Nzuá 14 - O Mikanda Ikola

Uoso ua ngi mono eme, ua mono ue Tata

¹ Muẋima Ki u mi titile, anga mu tandanganha ni malamba. Dielelenu Nzambi; eme uami ngi dielelienu.

² Sai ididi iavulu ku bhata dia Tatʼetu, kuenhoko-phe eme ngala kuia ku mi iudikila-ku kididi. Se kua kexile kiengi, eme hinu ngeji ku mi ambela-kiu.

³ Se ngai, anga ngi mi iudikila kiá kididi, hádia ngiza, ngi mi tambulula ko kuami; o kuoso ku ngala eme, enu uenu kuene ku muà kala.

⁴ Muejiia kuoso ku ngiia, muejiia ue o njila.

⁵ Tomé u mu ambela, uixi: Ngana, kuene ku uia ki tuijiia-ku, tuijiia kiebhi o njila?

⁶ Jezú uixi: Eme ngi njila, ngi kidi, ngi muenhu. Kana muthu u bhixila kua Tata, ua kambe kuijiia ko kuami.

⁷ O ki mua ngʼ ijiia emʼ iki, mua-nda kuijiia ue Tata. Kiene muene, tunde kiki, mua mu ijiia, mua mu mono.

⁸ Felipe u mu ambela, uixi: Ngana, tuidikise Tata; kabasa tu mu mona, kia tu soko.

⁹ Jezú, uixi: Tunde bhuoso bhanhá bhu ngala ni enu, Felipe tata, ku ngʼ ijiia luua? Uoso ua ngi mono eme, ua mono ue Tata; eie uala kuila kiebhi: Tu idikize Tata?

¹⁰ Eie Filipe, ku xikana kuma eme ngala mua Tata, o Tata uala mo muami? Jezú anga uambela o jixibulu joso, uixi: Maka moso nga-lu mi ambela, ki eme nga di zuelela-u. Tata-phe ua ngi kala moxi, muène ua mu bhanga o ikalakalu iê.

¹¹ Ngi xikanienu, kuma eme ngene mua Tata, o Tata uene mo muami. Xikanenu mukonda dia ikalakalu iíi i nga mu bhanga.

¹² Kidi kiene, ngi mi ambela: Uoso ua ngi xikana eme, ikalakalu i nga mu bhanga eme, muène ue u i bhanga, katé u bhanga ue hanji ia tundu, mukonda eme ngala kuia kua Tata.

¹³ Ioso i mu bhinga kua Tata mu dijina diami, eme ngi i bhanga, mbé Tata nʼ a tambule o fuma kua Mona.

¹⁴ Se mua bhingi kima kioso-kioso mu dijina diami, eme ngi ki bhanga.

O Mukuatekexi ua mukuá

¹⁵ Jezú uixi dingi: Se mua ngi zola, alukenu o ijila iami.

¹⁶ Eme nga kà bhinga Tata, muène u mi bhana Mukuatekexi ua mukuá, u xalela-ku kiá, ka kà mi xa dingi. Muène o Nzumbi Ikôla.

¹⁷ O mundu ki u tena ku mu tambulula, mukonda ka mu mono, ka mu ijiia. Enu-phe mua mu ijiia, mukonda mu xala-nê, u kala moxi dienu.

¹⁸ Ki nga-nda ku mi xisa ubheka kala mu jihukunhu, hinu ngi mi sanga ni ngi kale jinga ni enu.

¹⁹ Kua xala ngó kathangana, o mundu ki u ngi mono dingi; enu-phe mu ngi mona. Mukonda eme ngi kala ku muenhu, enu uenu mu kala ni muenhu.

²⁰ Kizuua kiókio mua kʼejiia kuma eme ngala mua Tata, enu muala mo muami, eme ngala mo muenu.

²¹ Uoso ua kuata o ijila iami, anga u i aiuka, muène muthu ua ngi zola. Uoso-phe ua ngi zola, Tata iami u mu zola, eme ngi mu zola, ngi di tukulula kua mùene.

²² Bhenhobho Juda, (ki muene mukua-Kadiota), u mu ambela, uixi: Ngana, ki bhita kiebhi, kua bhingi u di tukulula ko kuetu, o ku mundu, kana?

²³ Jezú u mu vutuila, uixi: Muthu se ua ngi zola, kikale u aiuka o maka mami; o Tata iami-phe u mu zola. Mu kiki, ni eme ni Tata iami, tuiza kua muene, hé tu tunga-nê.

²⁴ Uoso ua kambe ku ngi zola, kʼ aiuka maka mami. O maka-phe u muala kuívua, ki mami eme, kana; maji ma Tata ió ua ngi tumu.

²⁵ Nga mi ambela imʼiíi kioso ki ngala hanji ni enu.

²⁶ Maji o Mukuatekexi ió-phe, muène muène Nzumbi Ikôla, a-ndu mu tumikisa kuala Tata mu dijina diami, muène u mi longa ima ioso, hé u mi lembalesa ima ioso i nga mi ambela.

²⁷ Enu nga mi xila o kutululuka kuami; o kutululuka kuami ku nga mi bhana. O kuami eme ki ngi ku bhana kala ki ku bhana o mundu. Mixima ki i mi kenane, ki mu kale ni uôma.

²⁸ Enu muevu ki nga ki tange, ngixi: Ngala kuia, maji hinu ngiza mu kukala ni enu. Se mua ngi zolele, mueju sanguluka, mukonda dia kuijiia kuila ngala kuia kua Tata, kuma o Tata uala kota, eme ndenge.

²⁹ Kiki nga mi ambela-kiu kioso kiluua ki bhita, phala ki kia-ndu bhita, enu mu xikane.

³⁰ Ki ku ngi xala dingi kuzuela kithangana kiavulu ni enu, kuma o sobha ia mu tumina mu ngongʼ umu iu bhixila kiá; muene-phe ka ngi lende ni kima.

³¹ Maji phala o mundu u ijiie kuma eme nga zola Tata, o kioso kia ngi tumu muène, Eme kiene ki ngi bhanga. Balumukenu, tuie ku kanga!