Nzuá 12 - O Mikanda Ikola

Jezú mu Betanha. Madiia u mu uaia o maji

¹ Kuila hanji kua kambe izuua isamanu ku Phasu, Jezú u bhixila mu Betânha, muala Lázalu a mu fukunuine mu afi.

² Bhenhobho Jezú anga a mu tela meza. Marta anga u kala mù xibhidila, o Lázalu-phe u kala ni iá a xikama-nê ku meza.

³ Madiia anga u katula dívala dia nguendu ia nardo ia uabha o dizumba, ia te kiavulu. Anga u uaia inama ia Jezú, u i kondona ni kindemba kiê. Inzo ioso anga izala ni dizumba dia nardo.

⁴ Xibulu imoxi, Juda, mukua Kadiota, monʼ a Ximá, muène ua-ndu mu sumbisa, uixi:

⁵ Nguendu ienhiìi ka i sumbisila-hi mu hama jitatu ja itadi, ni a i bhane o jingadiama?

⁶ Kiki ka ki tangela mukonda dia henda ia jingadiama, suke mukonda muène muíi. Muène ua kuata konda ia hutu ia kitadi, anga u kala mù katula ioso ia ta-mu.

⁷ Jezú-phe, uixi: Mu ambudienu! Nguendu iíi muène ua i bhakela o kizuua kiami kia ku ngi funda!

⁸ Jingadiama mua-ndu xalela na-ju; maji eme-phe ki ngi xalela ni enu.

O kikutu kia kujibha Lázalu

⁹ Athu avulu ku Jijudé, ki evu kuma Jezú uala mu Betânha, eza. Ki mukonda dia muène ngó, maji suke eza ue kutala Lázalu, a mu fukununa kuala Jezú mu afi.

¹⁰ Makota ma jinganga anga ma ta kikutu ue kia kujibha Lázalu.

¹¹ Mukonda Jijudé javulu ja a lenge, mukonda dia muène, anga ji xikana Jezú.

Kifuẋi ki di kola hozana!

¹² Ki kúkia, kifuẋi kia dikota, kia athu eza ku fesa, a kʼivu kuma Jezú iu uiza mu Jeluzaleme.

¹³ Bhenhobho a katula misoko, anga aia ku mu kauidila ni ku di kola, exi: Hozana! A tane-ku, uoso ueza mu dijina dia Ngana! A taneku, sobha ia Izalaiele!

¹⁴ Jezú anga u katula monʼ a bulu, u i mondala;

¹⁵ Kala kiò soneke mu Mikanda Ikôla, exi: Ku kale ni uôma eie u mbanza ia Ziione! Kindala kiki sobha ié iu uizʼó ua mondala ku séseme ia bulu!

¹⁶ Mu kithanganʼokio, imʼiíi jixibulu jê ka ʼijidile luua. Maji kia zubha Jezú kutambula ungana uê, mu kufukunuka ku ʼalunga, ene kiene kiua kia lembalala kuma imʼiíi a mu soneka-iu mʼ okulukulu, ene ue iene ima ia mu bhangele.

¹⁷ Ene oso a kexile ni Jezú, ki exanene Lázalu kutunda mu mbila, anga u mu fukununa mu afi, a mu kala jimbangi, mu kufumanesa ioso ia bhiti.

¹⁸ Kiene kia bhangesa o kifuẋi kuia mu ku mu kauidila, mukonda a kʼ ivu kuma ua bhange kidiuanuʼ iki kia dikota!

¹⁹ Jifalizeu-phe, ja di ambela mudiâ, exi: Mua ki mono-enu? Tua lémbua-kuze! Mundu uoso uaii ni ku mu kaiela muène!

Jingeleku jandala kumona Jezú

²⁰ Mu ʼaxaxe ka athu a bande mu Jeluzaleme ku fesa mu kubheza, mu kala ue ni Jingeleku.

²¹ Ene anga eza kua Felipe, mukua Betesáida mu Ngalileia, a mu bhinga, exi: Ngana, etu tuandala kumona Jezú.

²² Felipe anga uiza, u ki tangela Mandele, ene kiiadi kiâ, Mandele ni Felipe anga eza a tangela Jezú.

²³ Bhenhobho jezú ua kumbulula, uixi: Kumbi dia bhixila dia Monʼa Muthu kutambula o ungana.

²⁴ Kidi kiene, ngi mi ambela: O lumbundu lua tiliku, se lu kamba kusonoka mu mavu, anga lu fua, lu kalê ngó ubheka uê. Maji o ki lu fua-phe, lu bhana idima iavulu.

²⁵ Uoso u zola o muenhu uê, ua-nda ku u texi. Maji uoso o muenhu uê ka u naminina kiavulu mu ngongʼ umu, ua-nda ku u bhakela o muenhu ki uábhua.

