Nzuá 1 - O Mikanda Ikola

Diambu dia di bhanga xitu

¹ Ku dimatekenu kioso mundu kiluua a u bhanga, ku kala o Diambu; o Diambu anga di kala kua Nzambi; o Diambu muène Nzambi.

² Kienhiki diene dia kexile ni Nzambi tunde ku dimatekenu.

³ Ima ioso iòbhange, Nzambi ua i bhangela mua muène; kana kima kia bhange Nzambi sé muène.

⁴ Mua muène mua kala o muenhu; o muenhu anga u kala mukengeji ua athu.

⁵ Mukengeji u muika mua vundu; o kuvunda-phe nuka kutena ku u jima.

⁶ Kuejile diiala a mu tumu kuala Nzambi, dijina diê Nzuá.

⁷ Muène uejile mu kala mbangi ia mukengeji, athu oso nʼa xikanene kua muène.

⁸ Muène ki muène mukengeji, uejile ngó mù kaia mbangi ia mukengeji.

⁹ Iú uene mukengeji ua kidi, ueza mu ngongo mu ku muikina athu oso.

¹⁰ Muène Diambu ua kexile mu ngongo, o Nzambi mundu ua u bhangela mua muène, maji o mundu-phe ki ua mu ijiia.

¹¹ Uejile ku athuʼê a mu tokala, athuʼê-phe ka mu tambulula.

¹² Maji amoxi-mu a mu tambulula, ia a xikana dijina diê; enhá Nzambi ua a bhana o kutena kua kukala anʼê.

¹³ Ene a di bhange anʼ a Nzambi, kana mu ku a vuala ku xitu ni ku manhinga, kana ku vondadi ia muthu, kale ngó ku vondadi ia Nzambi.

¹⁴ O Diambu anga u di bhanga xitu, anga u tunga mu ʼaxaxi ketu, uezala kiadi ni kidi. Etu anga tu mona o unène uê, unène kala ua Mona umoxièlele ua Nzambi.

¹⁵ Nzuá u mu kalela mbangi, u di kola, uixi: Ió mùene nga mu tange, ngixi: Muthu iú uiza ku dima diami, maji muène ua ngi tundu, kuma muène ua ngi diangela, mbata ua diangele kiá kukala-ku, kuila eme kiluua a ngi vuala.

¹⁶ Ku nzungule ia umvuama ua henda iê, etu oso tua tambula-ku ndumba ia kiadi mu kiadi.

¹⁷ Mbata o Kitumu a ki bhelele kua Mozé, o kiadi-phe ni kidi, kiejila kua Jezú Kristu.

¹⁸ Kiluua kukala muthu u mona Nzambi. O Mona umoxi-èlele, kuma muène ue Nzambi, uene bhu jihata ja Tata, muene ua tu tukuluila Nzambi.

O umbangi ua Nzuá dia Batizu

¹⁹ Iú uene umbangi ua Nzuá, kioso Jijudé ku Jeluzaleme ki ja tumine jinganga ni jilevita ku mu ibhudisa, exi: Eie nanhi?

²⁰ Muène ua di tange, ka di tunu, uixi: Eme, ki eme ngi Kristu.

²¹ Ene anga a mu ibhudisa dingi, exi: Tuila-phe kiebhi? Manhi eie Elija? Uixi: Kana! Ki eme. Exi: Eie polofetʼoio tuene ku mu kinga? Uixi: Kana.

²² Ene-phe a mu ambela dingi, exi: Eie-phe nanhi? Mukonda tua bhindamena o kuijiia ioso i ua mu di xinganeka éʼmuène, phala tua ka vutuile oso a tu tumu. Eie ua di jimbula kiebhi?

²³ Muène ua vutuila kala kiambele Izaia dia polofeta, uixi: Eme ngi dízui dia ió u di kola mu ditutu: Iukisenu njila ia Ngana, phala a bhite.

²⁴ Ene a a tumuʼá, a tokala mu jifalizeu.

²⁵ Anga a mu ibhudisa dingi, exi: Ihi-phe ia ku bhangesa kubatizala, se eie, ki eie u Kristu, ki eie Elija, ki eie u polofetʼoio tuene ku mu kinga?

²⁶ Nzuá ua a vutila, uixi: Eme nga batizala ni menha. Maji mu ʼaxaxe kenu-phe muemana muthu, enu ki mu mu ijiia.

²⁷ Muène uala mù kuiza ku dima diami, maji eme ki nga fuama ku mu jituina ngó o lungoji lua haii iê.

²⁸ Imʼiíi ia bhitile mu Betanha, ku sámbua dia Njolodá, kua kexile Nzuá mu kubatizala.

