Nzuá 2 - O Mikanda Ikola

O ukaza mu Kaná. Menha ma biluka vinhu

¹ Mu kizuua kia katatu, anga ku bhita ukaza mu Kaná, sanzala ia Ngalileia. Manhiʼ a Jezú anga u kalabhu.

² Jezú ue a mu ixana ni jixibulu jê, ku fesa ia ukaza.

³ Ki abhu o vinhu-phe, manhiʼa Jezú ua mu ambela, uixi: Ene kala dingi ni vinhu.

⁴ Jezú ua mu vutuila, uixi: Muhatu, ki ku bhingi eie u ngi longa kioso ki nga fuama o kubhanga. Kumbi diami kiluua di bhixila.

⁵ Manhiʼ â uambela akua-mbèle, uixi: Muène, kioso kia mi tuma, bhangenu-kiu.

⁶ Bhenhobho anga bhu kala masanga masamanu ma matadi, mbebhu o kífua kia Jijudé kia ku di sukula. Kala disanga di ambata makuinhi nake mba hama ia jilitulu ja menha.

⁷ Jezú ua ambela, uixi: Izalesenu masangʼ ama ni menha. Anga a mʼezalesa katé ku mizumbu.

⁸ Anga ua ambela, uixi: Katulenu-ku tumenha tuofele, ku masanga iá mu tu bhekele o dilemba dia fesa. Anga a mu bhekela.

⁹ O dilemba dia fesa, kia zubha kulola o menha ma biluka kiá vinhu, kuma ka kʼijiia bhuoso bhu ia tundu, (inda akua-mbèle a teke o menha, ene ngó a kʼijiia), muène uexana nga-iala, uixi:

¹⁰ Athu ene mù kuila, a dianga kuta-ku hanji o vinhu ia uabha, se anu kiá kiambote, kuiza kiua ioio iala ndenge mu kuuabha. Eie-phe ua bhake o vinhu ia mbote katé kindala.

¹¹ Jezú ua bhange kidiuanuʼiki, kia dianga, mu Kaná ka Ngalileia. Mu kubhanga kiki, ua tukulula o ungana uê, o jixibulu jê anga ji mu xikana.

¹² Jezú kia zubha kubhanga kiki, u kulumuka mu Kafanau, ni muène, ni manhiʼâ, ni jiphange jê, ni jixibulu, anga a bhanga muenhomo tu-izuua.

Jezú u kaiesa akua uenji mʼ onzo ia Nzambi

¹³ Kienhókio kuila kua kambe ngó tu-izuua Phasu ia Jijudé ia zukama, Jezú u banda mu Jeluzaleme.

¹⁴ Anga u sanga mu Tebulu asumbixi a jingombe, ni jimbudi, ni jiphomba, ni akua kutolokala itadi ia mundu, a xikama.

¹⁵ Muène anga u bhanga xikote ia jingoji, u a kaiesa ene oso mu Tembulu, kumoxi ni jimbudi, ni jingombe. Anga u muangena bhoxi o itadi ia akua kutolokala, hé u lundula o meza mâ.

¹⁶ Asumbixi a jiphomba ua ambela, uixi: Katulenu imʼiíi bhabha! Kana kubhanga inzu ia Tata iami, Kitanda kia uenji.

¹⁷ Jixibulu jê anga ji lembalala kuma a ki soneka mu Mikanda Ikôla, exi: O henda i nga kuatela inzu iê, eie u Nzambi, ioha o muẋima uami kala túbhia.

¹⁸ Bhenbhobho Jijudé anga ji kuata kuzuela-nê, exi: Eie uidikiza kisuma kiahi, phala ku tu londekesa kuila eie uala ni ungana ua kubhanga imbamba iíi?

¹⁹ Jezú ua kumbulula, uixi: Bulenu o Tembulu iíi, eme ngi i tunga dingi mu izuua itatu!

²⁰ Kuala o Jijudé: Makuinhi-a-uana a mivu ni isamanu a bhitile mu kutunga o Tembuluʼ iíi. Eie u i tunga mu izuua itatu?

²¹ Muène-phe ua tange o tembulu ia mukutu uê-muène.

²² Kia zubha-phe Muène kufukunuka mu afi, jixibulu jê ja lembalala kuma muène kiki ua ki zuelele; anga a xikana o Mikanda Ikôla, iòsoneke, ni maka ma Jezú.

²³ Kienhókio Jezú kioso kia kala mu Jeluzaleme, mu fesa ia Phasu, athu avulu a xikana dijina diê, mu kumona o mediuanu-mê mala kubhanga.

²⁴ Maji Jezú-phe muène ka a dielelele, kuma muène uejiia athu oso kiambote.

²⁵ Ka bhingile kuila muthu u tanga mukuâ, mbata muène uejidile kiambote ioso iala kuxinganeka muthu ni muthu.