Nzuá 11 - O Mikanda Ikola

O kúfua kua Lázalu

¹ Anga ku kala muthu uala mù kata, dijina diê Lázalu. Muenhú, ni phange jê jiiadi ja ahatu, Madiia ni Marta, a tungile bhu sanzala ia Bethânha.

² (Madiia muène ua tele Ngana o maji ma dizumba, anga u mu kondona inama ni kindemba kiê; muene ue uavu phangʼ iê Lázalu uala mù kata.)

³ Jiphange ja ahatu enhá anga a tuma kuambela Jezú, exi: Ngana, kunu o kamba dié Lázalu ua mu zola, iù kata.

⁴ Jezú-phe kia kʼivu, uixi: Kukata kuku, ki kukata kua Lázalu kúfua. Kuku kukata kua kufumanesa Nzambi, mbé Monʼ a Nzambi nʼ a tambule-ku fuma.

⁵ Jezú-phe, ua zola kiavulu Marta, ni Madiia, ni Lázalu.

⁶ Ki evu kuma Lázalu uala mù kata, ua bhange hanji izuua iiadi bhu kididi bhuoso bhuala.

⁷ Kia zubha kubhanga izuua iiadi, uambela jixibulu, uixi: Tuienu dingi ku Judeia.

⁸ Jixibulu ji mu ambela, exi: Mesene, Jijudé kindala kia sotele ku ku jibha ni matadi, kífua kuene dingi ku uia?

⁹ Jezú, uixi: O kizuua ki kiala ni kuinhi dia ola ni jiiadi? Muthu se uenda mu muanha, ka di bhukana, mukonda u mona muanha ua mu ngongo mumu.

¹⁰ Maji se uenda-phe mʼ usuku, u di bhukana mukonda kala ni muanha.

¹¹ Kia zubha kuzuela kiki, ua ambela, uixi: Kamba dietu Lázalu uaii ku kilu. Maji eme ngiia-phe ku mu phaphumuna.

¹² Kuala o jixibulu: Ngana, se uaii ku kilu-phe, ua-nda kuiluka.

¹³ Jezú-phe ua tange o kùfua kuê, maji ene a fika kuma ua tange o kunhoha ku kilu kiene.

¹⁴ Jezú anga u a lomboluela kiambote, uixi: Lázalu, uáfu.

¹⁵ Kia ngi uabhela eme nga kambele kukala-bhu, mukonda dienu, enu phala mu xikane. O kiki-phe, tuienu-ku, tua kà mu talese.

¹⁶ Tomé a mu ixana Dídimu, uambela jixibulu ni akuá, uixi: Etu uetu tuienu, tua ka fuile kumoxi ni Mesene.

Jezú muène o difukunukinu ni muenhu

¹⁷ Jezú kia zubha kutula kuenhoko, u sanga Lázalu ua kuata kiá izuua iuana mu mbila.

¹⁸ Mu Betânha-phe, mua zukama ni mu Jeluzaleme, kanga diê dia kilómetro ji tatu.

¹⁹ Mukonda dia kiki, Jijudé javulu jeza kua Marta ni Madiia, mu ku a didisa o thambi ia phangʼ iâ.

²⁰ Marta ki evu kuma Jezú iú uiza, uia mu ku mu kauidila. Madiia-phe hanji ua xikama mʼ onzo.

²¹ Marta anga uambela Jezú, uixi: Ngana, eie se ua kexile-bhu, phangeʼ ami hinu kafu.

²² Né kiki eme nga kʼijiia kuma, kioso ki u bhinga Nzambi, Nzambi u ku bhana-kiu.

²³ Jezú u mu ambela, uixi: Phangʼié ua-ndu fukunuka.

²⁴ Marta uixi: Ngʼejiia kuma u fukunuka mu difkunukinu dia kizuua kia kà suka-ku.

²⁵ Jezú ua mu ambela, uixi: Eme ngi difukunukinu ni muenhu. Uoso u ngi xikana eme, né uafu, u kala dingi ni muenhu.

²⁶ O uoso uala ku muenhu, hé u kala mu ku ngi xikana, ka kà fua dingi. Eie kienhiki, ua ki xikana?

²⁷ Kuala Marta: Kiene, Ngana! Eme nga ku xikana kuma eie u Kristu, Monʼa Nzambi, a mu kingile kuiza mu ngongo.

Jezú u dila

²⁸ Marta kia zubha kuzuela kiki, uia hanji, anga u ixanena bhu mbandu Madiia, phangʼiê, uixi: Mesene ueza! Ua kuixana.

²⁹ Madiia ki evu kiki, ua balumuka lusolo, anga uia mu ku di mona ni Jezú. (

³⁰ Kiosuʼ iki, Jezú kiluua a bokona mu sanzala, hanji uala bhu kididi bhuoso bhua mu sangele Marta.)

³¹ Jijudé jala mʼ onzo ni Madiia, ala ku mu didisa, kia mu mono ua balumuka lusolo, iu ua tundu, a mu kaiela, a fika kuma uaii mu kudidila bhu mbila.

