Nzuá 18 - O Mikanda Ikola

Jezú a mu kuika mu Ngetesemane (Matesu 26.47-56; Marku 14.43-50; Luka 22.47-53)

¹ Jezú kia zubha o kusamba kiki, u tunda ni jixibulu jê, anga uia ku sámbua dia kahonga ka Kidelone, bhuala kádibhia, anga u bokona momo, muène ni jixibulu jê.

² Juda ue ua mu sumbisa, kididʼ iki ua kʼijiia, mukonda Jezú bhene bhuene kuia jinga kiá ni jixibulu jê.

³ Juda-phe ua tambula kiá kibuka kia masoladi ni jipudixa ku makota ma jinganga ni jifalizeu, anga eza bhenhabha ni jikandeia ni jisama ja túbhia ni jixibhata.

⁴ Jezú kuma ioso ia-nda kubhita ua ijiia, u tuamenena kuia mu kutakana-nâ, uixi: Mukua-hi muala ku mu sota?

⁵ Exi; Jezú dia mukuá Nazalé. Jezú uixi: Emeʼú: Juda ue mukua kikutu, uemana-nâ kumoxi.

⁶ Muène-phe kia ambela, uixi: Emeʼú, ene a vutuka ni dima, hé a di bhala bhoxi.

⁷ Jezú anga ua ebhudisa dingi, uixi: Mukua-hi muala ku mu sota? Exi: Jezú dia mukua Nazalé.

⁸ Jezú uixi: Nga mi ambela kiá kuma emeʼú. Se mua ngi bhindamena eme, o iá a ambudienu, aiâ.

⁹ (Muène uazuela kiki, mu kubhitisa o maka-mê ma tangele, uixi: Tata iami! Oso u ua ngi bhana-nâ, ki bhu ngi texika muthu.)

¹⁰ Bhenhobho, Ximá Phetele, kuma uala ni xibhata iê, u i fomona, anga u i vunda mubhika ua nganga ia dikota, hé u mu batula o dítui dia kadilu. Mubhika ió dijina diê Máluku.

¹¹ Jezú anga uambela Phetele, uixi: Fomeka o xibhata ié mu kizu! Eie ua fika kuila dikáu dia ngi bhana Tata, manhi ngi kamba ku di nua?

Jezú bhu pholo ia Nganga ia Dikota

¹² Bhenhobho o kibuka kia masoladi, ni fixiiadi, ni jipudixa ja Jijudé, a kuata Jezú, anga a mu kuta.

¹³ Anga aia-nê hanji kʼ onzo ia Hana, mukonda muène ukouʼ a Kaiafa uala ku unganga ua dikota muvu uenhó.

¹⁴ O Kaiafa muene ua longesele Jijudé, uixi: Kota o muthu umoxi kufuila bhu kididi kia mundu.

Phetele u di tuna Ngana iê

¹⁵ Ximá Phetele anga u kaiela jezú, ni xibulu iamukuá u kaiela ue. Xibulu ia mukuá iú, a mu ijiia kuala nganga ia dikota; mu kienhiki u bokona ni Jezú mu lumbu lua nganga ia dikota.

¹⁶ Phetele-phe uemana bhu mbandu ʼa muelu, bhu kanga. O xibulu iamukuá a mu ijiia kuala nganga ia dikota, anga u tunda, u zuela ni mulangidi a muelu, anga u bokuesa Phetele.

¹⁷ Kahatu kenhoko kala kulanga o muelu, anga uambela Phetele, uixi: Eie ue u xibulu ia iala muenhó? Uixi: Eme, kana!

¹⁸ Akua-mbèle-phe ni jipudixa emana bhenhobho, a uika túbhia, ia ala mù kuota. Phetele anga uiza, uimana-nâ kumoxi mù kuota.

Jezú bhu pholo ia Hana

¹⁹ Nganga ia dikota anga uibhudisa Jezú jixibulu jê, ni ulongelu uê.

²⁰ Jezú ua mu vutuila, uixi: Eme nga zuela jinga bhu pholo ia mundu. Nga longa jinga mu malombe ni mu Tembulu, muene ku bhongoloka o Jijudé joso. Ki ngi zuela kima mu kusuama.

