Nzuá 5 - O Mikanda Ikola

Jezú u saka haxi bhu dizanga dia Betesda

¹ Kia bhiti imʼiíi, ku kala fesa ia Jijudé, Jezú, anga u banda ku Jeluzaleme.

² Mu Jeluzaleme-phe, bhu mbandu ia Dibhitu dia Jimbudi, bhuala dizanga, a dʼixana mu dimi dia Hebeleu, exi: Betesda mba Betezata. Dizanga dienhidi a di tungila itelembe itanu ia kubokuena.

³ Mu itelembeʼ umu, u sanga bhoxi bhua zeka jihaxi javulu: Ni ifôfo, ni inema, ni jihaxi jamukuá, [ala mù kinga o menha ku di vunza.

⁴ Mukonda ku jithembu, anju ia kexi mù tuluka mu dizanga, mu kuvunza o menha. Uoso-phe u tuama ku di ta mu menha, ma vunzuka kiki, uiluka ku uhaxi uê uoso-uoso.]

⁵ Anga bhu kala muthu bhenhobho, uhaxi uê ua bhange na-u kiá makuinhi atatu a mivu ni nake.

⁶ Jezú kia mu mono uazeka, kia mu ijiia kuma ua kata kiá ukulu, ua mu ibhula, uixi: Eie uandala kuiluka?

⁷ Haxi ua mu vutuila, uixi: Ki ngala, ngana, ni muthu, u ngi ta mu dizanga, ki vunzuka o menha. Ki ngiia ngi sota kuia-mu, mukuetu ua ngi tuamenena kutuluka-mu.

⁸ Jezú ua mu ambela, uixi: Balumuka, zangula o hama ié, nda uende.

⁹ Kithangana kienhókio muthu ueluka, hé u katula hama iê, anga uenda. Kizuua kienhókio, kizuua kia Sábhalu.

¹⁰ Jijudé anga jʼambela iú ueluka, exi: Lelu kia Sábhalu. Mu Kitumu kietu, lelu ki kôla kuambata o hama ié.

¹¹ Muène-phe ua a vutuila, uixi: O Diiala ua ngʼilula, muène ua ngʼambela, uixi: Zangula hama ié, nda uende.

¹² Ene anga a mu ibhudisa, exi: Mukuahi ua ku ambela, kuila: Zangula hama ié nda uende?

¹³ Muenhú-phe a mu sake, ka mu ijiia mba mukuahi; mbata Jezú ua jimukina mu kifuxi, kia athu a kexile bhenhobho.

¹⁴ Mu kithangana kiengi, Jezú u mu sanga mu Tembulu, anga u mu ambela, uixi: Talesa, eie uelukʼó; ku te dingi kituxi, phala o lamba dia beta ki di ku kuate.

¹⁵ Muthu iú anga u tunda-bhu, uia kutangela Jijudé kuma Jezú muène ua mu sake.

¹⁶ Mukonda dia kiki, Jijudé ji kala mù zukutisa Jezú, kuma ua bhange ima iíi mu kizuua kia Sábhalu.

¹⁷ Jezú-phe ua a vutuila, uixi: Tata iami ua mu kalakala katé kindala; eme uami ngi kalakala.

¹⁸ Mukonda dia kiki, Jijudé ji kala ku mu sota dingi ni nguzu ioso phala ku mu jibha; ki mukonda ngó dia kutondala o Sábhalu, maji mukonda ue dia kuixana Nzambi Tata iê, kifua ua di sokesa ni Nzambi.

Jezú ua dʼixana Monʼ a Nzambi, ua soko ni Tata

¹⁹ Jezú anga u kuata dingi mù zuela, uixi: Kidi, kidi, ngi mi ambela: Mona ka tena kubhanga kima kʼubheka uê, kala u bhanga ngó ioso ia mona Tata kubhanga. Kuma ioso ima i bhanga Tata, ni Mona u i bhanga kiòmuene.

²⁰ Mbata Tata ua zola o Mona, ua mu idikiza ima iene mù bhanga. Ua-nda ku mu idikiza dingi ue ikalakalu ia tundu iíi, enu ni mu diuane.

²¹ Mukonda kala Tata kia fukununa afi, hé u a bhana muenhu, kiene ue o Mona u bhana muenhu kua oso a mesena.

²² Tata ka fundisa muthu; maji ua tula o kufundisa bhu maku ma Mona;

²³ mbé oso nʼ a xile Mona, kala kia xila Tata. Uoso ua kambe kuxila o Mona, ni Tata ua mu tumu, ka mu xila.

