Nehemiia 9 - O Mikanda Ikola

O kudiela ni kutukulula o ituxi iòsueke

¹ Anga anʼa Izalaiele a di bhongolola mu kizuua kia makuinhi aiadi nʼiuana ni kujila ni makuba ma zuata, ni mavu ma di takela mu mítue.

² Anga muiji ua anʼa Izalaiele u di sandula mu matumbu oso a kexe muʼaxaxi kâ, hé a dʼimanena, anga mu kudifisala a kuata kuditanga o ituxi iâ, ni ikuma ia jitata jâ.

³ Anga kizuua a ki uana mu mbandu jiuana. Ene ki a balumuka bhu kididi bhuemana, a tanga mu divulu dia kitumu kia Ngana Nzambi iâ mu mbandu ia kauana ia kizuua, mbandu ia kauana iamukuá anga a di fisala ni kutukulula o ituxi iâ, ni kubheza Ngana dia Nzambi iâ.

⁴ Anga Jesuua, Baní, Kadimiiele, Sebaniia, Buni, Selebiia, Baní ni Kenani, anga emena ku kitalamu bhu kididi kia akua Levi bhua tulama, anga a kala kudikola ni dízui dia suína kua Ngana dia Nzambi iâ.

⁵ Kuala akua Levi: Jesuua, ni Kadimiiele, Baní, Hasabeneia, Selebiia, Hodiia, Sebaniia, Petakiia; exi: Fundumukenu, tanesenu Ngana dia Nzambi ienu katé ku hádia ni hádia; ndokuenu mu tanese o dijina dia fuma iê, dia tundu o dibesá dioso ni diximanu.

O musambu ua Jilevita

⁶ Eie Ngana, eie-muène ubheka ué, eie ua bhange o diulu, ni diulu dia madiulu, ni kifuxi kiê kioso; ni oxi ni ima ioso iala-mu; o misanza ia kalunga ni ima ioso iala-mu; eie Ngana anga ene oso u a bhana o muenhu, anga kifuxi kia diulu ki kala mu ku ku bheza.

⁷ Eie-muène u Ngana, u Nzambi ua tunguile Mbalamu, anga u mu katula mu ixi ia Ule ku Kaladeia, anga u mu luka dijina Mbalahamu.

⁸ Anga u mu mona ni muẋima ua iuka bhu pholo ié, hé u ta-nê kikutu, kuila ua-nda ku mu bhana o ixi ia akua Kanana, ia akua Hiti, ia akua Amolé, ia akua Peleze, ia akua Jebuzé, ia akua Jidingazé, nda u i bhana o mbutu iê; eie anga u tenesa ki ua zuela, kuambe eie Ngana ua iuka.

⁹ Anga u mona dilamba dia jitata jetu mu Ijito, anga uívua o kudikola kuâ ku mbanduʼa Kalunga Ka Kusuka.

¹⁰ Anga Falaó u mu idikiza ijimbuete ni madiuanu, ni akua mbèle iê oso, ni akua ixi iê oso; mukonda eie uejidile kuma ene a bhangele phulu iavulu ku jitata jetu; eie mu kubhanga kienhiki ua di bhekela dijina dinangenena, kala ki tua mu ki mona leluʼiki.

¹¹ Eie anga u bula o musanza ua kalunga bhu pholo iâ, ene hé a bhita mu kaẋi ka kalunga, bhoxi diòkukutu; a kexile mu kuiza ni ku a kaiela, anga u a bobesa mu dikungu dia zongo, mukua ni ditadi dia sonokena mu mafutʼa menha.

¹² Mu muanha anga u a songuela ni dituta dia kilembeketa, o mʼusuku u a endesa ni dituta dia túbhia, nda u a muikine mu njila mu a kexi mu kuendela.

¹³ Anga u tuluka ku mulundu ua Sinai, hé u a zuelesa tunde ku diulu; anga u a bhana mabatuilu ma iuku, ni itumu ia kidi, ni matendelelu ni ijila iambote.