²⁶ Se muthu ua mesena ku di tuma ni eme, a ngi kaiele. O kuoso ku ngi kala eme, ni ió nga di tumu-nê, kuene ue kuʼ à kala. Se muthu u di tuma ni eme, Tata iami u mu bhana ujitu.

Jezú u tanga o fuma iê, ni kúfua kuê

²⁷ Jezú uixi dingi: Muẋima ua ngi kenanana! Ngʼ ila kiebhi? Tata, ngi bhulule, kumbi didi ki di ngi tule? Kana! Kiene muene kia ngi bheka, eme nga bhixila bhu kumbi dienhidi.

²⁸ Tata, fumanesa o dijina dié! Kithanganʼ okio ku tunda dízui mu diulu, dixi: Nga di fumanesa kiá, hanji ngi di fumanesa jinga.

²⁹ O kifuẋi kiemana-bhu, kievu dízui, exi: Kua numina. Amukuá exi: Anju ia mu zuelesa.

³⁰ Maji Jezú-phe, uixi: Dízui didi ki dieza mukonda diami, dieza mukonda dienu.

³¹ O kithangana kia kufundisa o mundu iú, kieza-bhu kiá. O sobha ia mundu iú a-nda ku mu kaia.

³² Eme se a ngi zangumuna bhoxi, ngi sunga athu oso ko-kuami.

³³ (O kiki ua ki zuela, mù kuidikiza o kalunga koso ka-nda kúfua muène.)

³⁴ O kifuẋi-phe kia mu vutuila, exi: Etu tua di longo mu Kitumu kietu, kuma Kristu u xalela-ku kiá. Eie-phe ua-lu kuamba kiebhi, kuma o Monʼ a Muthu ku mavu a mu zangumuna-ku? Monʼ a Muthu, nanhi muene?

³⁵ Jezú ua ambela, uixi: Kithangana Kiofele kiki, hanji muala ni mukengeji, mu ʼaxaxe kenu. Endenu kiá kioso ki muala ni mukengeji; mienhu ienu i lunge muenhomo, phala o usuku ki u mi kuate. Kuma uoso uenda mʼ usuku, kejiia kuoso ku a lunga.

³⁶ Kioso ki muala hanji ni mukengeji, xikanenu o mukengeji, nda mu kale mu anʼ a mukengeji. Jezú ua ambela imʼiíi, anga u tunda-bhu, hé uia mu ku di sueka.

Jijudé ki ji mu xikana

³⁷ Sumbala-phe ua bhangele madiuanu mavulu kiki bhu pholo iâ, ene-phe ka mu xikana.

³⁸ Phala o maka ma polofeta Izaia ni ma bhite, uixi: Ngana, nanhi ua xikana ku maka metu? Nanhi muene a mu tukuluila o kutena kua Ngana?

³⁹ Ene ka tenene kuxikana mukonda Izaia uambe dingi, uixi:

⁴⁰ Nzambi muene ua a fuisa mesu, iú ua a kolesa o miẋima; kuiengesa kuila ka mone ni mesu, nʼ a tongolole ni muẋima, nʼ a lunguluke dingi, eme ni ngʼ a sake.

⁴¹ Imʼiíi Izaia ua i tangele, mukonda ua muene ungana ua Jezú, iu ua mu tumbula.

⁴² Katé-phe ni mu makota a Jijudé amukuá a mu xikana uâ. Maji mukonda-phe dia uôma ua jifalizeu, ka di tange, kuma a lengesa ku a tubhula ni ku a kaiesa mu dilombe.

⁴³ Mbata ene ujitu u tunda ku athu ua a kalela kota, o ujitu u tunda kua Nzambi, ndenge.

Maka ma Jezú ene a kà fundisa

⁴⁴ Jezú anga u di kola, uixi: Uoso ua ngi xikana eme, ki eme ngó a ngi xikana, ua xikana ue ni ió ua ngi tumu.

⁴⁵ Uoso ua ngi mono eme, ua mono ue uoso ua ngi tumu.

⁴⁶ Eme ngeza kuma ngi mukengeji mu ngongo, phala uoso u ngi xikana, ka kale dingi mua vundu.

⁴⁷ Muthu uoso uívua o maka mami, nʼ a kambe ku ma bhaka, eme ki ngi mu êlesa. Kuma eme ki ngeza mù kuêlesa o mundu, ngeza mu kubhulula o mundu.

⁴⁸ Uoso ua ngi di tunu, ua kambe kutambulula o maka mami, sai uoso u mu êlesa. Maka mami moso u nga tange, ene a ka mu êlesa mu kizuua kia kà suka-ku.

⁴⁹ Mbata ki eme nga di zuelela; maji Tata ió ua ngi tumu, muène u ngi tangela kioso ki ngi zuela, ni kioso ki ngi longa.

⁵⁰ Ngejiia kuma kijila kiê muène, ki bhana muenhu ki uábhua. O ima-phe ioso i nga tange eme, nga i tange muene kala kia ngi tumu Tata o kuzuela.