O Kambudi ka Nzambi

²⁹ Kizuua kia kaiadi Nzuá u mona Jezú uala mù kuiza kua mùene, uixi: Talenu! Muenhó Kambudi ka Nzambi, ka katula o ituxi ia mundu!

³⁰ Muenhú nga mu tange, ngixi: Muthu iú uiza ku dima diami, maji muène ua ngi tundu, kuma muène ua ngi diangela, mbata ua diangele kiá kukala-ku, kuila eme kiluua a ngi vuala!

³¹ Eme ue ki ngi mu ijidile, maji ngeza mù batizala ni menha phala muène a tukuluke ni a mu ijiie mu Izalaiele.

³² Nzuá anga u bhana umbangi, uixi: Nga mono Nzumbi kutuluka ku diulu kala diembe, anga di tula ku thandu dia muène.

³³ Eme-mùene ue ki ngi mu ijidile, maji o Nzambi, uoso-phe ua ngi tumu kubatizala ni menha, muène ua ngʼ ambela, uixi: Uoso uà mu mona, Nzumbi i tuluka mu diulu, anga i mu tula ku thandu diê, muène u batizala ni Nzumbi Ikôla.

³⁴ Eme nga ki mono kiá, kiene ki nga bhela umbangi, kuma muenhú Monʼa Nzambi.

Jixibulu ja dianga ja Jezú

³⁵ Kúkia ni kimene, Nzuá u kala dingi bhenhobho ni jixibulu jê jiiadi.

³⁶ Anga u mona Jezú uala mù bhita, uixi: Talenu! Ió muène o Kambudi ka Nzambi!

³⁷ Jixibulu jiiadiʼji, kia mu ivu kuzuela kiki, a kaiela Jezú.

³⁸ Jezú anga u sakuka, u mona ala ku mu kaiela, anga ua ambela, uixi: Ihi i mua-lu sota? Ene a mu kumbulula, exi: Labi, (Mesene), eie ua tungu kuebhi?

³⁹ Muène, uixi: Zenu mu tale. Anga aia-nê, a sanga bhuoso bhua-lu kala, hé a nanga-nê kumbi dienhódio. Ia kexi kiá ola ia kauana ku kièmba.

⁴⁰ Ku kiiad ʼiki, evu Nzuá kuzuela, anga a kaiela Jezú, muthu umoxi Mandele, phange ia Ximá Phetele.

⁴¹ Muène anga u sota hanji phangʼiê Ximá, u mu ambela, uixi: Etu tua sange Mesiia, (Mu ku di lombolola, uedi tua sange Kristu).

⁴² Anga u mu bheka kua Jezú. Jezú kia mu tale sûi, uixi: Eie Ximá, monʼ a Jona, tunde lelu a-nda ku ku ixana-phe Kefa.

Jezú u ixana Felipe ni Natanaiele

⁴³ Kúkia ni kimene, Jezú uandala kuia ku Ngalileia. Anga u tuama kusota Felipe, hé u mu ambela, uixi: Ngi kaiele.

⁴⁴ Felipe muene mukua Betesáida, ku bhata dia Mandele ni Phetele.

⁴⁵ Felipe anga u sota Natanaiele, u mu ambela, uixi: Etu tua sange muthu ió a mu soneka kua Mozé mu divulu dia Kitumu, iá a mu tange ue mu Mikanda ia jipolofeta. Muène Jezú, mukua Nazalé, monʼ a Zuze.

⁴⁶ Kuala Natanaiele: Ku Nazalé, ku tena ue kutunda kima kiambote? Felipe ua mu vutuila, uixi: Zá, u tale.

⁴⁷ Jezú kia mono Natanaiele ua-la mù kuiza ko-kué, uixi: Talenu! Muthu ió mukua Izalaiele ua kidi, moxi diê kene ni kádia!

⁴⁸ Natanaiele ua mu ambela, uixi: Eie Ngana, ua ngʼ ijidila kuebhi? Kuala Jezú: Eme nga dianga ku ku mona, kioso Felipe ka ku ixana luua, ki ua xikamene moxi a mufiku.

⁴⁹ Natanaiele ua kumbulula, uixi: Mesene, eie u Monʼ a Nzambi! Eie Ngana, u sobha ia Izalaiele.

⁵⁰ Kuala Jezú: Mukonda nga ku ambela kuma nga ku muene moxi a mufiku, kiene ki ua xikanena? Eie uandu mona ima ia tundu iíi!

⁵¹ Uixi: Eme ngi mi ambela kuila, hinu mu mona diulu dia jikuka, ni ji-anju ja Nzambi ji banda ji kulumuka ku thanduʼ a Monʼ a Muthu.