¹⁴ Anga u a ejidisa o sabhalu ié ikôla; hé u a tumikisa o matendelelu, ni jingonge, ni ijila, ni kitumu mu ukunji ua mubhikʼé Mozé.

¹⁵ Anga mu nzala iâ u a bhana kúdia mbolo ia diulu, o mu dinhota diâ u a katuila menha a fuáfua mu ditadi; Eie anga u a tangela kuila a bokone kiá mu tambula o ixi i nga lekela o lukuaku ni kuloka ngixi ngʼa bhana-iu muene.

¹⁶ Ene-phe, o jitata jetu, kua eza ukumbu; anga a kolokotesa o xingu jâ, a fula o kuxikana, hé a dituna kubhana o mátui ku ijila ié.

¹⁷ Anga a dituna muene ku kuívua, o madiuanu mé u ua a bhangela, ku a xinganeka kana; anga a kolokotesa o xingu iâ mu kuxikana, o mu huka kuâ anga a zangula mutumini hé a mu ta ku pholo iâ, mu kusota kuvutukila mu ubhika uâ mu Ijitu; Maji eie-phe, eie u Nzambi ia muloloki, ia kutululuka ni henda, ua kokoloka mu kutema, uene ni unéne mu kubhanga o mbote, ku a ehelela.

¹⁸ Sumbala hanji ene a bhange o ngombe iâ ia kuzunza, exi: Iii iene o Nzambi ié, ia ku katula mu Ijito; anga a bhanga isunji ionéne mu kuiibha kuâ;

¹⁹ eie mu nzungule ia jihenda jé, ku a ehelela mu kikangalakata. Mu muanha dituta dia kilembeketa ki dia a kambele, né o dituta dia túbhia mʼusuku, phala kuia ni ku a muikina, ni ku a edikiza jinga o njila mu endela.

²⁰ Anga u a bhana o Nzumbi ié iambote, mbé i a longe; o maná ié, ku a katula-iu mu kanu diâ; anga u a bhana menha mu dinhota diâ.

²¹ Hé u kuata ku a disa kienhiki mu makuinhʼauana a mivu mu kikangalakata; kana kima kia a kambele; o izuatu iâ ki ia kukile, o inama iâ ki ia jimbile ni kuenda.

²² Eie ua a bhana ue o maungana ni madiembu, anga u a uanena o ixi mu ibuka-ibuka; ene anga a tambula o ixi ia Sihone, iene ixi ia sobha ia Hexebone, ni ixi ia Oge, sobha ia Basane.

²³ Anga u sokolola anʼâ mukuâ ni jithéthembua ja diulu, anga u a bhiẋidisa mu ixi i ua tangelele o jitata jâ ku i bokona, nda a i tambula ni a ivue.

²⁴ Kienhiki, anʼâ hé a bokona mu ixiʼoio, anga a i tambula i kala iâ; anga eie u tolola akua Kanana, a tungile-mu, hé u a bhana-nâ bhu maku, ni jisobha jê, ni akua ixi oso, ene nda a a bhange kioso kia a bhiti ku muẋima.

²⁵ Anga a tolola o jisanzala ja suína ni ixi ia nete ibhana idima kiambote, anga a bokona jinzo jezala ni jimbote joso, ni ixima iòkande kiá, ni mivide, ni midiva, ni miẋi ia ibundu ia kúdia, iandumba. Anga a dia, ekuta, a neta ni ene, hé a kala mu nanga mu jimbote, mukonda dia kulenduka kué kuavulu.

²⁶ Kua eza-phe kubhukumuka anga a ku balukila eie, a texi o kitumu kié ku dima diâ, anga a jibha o jipolofeta jé, a kexi mu fuila o ku a bazela, sembele ene a diele nʼa vutuke kokué. Kienhiki anga a kala mu bhanga isunji ia makota.