²¹ U ngʼ ibhuila-hi eme? Ebhudisa ió a ngʼ ívua jinga, ioso i nga zuela.

²² Kia zubha kuzuela kiki, pudixa imoxi uemana-nê u bhana Jezú huxi, uixi: Kiene ki u vutuila, o nganga ia dikotʼ okio?

²³ Jezú uixi: Se nga zuela makutu londekesa-kiu, kuila eme nga tange makutu. Maji se eme nga zuela kidi, eie u ngi betela-hi?

²⁴ Kia zubha kubhita kiki, Hana anga u tuma ku mu bheka kua Kaiafa, nganga ia dikota. Jezú hanji ala ku mikolo.

Phetele u di tuna dingi Ngana iê

²⁵ Ximá Phetele-phe hanji uemana mù kuota. Ene anga a mu ambela, exi: Eie ue ku xibulu ia iala muenhó? Muène u di tuna, uixi: Eme, kana!

²⁶ Mubhika uamukuá ua nganga ia dikota, ndandu ia ió, a mu batuile dítui kuala Phetele, uixi: Abha, eme ki nga ku muene-nê mu kadibhia, ki kiene?

²⁷ Phetele anga u di tuna luamukuá, uixi: Kana! Kithanganʼ okio dikolombolo di kokola.

Jezú bhu pholo ia nguvulu Pilatu

²⁸ Ene a tunda ni Jezú kua Kaiafa, hé aia-nê ku Pretório, mu kumbi dia kimene-mene. O Jijudé-phe ka bokona mu Dizemba dia Nguvulu, mukonda a lenge o kuxila, kala kiene o ubhezelu uâ, phala a tene kúdia o jandale ia Phasu.

²⁹ Pilatu anga u a tundila mu kudimona-nâ bhu kanga, uixi: Muthu iú, muala-nê ni mulonga uahi?

³⁰ Ene a mu vutuila, exi: Se ua kambele kukala mukua-kituxi, eie ua fika kuma hinu tua ku bhekela-nê bhabha?

³¹ Pilatu, uixi: Mu ambatienu, mua kà mu fundise kioso kia tokala mu Kitumu kienu. Jijudé exi: Ki kôla etu kujibhisa muthu.

³² Kiki kia bhiti, phala maka ma jezú ma tenene, kia tangele uoso ufuilu ua-nda kùfua muène.

³³ Pilatu anga u bokona dingi mu Dizemba, hé uixana Jezú, u mu ambela, uixi: Eie u sobha ia Jijudé?

³⁴ Jezú ua mu vutuila, uixi: Kiki, eie ua di zuelela-kiu, inga athu engi kiene kia ngi tange ko kué?

³⁵ Kuala Pilatu, abha eie ua fika kuma eme ngi Judé? Akua ʼxi ié, ni makota ma jinganga, ene a ku bheka ko kuami. Eie ua bhange ʼhi?

³⁶ Jezú uixi: Eme o usobha uami, ki ua mu ngongo mumu. Se ua kexile ua mu ngongo, hinu makuenze mami eju bhânga phala eme ka ngi bhakule bhu maku ma Jijudé. Kala kiki-phe, o usobha uami ki ua kunu!

³⁷ Pilatu ua mu ambela, uixi: U sobha-phe! Inga kiebhi? Jezú ua vutula, uixi: Kiene! Eie-muène ua mu ki tanga, kuila ngi sobha. Eme o kuzuela o kidi, kiene kia ngi vualela, kiene ue ki ngʼejiia mu ngongo. Uoso ua xikana o kidi, uívua dízui diami.

³⁸ Pilatu, uixi: O kidi ki kala kiebhi? Kia zuela kiki, u tunda dingi ku kanga kua xala o Jijudé, anga ua ambela, uixi: Eme ki ngi mu mono ni kituxi.

Jezú, inga Balaba?

³⁹ O ki muedi muala ni kífua kuma mu fesa ia Phasu ngi mi jituina muthu a mu kuika, kiki-phe muandala ngi mi jituina Sobha ia jijudé?

⁴⁰ Ene oso-phe a di kola dingi, exi: Muthu iú kana! Etu tuandalʼetu Balaba! (O Balaba-phe kifumbe.)