Nzuá 4 - O Mikanda Ikola

O muhatu ua mukuâ Samádia

¹ Ngana kia zubha ku kʼijiia kuma jifalizeu a mu ivu ni kubhanga ni kubatizala jixibulu javulu, Nzuá ndenge,

² (Sumbala Jezú ki muène ua kexile mù batizala, maji o jixibulu jê.)

³ Muène ua xi mu Judeia, anga u vutuka dingi ku Ngalileia.

⁴ Mu njila kia mu bhingi kubhita mu Samádia.

⁵ Anga u tula bhu sanzala ia Samádia i exana Sikale, ia zukama ni mábhia ma bhele Jakobo kua monʼ ê Zuze.

⁶ Bhene bhu kixima kia Jakobo. Jezú kuma ua tundu ni kubhuila mu njila, ua xikama kiki bhu mbanduʼ a kixima. Diene kumbi dia mediia.

⁷ Muhatu ua mukua Samádia anga uiza mù sunga menha. Jezú ua mu ambela, uixi: Ngi bhane-ku tumenha, ngi-nue, nga ku diondo!

⁸ (Kuma jixibulu jê jaii mu sanzala mu sumba kúdia.)

⁹ Muhatu ua mukua Samádia, uixi: Eie u Judé, ua-lu ngi bhinga kiebhi menha a kúnua, eme ngi mukua Samádia? (Muène ua zuela kiki, mukonda akua Judeia ni akua Samadia a di zemba.)

¹⁰ Jezú anga u mu vutuila, uixi: Eie se uejidile o ujitu uene mù bhana Nzambi, o ua ku bhingi menha ue, se ua mu ijidile, eie ueji ku mu bhinga muène, nʼa ku bhane menha ma muenhu.

¹¹ Muhatu, uixi: Ngana, eie kuala ni kizenzu kia kusunga na-kiu o menha, kixima kia zongo. O menha ma muenhuʼó, u ma sanga kuebhi?

¹² Tatʼetu Jakobo, muène ua tu bhana o kiximʼ iki. Ni muène ni anʼê, ni ibhaku iê, anua jinga o menha mu kixima kienhiki. Kífua eie ua beta kota, o tatʼetu Jakobo ndenge?

¹³ Kuala Jezú: Uoso u nua menhʼama, u kala dingi ni dinhota.

¹⁴ Maji uoso u nua o menha mu ngi mu bhana, nuka a kala dingi ni dinhota. Mukonda menha mu ngi mu bhana, ma-ndu biluka fixi moxi diê, i fuáfua menha ma kalelà-ku ndú ku muenhu ki uábhua.

¹⁵ Eme muhatu: Ngana, ngi bhaneku ku menha menhʼama! Phala dinhota ki di ngi kuate dingi, mbé ki ngize jinge bhabha mu kuteka menha.

¹⁶ Kuala Jezú: Ndé, ua kʼexane munumiʼê, uize-nê bhabha.

¹⁷ Muhatu ua vutula, uixi: Eme ki ngala ni diiala. Eme Jezú: Kidi ki ua zuela, kuma ki ngala ni diiala;

¹⁸ Mukonda ua kexile kiá ni mala atanu, o ió uala-nê kindala ki muadi uê. Mu kiki, ua zuela kidi.

¹⁹ Muhatu uixi: Kindala, Ngana, nga kuijiia kuila eie u polofeta!

²⁰ Jitata jetu ja bhezela jinga Nzambi ku mulundu kuku, maji enu mu Jijudé muambe kuma kididi kia kubhezela Nzambi, mu Jeluzaleme.

²¹ Jezú ua mu ambela, uixi: Muhatu ngi xikane. Kumbi dí diza, dia bhingi kuila né ku mulundu kuku, né mu Jeluzaleme, ki muene athu mua bhezela Nzambi.

²² Enu mu akua Samádia, ki mua mu bheza ki mu kʼijiia; maji etu ki tua mu bheza tua kijiia, mukonda o kubhuluka kutunda ku Jijudé.

²³ Maji dikumbi dí diza-phe, o diene dia bhixila kiá, dia abhezi a kidi ku bheza Tata mu nzumbi ni mu kidi. Kuma Tata muène uandala abhezi a kala kiki, ni a mu bheze.

²⁴ Nzambi Nzumbi, oso a mu bheza, ki bhinga a mu bheza mu nzumbi ni mu kidi.

²⁵ Muhatu ua mu ambela, uixi: Ngejiia kuma Mexiia ió a mu ixana Kristu, ua-ndu kuiza; hinu se ueza, Mùene u tu jimbuila ima ioso.

²⁶ Kuala Jezú: Eme-muène ngi Kristu, nga-lu zuela ni eie.

²⁷ Kithanganʼokio jixibulu jê ji tula. Anga a diuana ku mu sanga ua-lu zuela ni muhatu. Maji kana muthu-phe uebhula muhatu kuila, eie ua mesena-hi? Mba ene ebhula ngó Jezú, kuila ua-lu zuela-nê maka-hi?