²⁴ Kidi, kidi, ngi mi ambela: Uoso uívua dízui diami, nʼ a xikane ió ua ngi tumu, mùene uala ni muenhu ki uàbhua; ka tena dingi kuêla, maji ua tundu kiá ku ʼalunga, iu bokona ku muenhu.

²⁵ Kidi, kidi, ngi mi ambela: Kumbi dí diza, o diene dia bhixila kiá, dia afi kuívua o dízui dia Monʼ a Nzambi. Oso-phe a dʼivua, a phaphumuka hé a laia.

²⁶ Kala Tata muene, kiedi muène Otho ia muenhu, kiene ue ua bhana Mona kukala ni muenhu moxi, diêmuène.

²⁷ Iu ua bhana Mona o kutena kua kufundisa, mukonda muène Monʼ a Muthu.

²⁸ Mukonda dia kiki, ki mu diuane. Kuma kumbi dí diza, dia oso ala mu jimbila kuívua o dízui diê, ni kutunda-mu.

²⁹ Oso a bhange kiambote, a kà fukunuka mu kutambula o muenhu ki uàbhua. Maji oso a bhange kiaiibha, a kà fukunuka phala ku a êlesa.

O kutena kua Jezú

³⁰ Jezú anga u kala dingi mu ku a tangela, uixi: Eme kʼ ubheka uami, ki ngi tena kubhanga kima, ki kala ki ngʼívua kua Tata, kiene ki ngi fundisa. O kufundisa kuami-phe kua kidi, mukonda ki nga-lu sota kubhanga vondadi iami, maji o vondadi ia ió ua ngi tumu.

³¹ Se eme-muene ngi di bhela umbangi, umbangi uami ki ua kidi.

³² Maji sai uengi u ngi bhela umbangi; ngejiia kuma umbangi ua ngi bhela ua kidi.

³³ Enu mua tumine kuibhula Nzuá, muène-phe ua mi tangela o kidi.

³⁴ Eme ki ngi bhindamena umbangi ua muthu; maji kiki nga ki zuelela phala enu mu bhuluke.

³⁵ Nzuá ua kexile mukuâ ni kandeia ka uama, ka muika; enu-phe kia mi uabhelele kusanguluka kathangana mu mukengeji uê.

³⁶ Maji eme sai hanji umbangi u ngala na-u, ua tundu o umbangi ua ngi bhela Nzuá—o ikalakalu i ngi bhanga. Mbata o ikalakalu ia ngi bhana Tata kubhanga, iene ia beta ku ngi bhela umbangi, mukonda iene ia mu lombolola kuila o Tata muene ua ngi tumikisa.

³⁷ Ni Tata muene ue ua ngi tumu, uala mbangi iami. Enu kana kizuua ki muevile dízui diê, kiluua mu mona o pholo iê.

³⁸ Ni maka mê, ki ma mi kala moxi dia miẋima ienu, mbata ni muthu a mu katula muène, enu ki mua mu xikana.

³⁹ Enu muene mu kutanga mu madivulu ma Nzambi, mukonda mua fika kusanga muenhomo o muenhu ki uàbhua. O Madivulu enhó, jene-phe jimbangi jami jala ku ngi tanga eme.

⁴⁰ Enu-phe nguenu kuiza ko-kuami, ni mu tambule o muenhu.

⁴¹ Eme ki nga mu sota fuma ku athu. Mukonda enu nga mʼijiia kiambote.

⁴² Eme nga mono kuma, Nzambi ki mua mu zolo mu kidi moxi dienu.

⁴³ Mbata eme ngeza mu dijina dia Tata iami, enu-phe ki mu ngi tambulula. Se muthu uengi uoso-uoso uiza mu dijina diê-muène, muenhó enu muene mu mu tambulula.

⁴⁴ Mu tena kiebhi o kuxikana, se enu mu di bhana fuma mudienu, o fuma-phe i tunda ngó kua Nzambi nguenu ku i sota?

⁴⁵ Ki mu fike kuma eme ngà mi tatela kua Tata. Sai ua kà mi tatela, muene Mozé, mua mu dielela.

⁴⁶ Mbata se mua xikanene Mozé, mueju ngi xikana ue eme, mukonda muène o ioso ia soneka, ua ngi tumbula eme.

⁴⁷ Se mua kambe kuxikana ioso ia soneka muène, mu xikana kiebhi o maka mami?