Nzuá 21 - O Mikanda Ikola

Jezú u tukulukila Jixibulu bhu kizanga kia Tibeliiade

¹ Kia bhiti kiki, Jezú u tukulukila dingi jixibulu jê bhu mbandu ia kizanga kia Tibeliiade.

² Ua a tukulukila kiki; Ximá Phetele, ni Tomé, a mu ixana Akua-ndumba (Dídimu), ni Natanaiele mukua Kaná mu Ngalileia, ni anʼ a Zebedeu, ni xibulu jamukuá jiiadi ja Jezú, ji kala bhuamoxi.

³ Ximá Phetele anga uambela akuá, uixi: Eme ngiia mù tamba. Exi: Etu uetu tuia mù tamba ni eie. Anga ene oso a tunda, a di longa mu bote. Maji usuku uosuʼ ó-phe, ka kuata kima.

⁴ Kúkia ni kimene-phe, Jezú uemana ku ndundu. Jixibulu-phe ka kʼ ijiia kuila Jezú.

⁵ Jezú anga ua ambela, uixi: Enu ana, mu kutamba kuenu, mua kuata kama koso-koso? Exi: Kana!

⁶ Muene uixi: Kuzenu uanda ku mbandu ia kadilu ia bote, mu kuate. Ene anga a u kuza, anga a lémbua ku u sungila mu bote, mukonda dia jimbiji kuvula!

⁷ Xibulu a mu zola kuala Jezú, anga uambela Phetele, uixi: Ió Ngana Jezú! Ximá Phetele kia kʼivu kuila muène Ngana, u zuata kazaku kê, u di kuta, (mukonda ua kexile Uixi) anga u di ta ku menha.

⁸ Jixibulu jamukuá-phe, eza mu bote iòfele, ni kusunga o uanda uezala jimbiji, mbata kibumu a ki songoloka ngó háma jiiadi ja kóvado

⁹ O kia zubha kutomboka ku kanga, a sanga túbhia tua makala ma uama, ni mbiji íiʼ di zuza, ni mbolo.

¹⁰ Jezú uixi: Bekenu-ku, ku jimbiji ji mua kuata kindala.

¹¹ Ximá Phetele anga u di longa, hé u sunga o uanda ku kanga. Uene uezala jimbiji ja makota, hamʼ a mbiji ni makuinhi a tanu ni jitanu. Sumbala-phe ja vulu kiki, o uanda ki ua tanduka.

¹² Jezú anga ua ambela, uixi: Zenu mu diaúle. Kana xibulu-phe ia bhumina ku mu ibhudisa, kuila: Eie nanhi? Mukonda a mu ijiia kuma muène Ngana.

¹³ Jezú anga uiza, u katula mbolo, ua bhana-iu, ni mbiji ue kiòmuene.

¹⁴ Lulu tatu kiá, Jezú kutukulukila o jixibulu jê, tunde kia fukunuka mu afi.

Phetele a Muʼ Ibhula

¹⁵ Bhenhobho kia zubha kudiaúla, Jezú uambela Ximá Phetele uixi: Ximá, monʼ a Jona, eie ua tundu iá mu ku ngi zola? Muène uixi: Eue, Ngana! Eie ua kʼijiia, kuma nga ku zola. Kuala Jezú: Disa o tumbudi tuami.

¹⁶ Anga u mu ambela lua kaiadi, uixi: Ximá, monʼ a Jona, eie ua ngi zola? Muène uixi: Eue, ngana! Eie ua kʼijiia kuma nga ku zola. Kuala Jezú: Enga jimbudi jami.

¹⁷ Anga u mu ambela lua katatu, uixi: Ximá, monʼ a Jona, eie ua ngi zola? Phetele anga u kenanana, mukonda tatu kiá ni ku mu ibhula: Eie ua ngi zola? Anga uitaia, uixi: Ngana, eie uejiia ima ioso, ua kʼijiia kuma eme nga ku zola! Kuala Jezú: Disa jimbudi jami.

¹⁸ Kidi kiene ngi ku ambela: Ki ua kexile u munzangala, u muthu ua ku di kuta o phonda, anga uia mu kuenda kuoso ku ua mesena. Maji ki ua ká kuka-phe, ua kà leka o maku, mukuenu hé u ku kuta, anga u ku bheka kuma ku mesena kuiaku.

¹⁹ Mùene ua zuela kiki, mu kuidikiza o ufuilu uoso uà kà fua Phetele, mu kufumanesa Nzambi. O kia zubha ku ki zuela, u mu ambela, uixi: Ngi kaiele eme.

Phetele uibhula Ngana ku mbandu ia Nzuá

²⁰ Phetele anga u sakuka, u mona xibulu a mu zola kuala Jezú iu kaiela ue. Muenhú muène ua xamenene bhu jihata ja Jezú mu seialu, anga u mu ibhudisa, uixi: Ngana, muène nanhi uandu ku sumbisa?

²¹ Phetele kia mu mono, uambela Jezú, uixi: Ngana, o mukuetu iú, eie uixi ku mu bhita kiebhi?

²² Jezú, uixi: Eme se ngandala kuila muène u xalela-ku, katé bhu nga kejiia, eie kia ku kuatela-hi? Eie, ngi kaiele eme!

²³ Kizuelu kiki anga ki sambuka mu jiphange joso ja xikana Jezú, kuma xibulu ioio ki ià kàfua dingi. Jezú-phe ka mu ambela kuila, eie kua kà fua; uedi: Eme se ngandala kuila muène u xalela-ku, katè bhu nga kèjiia, eie kia ku kuatela-hi?

²⁴ Muenhó muene o xibulu ua bhana umbangi uê ua ima ioso iíi; o ima ioso iu ua i soneka. Etu-phe tuejiia kuma o umbangi uê ua kidi.

O dizubhilu dia maka

²⁵ Sai dingi ima ia mukuá iavulu ia bhangele Jezú. Se kuila ioso a i soneka, mu kimoxi-kimoxi, nga fika mu ngongo ki mu soko madivulu mê meji kusoneka.