Ngalásia 3 - O Mikanda Ikola

O Kitumu ki ki tena kubhana muenhu, kikale kʼ idikiza ngó Kristu u bhana o muenhu mu ku mu xikana

¹ Mu akua Ngalásia, tata, o kutobha! Nanhi ua mi bhuiika? Mu athu a mʼidikisile Kristu ni kulomboloka kuoso kala ku mesu enu muene kua mu tela ku dikulusu!

² Nga mʼ ibhula ngó kima kimoxi: Enu o Nzumbi ia Nzambi mua mu tambuila mu kubhanga o imbamba ia Kitumu, inga mua mu tambuila mù kuivua ni kuxikana o Njimbu Iambote?

³ Mua tobhela-hi kiosuʼ iki? Enu mu andekelele mu Nzumbi ia Nzambi, kifua muandù zubhila mu xitu?

⁴ Jihadi joso ji mua talele, kifua mua ji talela kingoho? Kana, ki ki xikina!

⁵ Manhi o Nzambi mukua ku mi tambuisa o Nzumbi iê, hé u bhanga madiuanu mu ʼaxaxe kenu, kifua ua ki bhangela mukonda enu mualù bhanga ia tumu o Kitumu? Inga ua ki bhangela mukonda enu meuvu, enu mua xikana o maka ma Njimbu Iambote?

⁶ Kia soko ni Mbalahamu kioso kia xikanene Nzambi, o kuxikana kuê anga a mu kitila-ku kulunga, kala ki ambe o Mikanda Ikôla.

⁷ Kala kiki, ijiienu-kiu kuma, oso akua kuxikana, ene anʼ a Mbalahamu.

⁸ O Mikanda Ikôla ue mu kuzambula kuila Nzambi ua kà lungisa matumbu mu kuxikana, kiene ki ia longela jinga o Njimbu Iambote mʼukulu kua Mbalahamu, iexi: Madiembu moso ma kà zediuila kokuê.

⁹ O Mbalahamu ua xikana, iá a mu zediuisa kuala Nzambi. Uila kiki, oso akua kuxikana, Mbalahamu mukuâ, a zediua ue kala muène kia mu zediuisile.

¹⁰ Oso-phe a dielela mu kutumaka o imbamba ia Kitumu, ala ni mázui ma Nzambi ku thandu diâ. Kuma kiosoneke mu Mikanda Ikôla, exi: Uoso u kamba kuenda ni kubhanga ima ioso iosoneke mu Divulu dia Kitumu, uala ni mázui ma Nzambi ku thandu diê!

¹¹ O kuila kana muthu u tena kulungila ku Kitumu bhu pholo ia Nzambi, kima kia di monekena, kuma mu Mikanda ia Ngana ambe, exi: Uaiuka u laiela mu kuxikana.

¹² Maji o Kitumu-phe ki kiene ni kuxikana. Mukonda, kala ki ambe o Mikanda Ikôla: Uoso u bhanga o ima ia tumu o Kitumu, mu Kitumu muene mua muena o muenhu.

¹³ Maji Kristu-phe ua tu kula ku mázui ma Kitumu, mu kubiluka mukua mázui bhu kididi kietu. Kuma kiosoneke mu Mikanda: Uoso a mu nhenga ku dikulusu mukua mázui.

¹⁴ Kiki kia bhiti, phala o dibesá dia tanga Nzambi kubhana Mbalahamu, dʼize ue ku thandu dia akua matumbu mua Kristu Jezú. Mbé etu ene oso o polomesa ia Nzumbi tu i tambuile mu kuxikana.

O polomesa ni Kitumu

¹⁵ Enu jiphange, ngi zuela hanji mu kikexilu kia athu: Né mbe ki kala kikutu ngó kia athu kiiadi, se edi kikutu a zubha kiá o ku ki ta, kana muthu u aluluka dingi, mba u ta-ku dingi diba diengi.

¹⁶ O jipolomesa-phe ja bhana Nzambi kua Mbalahamu ua mu tangela-ju, ni ió u tunda ku mbutu iê. Kambe uixi: Ni iá a tunda ku Jimbutu, kala avulu; maji uambe kala muthu umoxi muene, uixi: Ni ió u tunda ku mbutu iê, muene-phe Kristu.

¹⁷ Eme-phe ngambe kiki: kioso kikutu kia Nzambi ki a ta jinga mʼ ukulu, bhu kaxi anga bhu bhita hama jiuana ja muvu ni makuinhi atatu, anga kuiza kiua o Kitumu. O Kitumu kiokio ki ki tena kubhuisa-ku o kikutu kia tuama, ki ki tena ue kutumbulula o polomesa ia Nzambi.

¹⁸ Kuma o Nzambi kioso kia bhana, se ua ki bhela mukonda dia Kitumu, kedi dingi kuma ua ki bhela o polomesa ia diangele kubhana. Maji Nzambi-phe mu ngoho ua bhana kua Mbalahamu kiokio kia diangele kiá ku mu bhela o polomesa.

¹⁹ O Kitumu-phe a ki bhela-hi? Kitumu a ki bandekeza ku pholo kunu, phala kuidikiza o ima ioso iaiibhila Nzambi. Kiene ki nanga ngó katé bhuoso bhu ijila ió a mu bhele polomesa u tunda ku mbutu ia Mbalahamu. Kitumu a ki tumikisina ku ji-anju, ni ku muthu u di bhanga muzumbu uenda na-kiu.

²⁰ O ki kala-phe a mu tanga muthu umoxi, ki ku bhingi dingi muzumbu; o Nzambi-phe umoxi ngó.

Kioso kia xindi o kitumu

²¹ Manhi o kiki tuila kuma o Kitumu kia di zembe ni jipolomesa ja Nzambi? Ki kiene! Mbata se a bhele Kitumu ki tena kubhana muenhu ku athu, ni kidi kiene o muthu kulunga bhu pholo ia Nzambi, kuejù kala kua Kitumu.

²² Maji o Mikanda Ikôla-phe iambe kuila athu oso a a jikila bhoxi dia kutena kua ituxi, phala o polomesʼ oio i bhinga kuxikana Jezú Kristu, i kale ia ene oso a xikana.

²³ Thembuʼ oio-phe kuila kiluua kuiza o kuxikana, etu a tu kuikidile mu ʼaleia kuala o Kitumu, etu tua xikamenene o kuxikana kuanda kutukuluka.

²⁴ Uila kiki, o Kitumu kifua kia biluka kiledi kietu ki tu tambula konda katé bhuoso bhu ijila Kristu, mbé Nzambi a tene ku tu xikinina mu kuxikana.

²⁵ Kiki-phe ki eza kiá o thembu ia kuxikana, ki tu bhindamena dingi kiledi kia ku tu tambula konda.

²⁶ Mukonda enu oso mua di bhange mu anʼ a Nzambi, mu kuxikana Kristu Jezú.

²⁷ Kuma oso mudienu a mi batizala mu dijina dia Kristu, mua zuata kiá o kikexilu kia muène Kristu.

²⁸ O mua Jezú Kristu ki muene dingi katungu ka Judé ni iú ki Judé, ki muene mubhika ni fôlo, ki muene diiala ni muhatu; enu oso enuenu amoxi.

²⁹ O ki kala enu oso mua tokala Kristu, muala mu mbutu ia Mbalahamu; mu ibinganu ia polomesa ia bhele Nzambi kua Mbalahamu.