Ngalásia 4 - O Mikanda Ikola

¹ Ngambe dingi kuma: O mona uandù kala kabhinganu ka imbamba ia tatʼâ, kioso ki ala hanji monʼ andenge, a mu bhangʼê kala ngamba, sumbala, ni kidi kiene, muene ngana ia ima ioso.

² Kioso ki ala hanji monandenge, u kala ni athu a mu tambula konda ni ku mu sasa ni ku mu bhangela o mauenji katé kia bhixila bhu kizuua kia mu xindi tatʼâ.

³ Kiene kimoxi ue ni etu kioso ki tua kexile tu anandenge mu nzumbi, tua kexile mu ubhika ua imbamba iala ni nguzu ia kutumina mu ngongʼ umu.

⁴ Maji kieza o thembu iatenena, Nzambi ua tumikisa Monʼê muene. Muene iú ueza kala mona a mu vuala ku muhatu mu ngongo, a mu vuala iú ua kudila bhoxi dia Kitumu kia Jijudé.

⁵ Phala ku a kula ene oso bhoxi dia ubhika ua Kitumu, nʼa tu bheke mu kikexilu kia kukala tu anʼ a Nzambi.

⁶ O mu kuidikiza kuila tuala tu anʼê, Nzambi ua tumikisa Nzumbi ia Monʼ ê mu miẋima ietu, o Nzumbi i tena kudikola: Abha, Tata!

⁷ Kala kiki, ki muala dingi mu abhika, maji muala mu ana; o ki muedi mu ana, Nzambi ua kà mi bhana ioso ia bhakela anʼ ê mua Kristu.

O hele ia Phaulu ku akua Ngalásia

⁸ Mu thembu iabhiti mʼ ukulu, mukonda dia kukamba o kuijiia Nzambi, mua kexi kubhikila jinzambiʼ ojo ki jinzambi ngó ja kidi.

⁹ Maji o kikiphe, ki mueza mú kuijiia Nzambi,— mba inda ngedi Nzambi ku mʼ ijiia enu,—phala-hi mu alukila dingi ku jinguzu ja jinzumbiʼ ojo ja kubhuila, ja uadiama, ji mua mesena mu kutuka dingi mu ubhika uê?

¹⁰ Phala-hi dingi mua bhindamena kubhana ujitu ku izuua imoxi-mu, ni jimbeji, ni jithembu, ni mivu?

¹¹ Nga mi kala ni hèle iavulu! Manhi o hadi ioso inhá i nga mi talela kifua iaié ngó?

¹² Nga mi diondo, jiphange jami kalenu uila ki ngala eme. Kuma eme nga di bhange kala ki mualʼ enu. Enu ue ki mua ngi bhange phulu ia kima.

¹³ Maji mua kʼ ijiia kuma uhaxi ua xitu ua ngi bhekele, o thembu i nga diangele ku mi bokela o Njimbu Iambote?

¹⁴ Suke o uhaxi uami uedile kala kima kia mi tundu o thulu kieza ku mi lola, maji enu-phe ki mu ngi di tunu, mba mu ngi tènda. Inda mua ngi tambulula muene kala ngi anju ia Nzambi, mba kifua eme-muene kiá Kristu Jezú.

¹⁵ Enu mua kexile muene ni kutana kuavulu! Kima kiahi kia mi bhitile? Eme ngi mbangi ienu, mbata ngi ki tanga, ngi tona kuila, se kia ẋikinine ku ki bhanga, hinu o mesu menu muene mua ma lokola phala ku ngi bhana-nâ eme.

¹⁶ Manhi kiki nga di bhange ngi nguma ienu, mu ku mi tangela o kidi?

¹⁷ Athu enʼió leluʼidi a suina ni ku mi bhomba, maji kala ni muẋima uambote. Mukonda a mesena a mi sandula ko-kuami phala mu di tambulule ni ene, muie ni ku a xinganeka mukuâ ni ki muene ku ngi xinganeka eme.

¹⁸ O ku di tambulula ni muẋima uambote sé kádia, kiauabha! Maji ki kale thembu joso kiene, kana thembu ngó i ngi kala eme mu ʼaxaxe kenu.

¹⁹ Mu tuana tuami, tata! Mukuâ ni mama ia suku-bhu, nga mi katela dingi mika ia kuvuala. Ngi kuata muene kutala hadi, katé Kristu kia di bhanga moxi dienu.

²⁰ Nginda ngi kala kindala mu ʼaxaxe kenu, ni ngi lungulule dizui mu kuzuela ni enu. Kuma muẋima ua ngi sakalala kiavulu mukonda dienu!

Ni Sala ni Hangale, kifika kia ikutu iiadi

²¹ Ngi tangedienu hanji kima kimoxi, enu mua mesena mu kala dingi mu ubhika ua Kitumu, o Kitumu muala ku kʼ ivua kiebhi?

²² Kuma mu Kitumu, kiosoneke, exi: Mbalahamu u kala ni anʼ ê kiiadi: Iú monʼ a mukama, mamʼâ Hangale; o iú monʼ a ndona, mamʼâ Sala.

²³ Maji-phe o monʼ a mukama Uvuadiue uê ua xitu; monʼ a ndona-phe a mu vuala ku polomesa ia bhele Nzambi.

²⁴ Imʼ iii-phe ia di bhange kala kifika. Kuma ahatu aiadi enʼiâ, ikutu iiadi: Umoxi u tunda ku mulundu ua Sinai, anʼ ê ua a vualela mu ubhika, kifua abhika, muene-phe Hangale.

²⁵ Kuma Hangale muenʼ iú, uala bhu kididi kia mulundu ua Sinai ku Alábia, o Hangale-phe muene o kijimbuete kia Jeluzaleme ia lelu iala-ku, kuma iala mu ubhika ni anʼ ê oso.

²⁶ Maji o Jeluzaleme ia diulu-phe fôlo, muene mamʼ etu etu.

²⁷ Kuma a ki soneka mu Mikanda Ikôla, exi: Tana-ku, eie u mbaku, ua kambe kuvuala! Dikole u te nzongo ia kusanguluka, eie kiluua u ivua mika ia kuvuala! Kuma anʼ a muhatu a mu ehelela, kota mu kuvula, uala ni muadi uê ndenge.

²⁸ Kiki enu jiphange jami, mua sokela ni Izake, muala mu anʼ a Nzambi mukonda dia polomesa.

²⁹ Kala-phe ki kia bhitile mʼ ukulu munhá, o mona mukua Uvadiue uê ua xitu u kala mú zukutisa o mukua Uvadiue ua Nzumbi ia Nzambi. Ni kiki ue, kiene hanji ki kiala kubhita.

³⁰ Maji-phe o Mikanda Ikôla iambe kiebhi? Iambe kiki: Mukâma mu ambudise, ni monʼ ê, kuma o monʼ a mukâma ka tena kulundula mu bhata dia tatʼ â kumoxi ni monʼ a ndona.

³¹ Uila kiki, jiphange jami, etu ki tuala dingi tu anʼ a mukâma, maji tu anʼa ndonda.