Nzuá 19 - O Mikanda Ikola

¹ Kienhókio Pilatu u katula Jezú anga u tuma ku mu beta ni mixi.

² Masoladi anga mʼ enda kitundu kia jisanzu ja minha, a mu ta-kiu ku mútue, a mu zuika ue dibeka di kusuka.

³ Anga a mu zukama, exi: Tana-ku, Sobha ia Jijudé! Anga a mu bhana jihuxi.

⁴ Pilatu anga u tunda dingi, u ambela Jijudé, uixi: Talesenu! Nga-nda ku mi bhekela-nê bhu kanga, ni mu ijiie kuma eme ki ngi mu mono ni kituxi.

⁵ Kienhókio, Jezú anga u tunda, ua zuata kitundu kia minha ku mútue, ni dibeka di kusuka. Pilatu ua ambela, uixi: Muthu iú, mu talesienu!

⁶ Kioso makota ma jinganga ni jipudixa kia mono Jezú, a di kola, exi: Ku dikulusu-nê! Ku dikulusu-nê! Pilatu uixi: Mu tambudienu, enu-enu mu mu te ku dikulusu, mukonda eme ki ngi mu mono ni kituxi.

⁷ Jijudé a mu vutuila, exi: Etu tuala ni kijila, muène-phe kuma ua ki tondala, ua tokala kùfua, kuma ua di tange, uixi: Ngi Monʼ a Nzambi!

⁸ Pilatu-phe ki evu kiki, uôma ua mu kuata dingi.

⁹ Anga u bokona luamukuá mu Dizemba, uibhula Jezú, uixi: Eie ua tundu kuebhi? Jezú-phe ka mu kumbulula kima.

¹⁰ Pilatu anga u mu ambela, uixi: Abha Eie ku ngi zuelesa? Ku kʼ ijiia kuma eme ngala ni kutena kua ku ku tesa ku dikulusu, mba ngala ni kutena kua ku ku jituisa?

¹¹ Jezú, uixi: Eie kueju kala ni kutena kua ku ngi bhanga kima, se a kambele ku ku bana-ku kuala Nzambi ku diulu. Kienhiki, uoso ua ngi bhakula ko kué, muè uala ni kituxi kia dikota.

¹² Tunde Pilatu kievu kienhókio, u sota kujituna Jezú. Maji o Jijudé-phe a di kola, exi: Ki u mu jituna, ku dikamba dia Sézalu dingi! Mukonda uoso u di tanga, uixi: Ngi sobha, ua kitukila Sézalu!

¹³ Pilatu kievu kiki, u tundisa Jezú bhu kanga, anga u xikama ku kialu kia kufundisila, bhu kididi a kʼixana exi Luua ia matadi, (o mu dimi dia Hebeleu, exi Ngabata.)

¹⁴ Kizuua kieniʼ iki-phe kizuua kia kuiudika o Phasu, kua kambe kòfele ku mediia. Pilatu anga uambela Jijudé, uixi: Sobha ienu-ze, iú!

¹⁵ Ene-phe a di kola, exi: Aie-nê; Aie-nê! Aie-nê, ku dikulusu! Pilatu ua ambela, uixi: Sobha ienu, kífua muandala ngi mu ta ku dikulusu? Makota ma jinganga, exi: Etu ki tuala ni sobha iengi! Sobha ietu Sézalu ngó, kuabhu!

¹⁶ Pilatu bhenhobho anga u bhana Jezú bhu maku mâ, phala a mu te ku dikulusu. Ene anga a mu tambula, hé aia-nê.

Jezú ku dikulusu

¹⁷ Bhenhobho Jezú, anga u tunda, muène uambata o dikulusu diê. Enda, anga a bhixila bhu kididi a kʼ ixana bhu Kibolongonho, (o mu Hebeleu, exi: Ngolongota.)

¹⁸ Bhenhobho anga a mu ta ku dikulusu. Anga a ta ue ku makulusu ni kiiadi kiamukuá, ku mbandu muthu, ku mbandu muthu, Jezú bhu ʼaxaxe.

¹⁹ Pilatu anga u bhangesa mukanda, u tuma ku u tesa ku thandu dia dikulusu. O mukanda a u soneka mu dimi dia Judeia, ni dia Loma, ni dia Ngelexa (O Hebeleu, ni Latini, ni Ngeleku), exi: Jezú, Mukua-Nazalé, Sobha ia Jijudé.

²⁰ Ndumba dia Jijudé a tanga o mukanda uenhú, mukonda kididi ki a te Jezú ku dikulusu, kia zukama mu mbonge.

²¹ Makota ma jinganga ma Jijudé, anga ambela Pilatu, exi: Kana kusoneka, ʻSobha ia Jijudéʼ, inda ua soneka, ʻMuène uambe ngi Sobha ia Jijudéʼ.