²⁷ Kia ku bhangesa eie Ngana kua a bhana bhu lukuaku lua jinguma jâ, anga a kala mu ku a tatesa; maji mu kithangana-phe kia kutata kuâ, ene ki a dikola ko kué, eie ua evua tunde mu diulu; anga mukonda dia kuvula o henda ié, u a bhana athu a a bhulula nʼa kala mu ku a kula bhu maku ma ió, o jinguma jâ a kexi mu ku a tatesa.

²⁸ Ela-phe, a nhoha-ku, a tonʼâ dingi o kubhanga kiaiibha bhu pholo ié; eie anga u a ehelela dingi bhu maku ma jinguma jâ, nda a a bhikise; ene-phe ki a diela, ni kudikola ko kué, eie u a evua tunde ku diulu, o mukonda dia henda ié, luavulu muene lu ua a kudila.

²⁹ Anga u kala mu ku a bazela, mbé ene a lungulukile ku kitumu kié; maji ene-phe a bhanga ima ia ukumbu uoso, anga a dituna kuívua o ijila ié, a bhukumukina-phe o jiphangu jé, ja bhingi muthu se u ji kuata, ji mu bhana muenhu; anga a thuthujula o isuxi iâ, a kolokotesa xingu jâ, ni kudituna kuívua.

³⁰ Eie-phe ua a vungina ni kilendu kié mu mivu iavulu, anga u kuata ku a bazela ni Nzumbi ié, mu ukunji ua jipolofeta jé; maji ene-phe nguaʼuâ ku ku bhana mátui; kia ku bhangesa ku a bhana bhu lukuaku lua ifuẋi ia akua jixi.

³¹ Maji eie-phe mu kuvula o henda, ku a jimi mbutu mba u a ehelela; mbata eie u Nzambi ua uabhela kuloloka ni ku kuatela henda.

³² O kiki-phe, eie u Nzambi ietu, eie u Nzambi Ionéne, Nzambi ia kutena, u kuatesa uoma, u bhaka o kikutu ni ufiiele uoso, hé ujiza ni kubhanga o mbote, kumone kutola o dilamba dioso lelu dia tu kuata etu, ni jisobha jetu, ni ilamba ietu, ni jinganga jetu, ni misesedi, ni jitata jetu, ni kifuxi kié kioso, tunde mu izuua ia jisobha ja Asídia, katé mu kizuua kia lelu.

³³ Maji, Eie-phe Ngana, mu ima ioso iala kuiza ku thandu dietu, ua lunguʼê; mukonda o kuiuka kué kuene kua ku bhangesa-kiu, etu o kubhuma kuetu kuoso kuene kua tu bhangesa o ima iii.

³⁴ O jisobha jetu, ni ilamba ietu, ni jinganga jetu, ni jitata jetu, kitumu kié ka ki bhakele, ka bhele mátui ku ijila ié ni ku maumbangi mé, kioso ki ua kuata jinga ku a bazela.

³⁵ Mbata ene mu ixi ia ungana uâ, sumbala ni jimbote janzungule ji ua a bhana, ni ixi iadixala íi ia nete i ua a tudila ku pholo, nguaʼuâ ku ku bheza, mba a ta dikunda ku ibhangelu iâ iaiibha.

³⁶ O kiki lelu ua tu mono, tuala tu abhika; katé ni mu ixi i ua bhele o jitata jetu, uixi a die-mu o ibundu iê, tuala-mu-phe tu abhika.

³⁷ O ibundu ia mu bhakula o ixi iii, iangene ia jisobha, ji ua tuika o ku tu bhikisa, mukonda dia ituxi ietu; ene ia a kuata kubhikisa o mikutu ietu, kala kiasolo mu mixima iâ; etu tuala mu kubhondalala kua dikota.

Majina ma oso a jika o kikutu ni idimbu

³⁸ O mukonda dia ima ioso iii, tua te kikutu kia kidi, kʼi tua soneka; ni ilamba ietu, ni jilevita jetu, ni jinganga jetu, ia a ki jika ni idimbu iâ.