Nzuá 10 - O Mikanda Ikola

O kifika kia jimbudi

¹ Jezú uixi: Kidi kiene ngi mi ambela: Uoso ka bokuena bhu dibhitu mu kibhanga kia jimbudi, maji u bandela kuengi, muène muíi ni kifumbe.

² Uoso-phe u bokuena bhu dibhitu, muène mubidi a jimbudi.

³ Mukua-dibhitu u mu jikuila. O jimbudi jívua o dízui diê. Uixana jimbudi ja mu tokala, ni majina-mâ, hé u ji tundisa ku kanga.

⁴ Kia tundisa o jimbudi jê joso, muène u ji tuamenena ku pholo, o jimbudi anga ji mu kaiela, mukonda jejiia o dízui diê.

⁵ Muthu uengi ki ji mu kaiela, lémbua! Maji ji mu lenga, mukonda ki jejiia dízui dia athu engi.

⁶ Jezú ua a tela kifikʼ iki, ene-phe ka kʼijiia se ua ambela ima iahi.

Jezú mubidi uambote

⁷ Jezú anga ua ambela dingi, uixi: Kidi kiene ngi mi ambela: Eme ngi dibhitu dia jimbudi.

⁸ Oso a ngi diangelele, a kexile míi ni ifumbe; maji o jimbudi-phe ki ja bhele mátui ku dízui diâ.

⁹ Eme ngi dibhitu. Se muthu u bokuena ko-kuami, u bhuluka. Muenhó u bokona, u tunda, u sanga jinga iangu.

¹⁰ O muíi uiza ngó mu kunhana, ni kujibha, ni kumuanga. Maji eme ngeza, phala o jimbudi ji kale ni muenhu, ji bhanduluke kiavulu.

¹¹ Eme ngi mubidi uambote. O mubidi uambote, u bhana o muenhu uê bhu kididi kia jimbudi jê.

¹² O mukua-nganhu, u kalakalela ngó kitadi kiê, ki muène mubidi, ki muène mukua jimbudi jê. Ió kia mona o kimbungu kiala mu kuiza, jimbudi u ji xa, hé u lengʼê. O kimbungu-phe ki ji kuata, ki ji muanga.

¹³ Mukua-nganhu u lenga, mukonda muène u kalakalela ngó kunganhala kitadi kiê, o jimbudi ki ji mu kuatela kima.

¹⁴ Eme ngi mubidi uambote. Mukuâ ni Tata kia ngʼijiia, eme-eme ue ngʼejiia Tata, kiene ue ngʼejiia jimbudi jami; o jene ue ja ngʼijiia.

¹⁵ Eme-phe o jimbudi ngi ji bhela o muenhu uami bhu kididi.

¹⁶ Ngala ue ni jimbudi jamukuá, ki jala mu kibhanga kiki. Jenhiji ki bhinga ngi ji takana. Jene jívua o dízui diami, hé ji kala kilunga kimoxi ni mubidi umoxi.

¹⁷ Kiene kia ngi zolela Tata, mukonda ngi bhana muenhu uami phala hinu ngi u tambule dingi.

¹⁸ Muenhu uami kana muthu u ngi katula-u, eme-muène ngi u bhana mu vondadi iami. Ngi tena ku u bhana, ngi tena ue ku u tambula dingi. Kiene Tata iami kia ngi tumu kubhanga.

¹⁹ Bhenhobho, kioso ki evu kiki, Jijudé ja uanunuka dingi mukonda dia maka mê.

²⁰ Amukuá, exi: Muène uala ni dimonho! Ua saluka! Phala-hi muala ku mu ívua ioso ia mu zuela.

²¹ Amukuá exi: Iá ki maka ma mukua-dimonho. Uala ni dimonho, ka zuela kiki! Kaxi dimonho, di tena kujikula mesu ma kifofo?

Fesa ia kuzelesa. Jezú uixi: Ngi Monʼ a Nzambi

²² Mu Jeluzaleme anga mu bhita Fesa ia Kuzelesa mu tembulu, bhu thembu ia kixibhu.

²³ Jezú anga u kala mù jeta mu Tembulu, mu kitelembe kia kubokuena ki ʼexana Mbalanda ia Salomá.

²⁴ Jijudé anga ji mu kondoloka, jexi: Katé bhebhi bhu u suka, ni ku tu bokuesa mu jiphata? Ki kala eie-muène u Kristu, tu tangele-kiu-phe.

²⁵ Kuala Jezú: Eme nga mi tangela kiá, enu-phe ki mu xikana. O ikalakalu i ngene kubhanga mu dijina dia Tata, iene jimbangi jami.

²⁶ Maji enu-phe ki mu xikana, mukonda ki mua tokala mu jimbudi jami.

²⁷ O jimbudi jami, jʼívua dízui diami. Eme ngi jʼijiia, o jene ue ji ngi kaiela.

²⁸ O mbudi jami ngi ji bhana o muenhu ki uábhua; ki ja kà fua dingi. Kana muthu ue u ji sumbununa bhu maku mami.

²⁹ O kutena kua ngi bhana Tata, kuala kota, ima ioso ndenge. Kala kiki, kana muthu u tena ku ji katula bhu maku ma Tata.

³⁰ Mbata eme ni Tata, etuʼ ene umoxi.

³¹ Jijudé bhenhobho anga a bonga matadi ma ku mu jibha na-u.

³² Jezú-phe, uixi: Ikalakalu iambote i nga bhange iavulu, i nga mʼ idikiza, ia ngi tumu Tata kubhanga. Ku ikalakalu iíi, kikalakalu kuẋi ki mu ngi jibhila ni matadi?

³³ Jijudé ji vutula, exi: Ki tu ku jibhila kikalakalu kiambote, kana! Maji mukonda dia kubhuma, mbata mu kuzuela kiki, eie ua ẋonguena Nzambi. Mukonda eie u muthu ngó, maji ua mu di bhanga u Nzambi.

³⁴ Jezú uixi: Manhi mu Kitumu kienu, ka ki soneka-mu, exi: Nzambi uedi: Enu mu jinzambi?

³⁵ Etu tuejiia kuila o Madivulu ma Nzambi ene mù zuela kidi; kuma Nzambi ua exana jinzambi enhó oso evile o maka-mê.

³⁶ Eme-phe o Tata muène ua ngi solo iu ua ngi tumikisa mu ngongo. Abha-phe enu mua mu ki zuelela-hi kuila eme nga mu ẋonguena Nzambi kioso ki ngi mi tangela kuila eme ngi Monʼê?

³⁷ Se ngi kamba kubhanga o ikalakalu ia Tata iami, kana ku ngi xikana.

³⁸ Maji se iene muene i ngene kubhanga, né kiá ki mu ngi xikana eme, xikanenu kiá ngoho o ikalakalu i ngene mù bhanga, phala mu kʼijiie tunde lelu té ku hádia kuma Tata uene mo-muami, eme ngene mua Tata.

³⁹ Ene anga a sota dingi ku mu kuata, maji muène-phe u a bhita bhu maku, anga u-iê.

⁴⁰ Jezú anga uia dingi ku sámbua dia Njolodá, bhu kididi bhua mateke-nene Nzuá kubatizala, anga u kala kuenhoko.

⁴¹ Athu avulu anga a mu sanga koko, hé a kala mu kuila, exi Nzuá ka bhangele kidiuanu, maji ioso-phe ia tangele kua Jezú, ia kidi.

⁴² Athu avulu anga Jezú a mu xikana bhu kididi kiókio.