Nzuá 17 - O Mikanda Ikola

O musambu ua Jezú

¹ Kia zubha kuzuela ima iíi, Jezú u bhetula mesu bhulu, uixi: Tata, kumbi dieza-bhu kiá. Jingisa Monʼ é, o Monʼ é nʼ a ku jingise eie.

² Mbata o Mona ua mu bhana ungana ua kutumina athu oso, phala oso ua mu bhana-nâ, muène a a bhane o muenhu ki uábhua.

³ O muenhu ki uàbhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jézú Kristu, ió ua mu tumu eie.

⁴ Eme nga ku jingisa Eie mu ngongo, eme nga zubha o kikalakalu ki ua ngi bhana kubhanga.

⁵ Tata iami! Kiki-phe ngi jingise eie-muène ni kijingu, ki nga kexile na-kiu mʼ okulu ni eie, kuila mu ngongo kiluua mu di bhanga.

⁶ Eme nga tukulula o dijina dié ku athu u ua ngi bhana-nâ mu ʼaxaxe ka mundu. Ene a kexile é, eie ua ngi bhana-nâ. Ene a bhake o maka mé;

⁷ ia a kʼijiia ue kuma ima ioso i ua ngi bhana, ia tundu ko kué.

⁸ Mbata eme nga a bhana o maka oso u ua ngi bhele, o ene a ma tambulula, ia a kʼijiia kidi kuma eme nga tundu ko kué. Ene a xikana, kuma eie ua ngi tumu.

⁹ Eme ngala ku a bhingila ene. Ki nga mu bhingila o mundu, kana, maji nga mu bhingila ió ua ngi bhana-nâ, kuma ene a ku tokala.

¹⁰ Mukonda ioso o iami ié, ioso o ié, iami. Eme o fuma iami ala ku i muena kua ene.

¹¹ Eme ki ngala dingi mu ngongo, iá-phe ala hanji mu ngongo. Eme kindala ngiza ko kuê. Tata Ukôla! A bhake mu dijina dié, oso ua ngi bhana-nâ phala ene a kale umoxi, kala etu ki tuala mu umoxi, nʼeie, nʼeme.

¹² Kioso ki nga kexile-nâ mu ngongo, nga a bhakele mu kutena kua dijina dié. Nga engi, oso ua ngi bhana-nâ, ki bhu texika muthu, kikale iuná ngó o kilalu kia mona, ua texika-bhu, mu kubhitisa o maka mòsoneke mu Mikanda Ikôla.

¹³ Kiki-phe ngiza kiá ko kué. Maji imʼiíi-phe nga i zuelela mu ngongo phala o ngalasa iami ni i tenene moxi dia miẋima iâ.

¹⁴ Nga a bhana o maka mé. O mundu-phe ua a zembe, mukonda ene ka tokala mu mundu, mukuâ ni eme ki ngi tokala-mu.

¹⁵ Ki nga bhingi kuma u a katula mu ngongo, maji nga bhingi kuila u a enga, u a kudila kua Diabhu ió ua bhukumuka.

¹⁶ Mukuâ ni eme ki ngi tokala mu mundu, ene ua ka tokala-mu.

¹⁷ A zelese, mu kidi kié; o maka mé kiene o kidi.

¹⁸ Kala ki ua ngi tumu Eme mu ngongo, kiene ue ki nga a tumu ene mu ngongo.

¹⁹ Mukonda dia ene, eme nga di bhakula ni muenhu uoso ko kué. Nga bhange kiki, phala ene ua nʼ a di lumbe ko kué mu kidi.

²⁰ Luamukuá, ki nga mu a bhingila ngó ene, suke ni akuá oso a kà ngi xikana mu maka ma ene.

²¹ O ene oso nʼ a kale umoxi. Tata iami! Mukuâ ni eie ki uala mo muami, eme ngala mo mué, ene ua a kale mo muetu, oso muene a kala umoxi, o mundu phala u xikane kuma eie ua ngi tumu.

²² Nga a bhana o kijingu ki ua ngi bhana eme, ene ni a kale umoxi, kala etu ki tuala umoxi.

²³ Eme mua ene, eie mo muami, ene a zubhe ku di bandeka mu umoxi, mbé o mundu ni u xikane kuma Eie ua ngi tumu, kuma ue ua a zola ene, kala ki ua ngi zola eme.

²⁴ Tata iami! Nga mesena enhó oso ua ngi bhana-nâ, a kale ni eme koko kuoso ku ngà kala. Nga mesena kuila a mone kijingu kiami ki ua ngi bhana, kuma eie ua ngi zola tunde ʼbhuoso bhaná, mu ngongo kiluua mu kala dimatekenu diê.

²⁵ Tata ua iuka! O mundu ki u kuijiia, eme-phe nga kuijiia; enhá ue a kʼ ijiia kuma eie ua ngi tumu.

²⁶ Eme nga ejidisa o dijina dié, hanji ngi dʼ ijidisa dingi, phala o henda i ua ngi zola na-iu eme, ni i kale mua ene, ni eme-muène mua ene.