subhujuka ku mbolo jitanu; o athu oso ekuta kiá.

¹⁴ Athu kia zubha kumona o kidiuanu kia bhange Jezú, exi: Kidi kiene! Iú muene polofeta a kexi ku mu kinga mu ngongo!

¹⁵ Jezú kia mono kuma andala kuiza ku mu ambata mu nguzu ni ku mu bhanga sobha, u tunda-bhu, anga uia ku mulundu kʼ ubheka uê.

Jezú uenda ku thanduʼ a mabhuku

¹⁶ Kutula mu ngoloxi, jixibulu ji tuluka ku ndùndu ia kizanga.

¹⁷ Anga a di longa mu mbáluku, hé a zaúka mu kuia mu Kafanau. Kuma kua vundu kiá, maji Jezú kiluua eza bhuala ene.

¹⁸ Anga kuiza kitembu kiavulu, kia a tukumuisa, hé ki bhangesa kuila mabhuku ma di zangula.

¹⁹ Ene kia zubha kulemala kiá musanzu ua kilómetro jitanu mba jisamanu, a mona Jezú uala kuenda ku thanduʼ a menha, iú uiza ni kuzukama kua ene. Uôma uavulu anga ua a kuata.

²⁰ Muène-phe, uixi: Eme; ki mu kale ni uòma!

²¹ Ene anga a mu tambulula mu mbáluku ni kusanguluka, kithangana anga a kuaka bhu kididi bhua kanene kuia.

Mundu a sota Jezú. O mbolo ia muenhu

²² O kifuẋi kia xala ku sámbua dia kizanga, kia mono bhala ngó báluku imoxi iòfele, maji Jezú-phe ka di longele-mu ni jixibulu jê, ene ngó o jixibulu a katuka ubheka uâ,

²³ sumbala ki kuákie kuejile jibáluku jamukuá ja tundu mu Tibeliiade, anga ji bhixila bhu kididi bha dile o jimbolo, kia zubha Ngana kusakidila

²⁴ athu kia mono kuma ni Jezú ni jixibulu jê, ene oso kala-bhu, ene a di longa ue mu jibâlukuʼ iji, anga aia mu Kafanau mù sota Jezú.

Jezú, muène mbolo ia muenhu

²⁵ O kia zubha ku mu sanga ku sámbua, a mu ibhula, exi: Mesene, eie kunu ueza-ku kiebhi?

²⁶ Jezú ua a vutuila, uixi: Kidi, kidi, ngi mi ambela: Enu ki mua ngi sotoʼ iki, ki mu ngi sotela mukonda dia kumona idiuanu, maji mukonda dia kúdia jimbolo ni kuikuta.

²⁷ Kana kukalakela o kúdia ku bola, kota o kukalakela kúdia ku nanga katé ku muenhu ki uábhua. Monʼ a Muthu u mi bhana na-ku, mukonda Nzambi Tata ua mu te kidimbu kiê.

²⁸ Ene a mu ambela, exi: Tu bhanga kiebhi, mu kubhanga o ikalakalu ia Nzambi?

²⁹ Kuala Jezú: O kikalakalu kia Nzambi kienhiki, kuila mu xikana ió uoso muène ua mu tumu.

³⁰ Exi: Eie-phe u bhanga kisuma kiahi, phala tu ki mone, ni tu ku xikane? Eie ua-ndu kalakala-hi?

³¹ Jitata jetu ja dile maná mu ixi ia isekele, kala kia ki soneka mu Mikanda Ikôla, exi: Muène ua a bhana o mbolo ia diulu, phala kúdia kuâ.

³² Kuala Jezú: Kidi, kidi, ngi mi ambela: Mozé ki muene ua mi bhana o mbolo ia diulu; maji Tata iami u mi bhana o mbolo ia diulu, ia kidi.

³³ Mukonda o mbolo ia bhana Nzambi, iene ia tuluka mu diulu, i bhana mundu o muenhu.

³⁴ Ene a mu ambela, exi: Ngana tu bhane jinge o mbolo ienhíʼii.

³⁵ Jezú ua ambela, uixi: Eme ngi mbolo ia muenhu. Uoso uiza ko-kuami, kà kala dingi ni nzala, o uoso u ngi xikana eme, kà kala dingi ni dinhota.

³⁶ Nga mi ambela-phe kiá, kuma enu ki mua ngi xikana, sumbala enu mua ngi mono.

³⁷ Oso a ngi bhana kuala Tata, a-ndu kuiza ko-kuami. Uoso-phe ueza ko-kuami, eme ki ngi mu texi, lémbua!

³⁸ Mbata eme nga tuluka mu diulu, kana mu kubhanga o vondadi iami, maji mu kubhanga vondadi ia ió uoso ua ngi tumu.

³⁹ O vondadi-phe ia ió uoso ua ngi tumu, i ngi bhanga, ienhíʼii: Kuila oso muène ua ngi bhana-nâ, ki bhu ngi jimbile umoxi ngó, kikale oso ngʼ a fukununa mu kizuua kia kà suka-ku.

⁴⁰ Mbata o vondadi ia Tata iami ienhiʼii: Kuila uoso ua tale ku Mona, iú ua mu xikana, a kale ni muenhu ki úabhua; eme-phe ngi mu fukununa mu kizuua kia kà suka-ku.

⁴¹ Jijudé bhenhobho ji kuata ku mu longolola, mukonda muène uambe, uixi: Eme ngi mbolo ia tuluka mu diulu.

