Ngalásia 2 - O Mikanda Ikola

Phaulu mu Jeluzaleme, o Phetele mu Andiiokia

¹ Kia zubha o kubhita kuinhi dia mivu ni iuana-phe, nga bandele dingi ku Jeluzaleme kumoxi ni Barnabé, ni Tito ue ngele-nê.

² Ngele-phe mukonda dia Ngana ku ngi longesa kuila kia ngi fuama kuia-ku. Kuenhoko anga ngi di bhongoluela mu Kionge ni adiakime a Ngeleja, anga ngi kala mu ku a jimbuila o Njimbu ioso i ngene kuboka mu ʼaxaxe ka akua jixi jengi. Maji nga a jimbuila bhu mbandu, ene ngó a fumana ku uadiakime, ngixi sumba ngedi kala eme-muene ngó nga di tumu, eme nga mu tala ngó hadi.

³ Maji-phe né Tito, mukuetu nga kexi-nê, sumbala Ngeleku, ka mu bhinjikile ku mu saia.

⁴ Inda o phata iejilile ku jiphange ja makutu, ja bokuene ni kuzonza ni ku di dinga, anga a mesena ku mu saia. Mukonda ene a bokuene mu kulonda o ufolo uetu u tuene na-u mua Kristu Jezú, phala nʼ a tu bheke dingi ku ubhika.

⁵ Enʼió-phe ki tua ẋikinine ku a enzela, mba ku a tolokela, né bhofele ngó, mbebhu o kidi kia Njimbu Iambote ki xale mu ʼaxaxe kenu.

⁶ O ió-phe oso a fumana ku uadiakime, (hé a dianga, eme ki kia ngi kuatela kima kuma Nzambi kene ni katungu ka athu)—enʼió a fumana, ka ngi bandekezele kima kiengi kia ubhe.

⁷ Maji a bhangele kiengi, kioso kia zubha o ku ngi mona kuma eme a ngi thelekala o Njimbu Iambote ku i bheka ku athu a kambe o ku a saia; mukuá, ni Phetele kia mu bhana o ku i bheka ku akua kusaia, o Jijudé.

⁸ Mukonda, mu kutena kua Nzambi, a ngi bhange ngi Poxolo ia ió ka tokala mu muiji ua Jijudé, kala Phetele kia mu bhange kukala Poxolo ia ió oso a tokala ku muiji ua Jijudé.

⁹ Mukonda dia kiki, kia zubha o kutongolola kiadi kioso kia ngi bhana Nzambi, ni Tiiaku, ni Phetele, ni Nzuá, ene a fumana kuma jingunji, a ngi bhele, ni eme ni Barnabé, lukuaku lua dilu mu usoko, phala etu tu di tele ku ió ki Jijudé, ene a di tele ku Jijudé akua kusaia.

¹⁰ Inda kima kimoxi ngó kia tu bhingile, o kulembalala jingadiama mu Jingeleja jâ; kienʼ iki kiene o kima ki nga suinina kiá, katé ni lelu o ku ki bhanga ni muanu.

Phaulu u di thathamena ni Phetele

¹¹ Ki ejile-phe Phetele ku Andiiokia, nga mu bazelele bhu pholo ia mundu, mukonda ua tokalele ku mu elêsa.

¹² Kuma ki tua kexile kuila enʼió kiluua eza a tundile kua Tiiaku, akua ʼxi kuenhoko, ki Jijudé, u kala mu kudia-nâ. Maji enʼió-phe kia zubha kuiza, ua lunguluka, ua di abhula mu kisangela kia ió ki Jijudé, mukonda dia uôma ua Jijudé, akua kusaia, anga u mesena kiá kusaiesa ió ki Jijudé.

¹³ Kia bhingi ni jiphange ja Jijudé jamukuá ue a kala mu ku mu fikisa. Katé ni Barnabé a mu bhitula mu ku di bhangesa kuâ.

¹⁴ Eme-phe ki nga mono kuma kala kuenda kia iuka kala kia fuama mu kidi kia Njimbu Iambote, ngʼambelele Phetele bhu pholo ia ene oso, ngixi: Eie uala u Judé, se ua tambulula kiá kikexilu kia umatumbu, o kia ujudé kana dingi, phala-hi u bhinjika dingi o matumbu kukuata ujudé?

Ni Jijudé, ni iá ki Jijudé alungila mu kuxikana

¹⁵ Etu a tu vuala tu Jijudé, ki tuala tu akua ituxi kala o matumbu, ki Jijudé. Maji-phe tua kʼ ijiia ue kuila muthu ka tena kulungila mu kubhanga imbamba ia Kitumu, kikale u lungila mu kuxikana Jezú Kristu.

¹⁶ Kiene ue etu ki tua xikanena Kristu Jezú, phala Nzambi a tu ẋikinine mu kuxikanʼ oko ku tua xikana Kristu, kana mu kubhanga imbamba ia Kitumu. Mukonda mu kubhanga o imbamba ia Kitumu ki muene dingi mu lungila muthu kua Nzambi.

¹⁷ O ki tu kala-phe mu kusota kulungila kua Kristu bhu pholo ia Nzambi, kia lomboloka kuila tuala ue tu akua ituxi kala ió, ki Jijudé. Maji-phe o kienʼ iki tu kʼ ila kiebhi? Manhi tuila Kristu ua mu sedivila ki andala o ituxi? Ki ki xikina!

¹⁸ Kuma se ngalukila o kutunga ima ioio i nga sengulula kiá, nga di belesa kuma ngi mutondadi a Kitumu.

¹⁹ Mukonda kia zuela o Kitumu, eme ngi mufi ua Kitumu—a ngi jibha kuala o Kitumu kiene—phala muenhu uami u kale kua Nzambi. Mbata nga fuila ku dikulusu kumoxi ni Kristu.

²⁰ Kiki ki eme dingi ngala ku muenhu, maji Kristu uala ku muenhu moxi diami. O kiki o muenhu u ngala na-u mu xitu, nga u muena mu kuxikana Monʼa Nzambi, ió ua tenene ku ngi zola ni ku di bhakula mukonda diami.

²¹ O kiadi kia Nzambi nguami ku ki tumbulula. Mbata o kulunga se ku kala kua Kitumu, Kristu-phe ua fuê ngó!