³² Madiia-phe kia bhixila bhoso bhala Jezú, kia mu mono, u fukama bhu inama iê, uixi: Ngana, eie se ua kexile-bhu, phangʼ iami hinu kàfu!

³³ Jezú bhenhobho, kia mono Madiia kudila, ni Jijudé jí dila, eza-nê kumoxi, u kumba ku muẋima uê, malamba a mu kuata,

³⁴ Anga ua ebhula, uixi: O muène mua mu fundu kuebhi? Exi: Ngana, ʼzá u tale.

³⁵ Jezú anga u dila.

³⁶ Jijudé, exi: Talesenu! Lázalu ua mu zolele kiavulu.

³⁷ Amukuá-phe, exi: Mùene ua tenene kujikula o mesu a kifofo, ka bhangela-hi kima kioso-kioso phala kufudisa Lázalu iú kùfua?

O kufukunuka kua Lázalu

³⁸ Jezú anga u kala mù kumba dingi luamukuá ku muẋima uê, anga uia katé bhu mbila. O mbila iene iala mu dibánda, ia a xiti-ku ditadi.

³⁹ Jezú uixi: Katulenu-ku o ditadi! Marta, phangʼ ia difundu, uixi: Ngana, muène kiki ua mu nuha kiá kiaiibha! Kuma tunde kia mu fundu, ua bhange-mu kiá izuua iuana.

⁴⁰ Jezú ua mu ambela, uixi: Abha, eme ki ngi kuambela, kuma se u xikana, ua-ndu mona o fuma ia Nzambi?

⁴¹ Anga a katula-ku o ditadi. Jezú anga u bhetula mesu bhulu, uixi: Tata, nga ku sakidila kuma eie ua ngʼ ivu.

⁴² Eme nga kʼijiia kuma eie uene mù ngʼivua jinga. Maji Eme nga ki zuelela-phe mukonda dia kifuẋi kia ngʼ imanena bhabha, mbé ene ni a xikane kuma eie ua ngi tumu.

⁴³ Kia zubha o kuzuela kiki, ua di kola ni dízui dia suina, uixi: Lázalu, tunda ku kanga!

⁴⁴ O Lázalu anga u tunda. Inama iê ni maku, mòuinge mu itetele ia kiaku, ni pholo iòfute dituaia. Bhenhobho Jezú uixi: Mu ingununienu o itetele, phalʼ ende.

Jifalizeu ji ta kikutu kia kujibha Jezú

⁴⁵ Avulu ku Jijudé, eza mù kunda Madiia, kia zubha ku mona Jezú kia bhangʼ iki, a mu xikana.

⁴⁶ Amukuá-phe aia ku jifalizeu, hé a ji tangela ima ia bhange Jezú.

⁴⁷ Makota ma jinganga ni jifalizeu, anga a bhongolola o Kionge kia Jitata, exi: Tu bhanga kiebhi? Mukonda muthu iú uala mù bhanga madiuanu mavulu.

⁴⁸ Se tua ehela kiki, athu oso a-ndu mu xikana. O miene-phutu ia akua Loma-phe, hinu eza, a tu katula bhu kididi, o tembulu a i bula, hé a buidisa o muiji uetu.

⁴⁹ Muthu mudiâ, Kaiafa, muene nganga ia dikota muvu uenhó, ua ambela, uixi: Enu ki mu ijiia kima?

⁵⁰ Mua lémbua kuxinganeka kuma, kota o muthu umoxi kufuila o mundu, kiki soko ni muiji uoso kubuila.

⁵¹ Kienhiki ka di zuelela-kiu ngó. Mukonda Kaiafa, muène nganga ia dikota muvu uenhó, iu ua zambula kuma Jezú ua-ndu fuila o muiji bhu kididi.

⁵² Kienhiki o muiji ió ue ki uene ngó ua fuila, maji uà fuila kubhongolola kumoxi anʼ a Nzambi oso a di muangena ku makanga.

⁵³ Tunde-phe kizuua kienhókio, adiakime ku Jijudé, a kala mu ku mu kanena kioso kia mu jibha.

⁵⁴ Mukonda dia kiki, Jezú ka dʼ idikiza dingi mu ʼaxaxe ka Jijudé, maji uia ku ditutu, bhua zukama ni ixi ia kikangalakata, bhu sanzala i exana Efalaíme; anga u kala kuenhoko ni jixibulu jê.

⁵⁵ Kia zukama-phe o izuua ia Phasu ia Jijudé, akua ʼxi avulu a kala mù banda ku Jeluzaleme, kioso izuua kiluua i tena, mbebhu o ku di bonza.

⁵⁶ Anga a kala mù sota Jezú. A kala mu ku di zuelesa mu Tembulu, exi: Mua fika kiebhi? O kuila muène ua-ndu kuiza ku fesa?

⁵⁷ O makota ma jinganga-phe, ni jifalizeu, a bhele ngonge kuma se bhuala muthu ua mu ijiia bhuoso bhuala, a mu tukulule, ene ni a mu kuate.