²⁸ Muhatu anga u xa disanga diê, uia mu sanzala, anga u ambela athu a tungu momo, uixi:

²⁹ Zenu mu sange diiala dia ngi tangela ima ioso i nga bhanga jinga. O kuila ki mùene Kristu?

³⁰ Kienhiki, athu avulu anga a tunda mu sanzala, a kala mu kuia kuala Jezú.

³¹ Kiosuʼiki-phe, jixibulu jê jala ku mu dionda, exi: Mesene, kúdia kuku, diâ hanji kama koso-koso.

³² Muène-phe, uixi: Eme ngala ni kúdia kuami, ki mu kuijiia.

³³ Jixibulu anga ji di ambela mudiâ, exi: Abha, sai muthu ua mu bhekela kúdia?

³⁴ Jezú ua ambela, uixi: Kúdia kuami, o kubhanga vondadi ia ió ua ngi tumu, ni kuzubha o kikalakalu kiê kia ngi bhana o kubhanga.

³⁵ Enu ki muala kuila kuma: Idima kua i kambe ngó mbeji jiuana mu kúbhia? Talesenu, nga mi ambela: Bhetulenu mesu, mu tale kiambote mu mábhia, idima iabhi kiá, iala polondo phala ku i bhongolola!

³⁶ Uoso u kalakala, mu kubhongolola u tambula futu, hé u i bhakela o muenhu ki uábhua. Phala mu kienhiki, ni mukuni a jimbutu ni mubhongolodi a idima, a sangulukile kumoxi.

³⁷ Mbata, mu kiki, Sabhu ia zuela kidi, exi: U kuna o jimbutu uengi, o u bhongolola idima uengi.

³⁸ Eme nga mi tumu kubhongolola bhuma ki mu dimi-bhu. Sai akuenu a dimi-bhu enuʼenu mua bhingana kiá ngó mu mábhia ma dimi ene.

³⁹ Mu sanzala ieneʼoio akua Samádia avulu a xikana Jezú, mukonda dia kizuelu kia muhatu ua bhana umbangi, uixi: Muene ua ngi tangela ima ioso i nga bhanga jinga.

⁴⁰ Ene akua Samádia kia zubha kusanga Jezú, a mu dionda kuxala-nâ. Muène anga u xala-nâ izuua iiadi.

⁴¹ Amukuá dingi avulu anga a xikana mukonda dia maka mê.

⁴² Anga ambela o muhatu, exi: Etu ki tu xikana dingi mukonda ngó dia kizuelu kié. Mbata etuʼene muene tua mu ivu kuzuela kiá. Tua mu ijiia ni kidi kiene, kuma iú muene Mubhuludi a mundu.

Jezú u saka monʼ a Dikota dia Muenexi

⁴³ Kia bhiti izuua iiadʼiíi, Jezú ua katuka dingi bhenhobho, hé u bhixila mu Ngalileia.

⁴⁴ Sumbala Jezú muene ua ki tange kuma: O polofeta kene ku mu xila mʼoxi iê-muène.

⁴⁵ O kia bhixila mu Ngalileia, akua Ngalileia a mu tambulula kiambote, mukonda a muene ima ioso ia bhange Jezú mu Jeluzaleme, ku Fesa ia Phasu mukonda ene uâ endele ku fesa.

⁴⁶ Anga u bhita dingi mu Kaná ka Ngalileia mua kituile o menha vinhu. Kienhokio mu Kaná anga mu kala kota dia muthu, mukua Kafanau, ua tokala ni muenexi, o monʼ ê uala mu kata.

⁴⁷ Kievu kuila Jezú ua tundu kiá ku Judeia, ueza ku Ngalileia, muène ua mu kane ni ku mu dionda, phala a kulumuke mu Kafanau, nʼ a sake monʼê ua kumbama.

⁴⁸ Jezú anga u mu ambela, uixi: Enu o kuxikana kuenu, kikale mu mona isunji ia makota ni madiuanu.

⁴⁹ Dikota dia muenexi, uixi: Ngana, kulumuka lusolo, kiosuʼiki monʼ ami kiluua afua!

⁵⁰ Kuala Jezú: Ndaié! Monʼê ua di sanze kiá. Muène anga u xikana kizuelu kia Jezú, anga uiê.

⁵¹ O kia kala mù kulumuka-phe, abhikʼê a takana-nê mu njila, anga a mu tudila kuma monʼê ua di sanze.

⁵² Muène anga u a ebhula ola ioso iandeka ku mu sosoloka o kukata. Ene exi: Mazá mu ola ia kamoxi ku kièmba, febele ia mu eha.

⁵³ Tatʼâ anga u tukumuka kuma, iene ola ia mu ambela Jezú, kuila: Monʼê ua disanze. Muène anga u xikana Jezú ni dibhata diê dioso.

⁵⁴ Kiki, o kidiuanu kia kaiiadi kiabhuʼ iki, kia bhange Jezú mu Ngalileia, kia zubha kutunda ku Judeia.