⁴² Exi: Muenhú ki muène Jezú, monʼ a Zuze? Etu tua mu ijiia ni tatʼâ ni mamʼâ. Muène ua-lu kuila kiebhi, kuma: Eme nga tuluka mu diulu?

⁴³ Jezú ua a vutuila, uixi: Kana kulongolola ngó mudienu!

⁴⁴ Kana muthu u tena kuiza ko-kuami, se Tata ua ngi tumu u kamba ku mu sunga; eme-phe ngi mu fukununa mu kizuua kia kà suka-ku.

⁴⁵ Kiôsoneke mu divulu dia Jipolofeta, exi: Ene oso à kala òlonge kua Nzambi. Kienhiki, uoso uevu kua Tata, iu ua di longo kiá kua muène, uiza ko-kuami.

⁴⁶ Kiki-phe ki mukonda dia kuila sai kiá muthu ua mono Tata; inda iuná ngó ua tundu kua Nzambi, muène ua mono Tata.

⁴⁷ Kidi, kidi, ngi mi ambela: Uoso u ngi xikana eme, u kala ni muenhu ki úabhua.

⁴⁸ Eme ngi mbolo ia muenhu.

⁴⁹ Jitata jenu ja dile maná mu ixi ia isèkele, maji àfua.

⁵⁰ Mbolo iii-phe, ia tuluka mu diulu, se muthu u i dia, ka fuê dingi.

⁵¹ Eme ngi mbolo ia muenhu ia tuluka mu diulu. Se bhu kala muthu u dia o mbolo iíi, muenhu uê ki ua kà bhua dingi. O mukutu uami, iene o mbolo i nga-nda kubhana, phala o mundu ni u kale ni muenhu.

⁵² Jijudé bhenhobho ji di kuata mudiâ, exi: Muthu iú ua-ndu tu bhana kiebhi o mukutu uê ni tu u di?

⁵³ Jezú anga u zuela dingi, uixi: Kidi, kidi, ngi mi ambela: Se mu kamba kúdia xitu ia Monʼ a Muthu, se mu kamba kùnua manhinga mê, ki mu tena kukala ni muenhu moxi dienu.

⁵⁴ Uoso u dia xitu iami, hé u nua o manhinga mami, uala ni muenhu ki uàbhua; eme-phe ngi mu fukununa mu kizuua kia kà suka-ku.

⁵⁵ Kuma o xitu iami kúdia kua kidi, o manhinga mami kùnua kua kidi.

⁵⁶ Uoso u dia o xitu iami, hé u nua manhinga mami, muène u xala momuami, eme ue ngi xala mo-muê.

⁵⁷ Kala eme kia ngi tumu Tata iami uala ni muenhu, eme o muenhu nga u muena kua Tata; kiene ue uoso u ngi dia eme, muenhu u u muena ko-kuami.

⁵⁸ Iíi iene o mbolo ia tuluka mu diulu. Ki i soko dingi ni mbolo jitata jenu ia dile, anga àfua. Uoso u dia mbolo iíi, uà kola muenhu sé dizubhilu.

⁵⁹ Imʼiíi Jezú ua i tange mu dilombe, kia kala mu kulonga mu Kafanau.

Jixibulu jamukuâ ji vutuka ku dima

⁶⁰ Bhenhobho jixibulu jê jamukuá javulu, ki ja zubha ku mu ívua kiki, exi: Makʼ ama mala kulonga, ma bhonzo! Imʼ iíi nanhi u tena ku i xikina?

⁶¹ Jezú-phe kia kʼijiia moxi diê sé muthu ku mu tangela, kuma jixibulu ja longolola makʼ ama, ua jʼ ambela, uixi: Kífua enu uenu muandala mu ngi xa, mukonda dia makʼ ama, kuambe?

⁶² Ki kala-phe kiebhi hádia, se mu tala Monʼ a Muthu iú banda kunhá, kua kexile mʼ okulu?

⁶³ O Nzumbi ia Nzambi muène u bhana o muenhu; o muthu ka tena-phe kubhandulula kima. O maka iá, u nga mi tangela-nâ, a Nzumbi ni muenhu.

⁶⁴ Maji o muʼaxaxe kenu-phe, sai-mu ni iá ka xikana. (Mukonda Jezú, ua kʼijiia tunde ku dimatekenu, oso a kambe kuxikana, ua kʼijiia ue uoso ua-nda ku mu sumbisa).

⁶⁵ Uixi: Kiene ki nga mi ambelela-kiu, ngixi: Kana muthu u tena kuiza ko kuami, se a kamba ku mu bheka kuala Tata.

⁶⁶ Mukonda dia kiki, tunde kiá kumbi dienhódio, jixibulu jamukuá ja vutuka ku dima, kende dingi ni Jezú.

⁶⁷ Jezú anga uambela kuinhi ni kiiadi, uixi: Enu uenu mua mesena kuienu?

⁶⁸ Ximá Phetele u vutula, uixi: Ngana, tuia kua nanhi? Eie-eie uala ni maka ma muenhu ki uâbhua.

⁶⁹ Etu tua xikana, tua kʼijiia kuma eie u Muthu Ukôla ua tundu kua Nzambi.

⁷⁰ Jezú ua ambela, uixi: Manhi ki eme nga mi solo enu, mu kuinhi ni kiiadi? Maji mu ʼaxaxe kenu-phe, saimu ni diabhu!

⁷¹ Muène bhobho-phe ua tange Juda, monʼ a Ximá Kadiota. Kuma Juda muène ua-nda ku mu sumbisa, sumbala ua tokala mu kuinhi ni kiiadi.