Nzuá 13 - O Mikanda Ikola

Jezú u sukula o inama ia Jixibulu

¹ Kuila kua kambe ngó kizuua kimoxi, kiosuiki o Fesa ia Phasu kiluua i bokona, Jezú kuma uejiia kuila o kumbi diê dia bhixila, dia kutunda mu ngongʼ umu nʼ aie kua Tata, kala kia zola makamba mê mu ngongo, ua a zolo muene katé ku dizubhilu.

² Jezú ni maxibulu mê, kia kala mù seiala, o Diabhu ua ki te kiá ku muẋima ua Juda, mukua Kadiota, monʼ a Ximá, o ku mu sumbisa.

³ Jezú uejiia kuma Tata ua mu bhana o kutena kuoso bhu maku mê. Uejiia ue kuma muène ua tundu kua Nzambi, o kua Nzambi kuene kiá kua-nda kuia.

⁴ Kienhókio u balumuka ku meza, u zula izuatu iê, anga u nomona dituaia, u di kuta nadiu bhu kinhonga.

⁵ Anga u lunduluila menha bhu dilonga dia menhʼ a pholo, hé u mateka o kusukula inama ia jixibulu jê, ni ku i kondona ni dituaia dia di kutu na-diu.

⁶ Anga u bhixila kua Ximá Phetele. Phetele-phe, uixi: Kífua, Ngana, eie u ngi sukula o inama?

⁷ Jezú uixi: Kioso ki nga-lu bhanga, eie ki kia kutetulukila luua; maji hadia u kʼ ijiia.

⁸ Phetele uixi: Kana, Ngana, nguami eie ni u ngi sukule inama. Jezú uixi: Se nga kambe ku ku sukula, eie ku kala dingi u dixibulu diami.

⁹ Kuala Ximá Phetele: Se kiene, Ngana, kʼo inama ngó; sukula ue ni maku, ni mútue uami.

¹⁰ Eme Jezú: Uoso ua diẋika kiá, u bhinga ngó ku mu sukula inama, nʼa zubhe kuzela. Enu-phe mua zele kiá, suke enuʼ enu oso kana, kuma umoxi né.

¹¹ (Mukonda jezú uejiia uoso ua nda ku mu sumbisa. Kiene kia kiambela, uixi: Ki mua zele enuʼ enu oso, kuma umoxi né.)

¹² Kia zubha o ku a sukula inama, Jezú ua tambula o izuatu iê, anga i xikama dingi ku meza, hé ua ambela, uixi: Enu muejiia kioso ki nga bhange?

¹³ Enu mua mu ngʼ ixana Mesene, mua mu ngʼ ixana Ngana. Kidi-phe ki mua zuela, mukonda eme-muène-muene.

¹⁴ Eme-phe ngi Mesene, ngi Ngana, se nga mi sukula inama, enu uenu mua tokala ku di sukula jinga o inama mudienu.

¹⁵ Kuma eme nga mi bhana phangu, enu ni mu bhange kioso ki nga bhange eme.

¹⁶ Mbata ni kidi kiene, ngi mi ambela: Mubhika ka tundu ngana iê, o mukunji ka tundu uoso ua mu katula.

¹⁷ Kindala ima iíi se mua ijiia, mu zediua se iene i mu bhanga.

¹⁸ Ki ngi mi tange-phe enu oso, mukonda ngʼejiia oso nga a solo. Mbata kia bhingi-phe o maka mòsoneke mu Mikanda ia Nzambi ma bhita, ma kuila: Ió mukua kúdia ku mbolo iami, kiki ua ngi kitukila.

¹⁹ Kindala nga-lu tuama ku mi ambela-kiu, kioso kiluua ki bhita, phala ki ki bhita, mu xikane kuma Eme-Muène-muene Kala dia kala.

²⁰ Mukonda ni kidi kiene, ngi mi ambela: Uoso u tambulula muthu nga mu tumu, eme-muène a ngi tambulula; o uoso ua ngi tambulula eme, ua tambulula ue uoso ua ngi tumu.

Jezú uidikiza uoso uanda ku mu bhana ku jinguma

²¹ Kia zuba Jezú kuzuela kiki, u lalama ni muẋima, anga u bhana umbangi, uixi: Kidi kiene, ngi mi ambela: Mudienu sai ni iú ua-ndu ngi sumbisa.

²² Jixibulu anga ji kuata ku di tala mudiâ ni phata, mba muène ua tange uebhi.

²³ Kuenhoko, ku meza, anga ku kala xibulu imoxi a mu zola kuala Jezú, ua xamenena bhu jihata ja Jezú.

²⁴ Ximá Phetele anga u mu bhalula, phala ebhudise Jezú, mba ua tange nanhi.

²⁵ Xibulu iíi anga u bhetamena kua Jezú, uixi: Ngana, nanhi muène?

²⁶ Jezú uixi: Ió nga-ndu mu bhana o kambolo koʼ uombeke. Anga uombeka kambolo, u ka bhana Juda, monʼ a Ximá dia Kadiota.

²⁷ Kia zubha Juda kutambula o kambolo, Satana u mu bokona moxi diê. Jezú anga u mu ambela, uixi: Kioso ki u bhanga, bhanga-kiu lusolo.

²⁸ Kana muthu-phe ku meza uevu kiambote kioso kia mu ambela kiokio.

²⁹ Amukuá a fika, mukonda Juda muene ua kuata o hutu ia kitadi, kuma Jezú ua mu ambela kusumba ima ia kambe-ku mu kubhanga o fesa; mba ua mu ambela kubhana kima ku jingadiama.

³⁰ Juda kia zubha kutambula o kambolo, u tunda lusolo. Muene mʼusuku kiá.

Jezú u lekela o Jixibulu jê

³¹ Kia tundu Juda, Jezú uixi: Kiki kiá o fuma ia Monʼ a Muthu ia-nda kutukuluka. O fuma ia Nzambi a-nda ku i muena momuê.

³² O ki kala o fuma ia Nzambi i tukulukila mua muène, kienhiki o Nzambi ue muène ua-ndu kuidikiza o fuma ia Monʼ a Muthu. Nzambi ua-ndu ki bhanga muene mu kindala muenhumu.

³³ Enu tuana tuami, ki nga-ndu kala dingi ni enu kithangana kiavulu. Enu mua-ndu ngi sota, maji kindala ngi mi tangela, kala-phe ki nga tangela kiá Jijudé, ngixi: Enu ki mu tena kuiza kuoso ku ngiia, kiene ue ku nga mi tangela enu.

³⁴ Nga mi bhana kijila kiôbhe: Di zodienu mudienu. Kala kioso eme ki nga mi zola, enu uenu di zodienu mu dienu.

³⁵ Kiene kia mʼ ijidila ku athu oso, kuma muala mu jixibulu jami, se mua di zolo mu dienu.

Phetele a mu dimuna

³⁶ Ximá Phetele, uixi: Ngana, eie uia kuebhi? Jezú uixi: Kindala kuoso ku ngiia, eie kutena luua ku ngi kaiela. Maji ua kà ngi kaiela hádia.

³⁷ Phetele uixi: Ngana, ki ngi tenena-hi ku ku kaiela kiá? Eme ngi bhana muenhu uami mukonda dié.

³⁸ Jezú u vutula, uixi: Eie u bhana muenhu ué, mukonda diami? Kidi kiene ngi kuambela: Bhua kà kokuela o dikolombolo, eie ua ngi di tunu lutatu.