²² Pilatu uixi: Ioso i nga soneka, nga i soneka kiá.

²³ O masoladi kia zubha kubatela Jezú ku dikulusu, a katula o izuatu iè, anga a i uana mu mbandu ji-uana, mbandu imoxi kala dioladi. Anga a katula ue o mbinza iê iòleka tunde ku thandu katé bhoxi, sé bhuma bhua i tungu ni jidinha.

²⁴ Anga a di ambela mudiâ, exi: Ki tu i tandule. Inda tu ta jisorte, tu tale uoso u xala na-iu. A bhange kiki, mu kubhitisa o maka mòsoneke mu Mikanda ia Ngana, exi: A di uanena o izuatu iami, o divunga diami a di tela jisorte. Iene muène o ima ia bhange o masoladi.

²⁵ Bhu mbandu ia dikulusu dia Jezú anga bhu imana mamʼâ, ni phange a mamʼ â, ni Madiia mukaji a Keleiofa, ni Madiia dia Manda.

²⁶ Jezú kia mono manhʼâ, ni xibulu iê ua mu zola, uemana ue bhu mbandu iê, uambela manhʼâ, uixi: Muhatu, tala monʼé!

²⁷ Anga uambela o xibulu: Tala manhiʼ enu! Tunde kumbi dienhódio, xibulu ió, ua bhongolola manhʼ a Jezú ku bhata diê.

O kúfua kua Jezú

²⁸ Kia bhiti kiki, Jezú kuma ua mono ima ioso ia tenena kiá, mu kubhitisa o maka mòsoneke mu Mikanda ia Ngana, uixi: Ngala ni dinhota!

²⁹ Bhenhobho bhu kala dilonga diezala ni mvindangele. Masoladi anga ombeka-mu jiponja, a i ta ku thangu ia hisopo, anga a i zukamesa ku dikanu diê.

³⁰ Jezú kia zubha kutambula o mvindangele, uixi: Kuabhu! Ioso iòtenese kiá! Anga u bheteka o mútue uê, muenhu anga u batuka.

³¹ Jijudé, phala o imbi ki i xale ku makulusu kia Sábhalu, (mukonda kizuuʼ iki, kizuua kia Sesa, kia ku di iudika, o ki kúkia Sábhalu ia dikota) a bhinga Pilatu a a bukujule o inama, a a katuleku.

³² Masoladi anga eza, a bukula inama ia iú uadianga, ni mukuá, a a te ku makulusu kumoxi ni jezú.

³³ Maji o ki eza kua Jezú-phe, a sanga uafu kiá, anga kamba ku mu bukula inama iê.

³⁴ Disoladi dimoxi-phe u kuata sosa, u kubula na-iu Jezú mu jimbanji. Kithangana kienhókio anga mu tunda manhinga ni menha.

³⁵ Uoso ua ki mono, muène ua-lu ki tanga, enu ni mu xikane uenu. Etu tuejiia kuma o umbangi uê ua kidi; o muène ue ua kʼijiia kuma uazuela kidi.

³⁶ Imʼiíi ia bhiti kienhiki, mu kubhitisa o maka mòsoneke mu Mikanda ia Ngana, ma kuila: Ka kà mu bukula kifuba.

³⁷ O bhua mukuá bhu ambe: A k à mu mona, muenhó uoso a mu kubula ni sosa.

Jezú a mu fûnda

³⁸ Kia bhiti kiki, Zuze, mukua Limateia, u bhinga Pilatu phala a mu ehele kuambata o kimbi kia Jezú. (Zuze muène ua kexile xibulu ia Jezú, maji ka di tukuluile mukonda dia uôma ua Jijudé). Pilatu anga u mu ehela, o Zuze hé uia u katula o kimbi kia Jezú.

³⁹ Nikodemu ue ió uejile mʼ okulu kua Jezú mʼ usuku, anga uiza ue kumoxi ni Zuze. Nikodemu anga u bheka milongo ia kufunda na-iu, makuinhi auana a kilo ni jitanu ja mirra ni aloué iòfunge kumoxi.

⁴⁰ Kiiadi kiâ anga a kuata o kimbi kia Jezú, a ki nhinga mu milele ia linhu, kumoxi ni milongo iauabha dizumba, kuma uene ufûndilu ua Jijudé.

⁴¹ Bhenhabha, bhua tele Jezú ku dikulusu, bhuala ni kádibhia, o mu kádibhia muala mbila ia ubhe, kiluua ata-mu muthu.

⁴² Anga a bhaka o mukutu ua Jezú muenhomo, mukonda dia ku di iudika kua Jijudé, kuma mbila iala bhua zukama, o Sábhalu ia-nda ku mateka kiá.